Коммунистік идеология жасарып келеді

Сайлауалды үгіт-насихат жұмыстарын жүргізу шеңберінде кеше Қазақстанның Коммунистік халық партиясының (ҚКХП) Алматы қалалық комитетінің белсенділері жастармен бірге «Бізбен бірге бол!» флеш-моб акциясын өткізді. Онда ҚКХП белсенділері партияның жастар қанатымен бірлесе отырып, бөлімше кеңсесінде өз қолдарымен қағаздан тырналар мен қызғалдақ гүл­дерін жасады. Кейін оларды қала тұрғындарына тарату арқылы ком­му­нистік идеологияны насихаттап, ха­лықты ҚКХП қатарына қосылуға ша­қырды. Осы шараның өзі айрықша ерекше­лігімен қала тұрғындарының қызы­ғушылығын тудырды. Белсенділер қала тұрғындарына қағаз жасауларының мәнісін де түсін­дірді. Ерте заманнан кейбір халық­тарда тырналар адамның ең жақсы қасиеттерін бейнелейді екен. Ал қызғалдақтар жа­ңару мен махаббаттың символы екені айтылды. Сөйтіп, коммунистер өздерінің идео­логиясы адамзаттың ежелгі аңсары екенін білдірді. Сонымен қатар, ол жаңа заманда да жарқырап шығып, жастықтың символына айналуға тиісті көрінеді. Мұны қызғалдақ формасында көрсеткен ұтымды деп табылыпты. Бүгінгі таңда бұл образдар мен пар­тия­ның ісінде үлкен үндестік бар де­лінді белсенділердің пікірінде. Өйткені, ҚКХП – жаңартылған сайлауал­ды бағ­дар­ламасы арқылы заман талабына сай коммунистік қоғам құру ілімін ал­ға тартып жүрген партия. «Біздің идео­логияға негіз болатын коммуниз­м­нің ұстанымдары қоршаған орта сияқ­ты үнемі жаңарып отырады. Мен мұны заң­дылық деп санаймын, себебі, біз өзіміз­дің алдыңғы ұрпақтағы қайрат­кер­леріміздің саяси тәжірибесін қазіргі заманғы үдерістерді ескермей қабылдай алмаймыз», – деді ҚКХП Алматы қала­лық комитетінің басшысы Магеррам Магер­рамов. Өз кезегінде Алматы қалалық комитетінің мүшесі Ирина Смирнова, коммунистер партияның саяси бағ­дарламасын нәтижелі түрде ілгерілету үшін үгіт науқанын барынша тиімді пайдаланатынын айтты. «Қазіргі заманда жаңа үдерістерден тыс қалу мүмкін емес, сондықтан біз өзіміздің әлеуе­тімізді сайлаушыларымызға ақпаратты жеткізудің әдістері мен пішіндеріне тәжірибе жасаудамыз. Менің ойымша, акция өз мақсатына жетті және ҚКХП алдағы уақытта жаңа жақтастарымен толығатынына сенімдімін», – деп қоры­тындылады өзінің сөзін Ирина Смир­нова. Іс-шара соңында партиялықтар ҚКХП қызметіне қызығушылық таныт­қандары үшін қала тұрғындарына алғыс айтып, естелікке суретке түсті. Жақсыбай САМРАТ, «Егемен Қазақстан». АЛМАТЫ.