Жас тілшіге жақсы мүмкіндік

Кеше «Нұр Отан» партиясының қолдауымен, «Жұлдыз» балалар ұйым­дары одағының, Л.Н.Гумилев атындағы Еуразия ұлттық уни­верситетінің журналистика жә­не саясаттану факультетінің, соны­мен бірге, Білім және ғы­лым ми­нистрлігінің Балалар құқықтарын қорғау комитетінің ұйымдастырумен «Бақытты жұлдыз астында» атты балалар және жастар бұқаралық ақпарат құралдары жас тілшілерінің ХІІ халықаралық медиафестивалінің ашылу салтанаты өтті. Шараның биылғы тақырыбы – «Балалар ақ­параттық кеңістігі: кәсіби іс, шығар­машылық ресурстары». Медиафестивальдің негізгі мақсаты – жасөспірімдердің адам­гершілік-рухани құндылық­тарын байыта түсу, азаматтық сана-се­зімі биік, ұлт тағдырына бей-жай қарамайтын ұрпақ қалыптастыру. Сондай-ақ, заманауи әлемдік ақпа­раттық стандарттарға сәйкес балалар мен жас­тарды бұқаралық ақпарат құралдары арқылы ел ісіне араласуға тәрбиелеу. «Жұлдыз» қоғамдық бір­лес­тігіне кіретін БАҚ-тар мен «Бала­лар ақпараттық кеңістігі: кәсіби іс, шығармашылық ресурстар» форумы қатысушыларының көрме-тұсаукесері, «Юнкор-2016» және «ЖасМедиаKZ»: ең үздік балалар медиа орталығы» байқаулары, «Мәңгілік Ел» ұлттық идеясы аясында «Қазақстан жастар саясатының өзекті мәселелері» тақырыбындағы мемлекеттік органдар, ЮНИСЕФ, «Нұр Отан» партиясы, «Жас Отан» жастар қанаты өкіл­дерінің, кәсіби журналистердің қатысуымен өтетін брифингтер, ақпараттық менедж­мент, ақ­параттық ресурстар негіздері бойынша болашақ тілшілерге арналған шеберлік сабақ­тары мен шығармашылық лабораториялар, және де «Әлем for you» қоғамдық баспасөз орталығының жұ­мы­сы – осының барлығы 28-31 нау­рыз аралығында болатын медиа­фес­тивальдің аясында өтетін іс-шаралар. Айта кететін тағы бір жайт, аталмыш фестивальден аты озып дара келген дарынды жас тілшілер Л.Н.Гумилев атын­дағы ЕҰУ-дің журналистика және саясаттану факультетіне оқуға ша­­қы­­ры­лады. Ал, «Юнкор-2016» бай­қа­уы­ның жеңімпаздары «Жұлдыз» балалар қоғамдық ұйымының БАҚ редакция­сында қызмет етуге мүмкіндік алады. Рауан ҚАЙДАР, «Егемен Қазақстан».