Абыроймен атқарады

«Нұр Отанның» ел арасындағы беделі, абыройы өте зор. Қазір әділдік іздеген халық ең алдымен осы партияның есігін қағады. Бұл партияның талай жылғы тынымсыз еңбегінің нәтижесі екені анық. Халық та ел игілігін көздейтін, ел мүддесін қорғайтын партияға қолдау көрсетіп, қасынан табылып келеді. Міне, халықпен етене тығыз араласып кеткен бас партияның кезектен тыс съезін теледидардан бастан-аяқ көрдім. Елбасының сөзін тыңдадым. Съезде партияның ұсынуымен, елдің қолдауымен партияның Парламент Мәжілісі депутаттығына үміткер кандидаттарының тізімі жария етілді. «Нұр Отанның» кезектен тыс XVII съезі бәріміздің көңілімізден шықты. Партиямыздың сайлауалды тұғырнамасы елдік мүддені, бірлікті, берекелі тірлікті қамтыды. Мемлекет экономикасының артуы­на да баса назар аударылды. Елбасы, партияның Төрағасы Нұрсұлтан Назарбаевтың съезде айтқан ойлары бәріміздің жүрегіміздің төрінен орын алды. Толғандырды. Бас партияның сайлауалды тұғырнамасы бес институттық реформа шеңберіндегі Ұлт Жоспары – «100 нақты қадамның» негізгі бағыттарын еске сала отырып әзірлегені де көкейге қонды. «Бұл қиындықтан да өтеміз деген ойдамын. Мүмкін, бізге бұған үйрену керек шығар. Бұл күрделі кезең ұзаққа созылады деп ойлаймын. Бұл жақсы да шығар, мүмкін. Біз сіздермен бірге қажетті іс-шаралар қабылдауымыз керек», деген Елбасының еліміздің болашағы үшін нақты қадамдар жасауға шақырған жалынды сөзі де бізді жігерлендірді, қанаттандырды. «Нұр Отан» партиясы алдағы уақытта да осы ойдың үдесінен шығып және жаңа идеялармен алдағы саяси науқанды абыроймен атқаратындығына сенемін. Мұратхан ШҮКЕЕВ, Байзақ ауданының әкімі. Жамбыл облысы.