Қазақ пен немісті тоғыстырған қасіретке толы тарихи тағдыр. Сол бір қатыгез, қиын-қыстау кезеңнің өзінде екі халық жақындасып, рухани ынтымақтаса түсті. Билік: «бұларға жылы қабақ көрсетуге болмайды – фашистердің жәрдемшілері», – деді. Қазақ сенбеді. Сталиндік жалған үгіт, оның рақымсыз, жауыздық мәні қазақ халқының адамгершілігін, жүрек жылуын тұншықтыра алмады. Тыйым салынуына қарамастан, қазақ әйелдері өздері ішіп-жемнің жетіспеушілігін көріп жүрсе де қарны ашқан неміс балаларына қолындағы барын – құрт, ірімшік, бауырсақ, жұқа нан ұсынды.
Қазақ та сергелдеңді көп көрген. Татар-моңғол, жоңғар жаугершілігі, ақ патша, кеңес дүрбелеңі. Кәмпеске, қолдан жасалған екі дүркін ашаршылық. Қызыл террор. Елін тастауға мәжбүр болған қазақтың үштен бірі қыр асты, тентіреп кетті. Республикаға концлагерлерді қаптатып жатқанда, жер аударған халықтарды көшіргенде, ядролық полигонды салғанда, тың игеруді күштеп міндеттегенде «сендерге осы керек пе еді?» деп бізден ешкім сұраған жоқ. Сөйткен қазақ бүгін тәуелсіздікке қолы жетіп, не істеу керектігін енді өзі шешпек.
1941 жылғы зорлықпен жер аударылғанның жөнсіз екені ресми түрде мойындалды, бірақ неміс халқы толық ақтала қоймады. Олардың Еділ жағалауындағы бұрынғы неміс автономиясын қалпына келтіру жөніндегі заңды талабы орындалмады. Іс насырға шауып, ушыға бастағанда Мәскеу қазақ жерінен неміс облысын ашпақ болды. Бұған қазақтар ғана емес, немістердің өздері де қарсы шықты. Алайда, шовинистік пиғылдағы Кеңес Одағы, кейін Ресей басшылығы бұл мәселені шешкен жоқ. Немістер тарихи отанына жаппай кете бастады.
Қазақ пен неміс тағдыры осылай тоғысып жатты.
Қуғын-сүргін ұйымдастырып, құқықтарын шектеп, немістерді қайғы-қасіретке ұшырату ақ патша заманында басталған. Большевиктер билікке келместен бұрын-ақ оларды итжеккенге жіберу жобасы болған. Демек, Кремль ешқандай жаңалық ашқан жоқ, патша заманындағы пиғылды жалғастырды. Олай болса, оқиғаның біртіндеп қалай өрістегеніне назар аударғанымыз жөн. Қазақстан талай уақыт Ресей отаршылдығын бастан кешіргенін мойындасақ, мұның да ортақ тарихымызға қатысы барлығын жоққа шығара алмаймыз.
* * *
Әлбетте, ресейлік немістердің тарихын Германия мен Батыс Еуропа тұрғындарын Ресейдің құлазыған кең даласын игеруге шақырған II Екатерина патшамен байланыстырады. Дей тұрсақ та, бұл тұжырыммен келісе қоймайтындар бар. Белгілі тарихшы Н.М.Карамзиннің пікірінше, немістердің бұл елге қоныс тебуі осы жыл санауымыздың алғашқы мыңжылдығының соңында басталған.
Византияның ықпалын азайту үшін орыстың атқамінерлері Батыс Еуропа елдерімен қарым-қатынасты күшейте бастайды. Мәселен, Игорь князінің жесірі Ольганың хатына жауап ретінде 961 жылы Киев Русіне дін қызметшісі Альберт бастаған өкілетті делегация жіберілген.
Бұдан кейінгі жылдары неміс-орыс қатынасы діни жолмен жалғасып, нығая түседі. Кейін немістер орыс жерінде тек саяхатшы немесе елші болып қана келмейді. Олардың көбі Киевте және оның төңірегіндегі маңайда қалып тұрақтайды. Орыс князьдерімен құда болып, өрістерін кеңейтеді. Айталық, Ярослав князьдің балалары неміс қыздарына үйленген.
XII ғасырдың аяғында сауда-саттық жағдайының кеңінен өрістеуіне байланысты біразы орыс қалаларына орналасады. Осыған орай новгородтық және псковтық көпестердің көптеген құжаттары – келісімшарттары бүгінгі күнге дейін сақталғанына назар аударған жөн.
Қазіргі немістердің біраз бөлігі XII ғасырдың соңынан бастап балтық жағалауына жеткен неміс рыцарларының ұрпағы екенін тарихи деректер айғақтап отыр. Ал кейбіреулері славян тектес князьдерінің шақыруымен келді. Тағы бір бөлігі орыс қалаларында әртүрлі себептермен қалып қойған алыстағы ата-бабаларының тұяқтары. Бұлар негізінен қолөнер кәсібі мен тоқыма өндірісін өркендету үшін шақырылған қолөнер шеберлері, ғалымдар, әскери қызметшілер. Қазіргілердің басым көпшілігі Ресей патшаларының жарлығымен қоныс тепкен неміс қауымдастықтарының ұрпағы.
Немістердің едәуір бөлігі III Иван (1462-1505), III Василий (1505-1533) патшалық құрған кезде Ресейге жеткендер. Бұлардың бірталайы әскери өнер, қолөнер сырларын жақсы меңгергендіктен татар-моңғол басқыншылығынан азат ету күресі деген уақытта орыс халқына көп көмек көрсеткендер.
Карамзиннің мәлімдеуінше, олардың көмегімен әскери бекіністер, қамал-қорғандар салынып, қопарғыштар мен минашылар дайындалған.
Ресей мемлекеттігінің экономикалық, әскери және мәдени жағынан өсіп өркендеуіне неміс қауымының елеулі үлес қосқандығын паш ететін деректер жетіп артылады. Мәселенки, Печора жағалауындағы аса ірі күміс кешенін кезінде осында арнайы шақырумен келген екі кен қазатын неміс 1491 жылы ашқан көрінеді.
1517-1521 жылдары орыс әскерилері неміс жерінен бірнеше зеңбірекшілерді жалдап, Ресейге әкелген. Тарихшы Ю.Муравьевтің мәлімдеуінше, олар Мәскеу іргесіндегі мекен-жайға орналасыпты. Мұндай жалдамалы шеберлердің Мәскеу мен Рязаньға татар шабуылы (1521) кезінде көп пайдасы тиген.
Мәскеу қабырғасын қорғауда Шпайер деген жерден келген Николай есімді зеңбірекші ерекше ерлік көрсеткен. Ал Рязань маңайындағы майдан шебінде Иоганн Иойрдан жауға оқ атқанда дәл тигізіп, айрықша мергендігімен таныла білген. Соның айғағы болар, басқа қорғаушылармен бірге оның есімі рязаньдық Кремльдің стеласына ойылып жазылыпты.
Немістердің орыс қалаларына кейде өз еркінсіз келген кездері де болды. Ливон соғысы кезінде (XVI ғасырдың 60-жылдарының ортасында) орыс әскерлері Дерпт, Нарва, Феллин және басқа қалаларды алған еді. Жеңіліске ұшыраған қорғандардың тұрғындары, оның ішінде немістер де, Владимир, Кострома, Төменгі Новгород, Тула, Углич, Қазан қалаларына орналастырылады. Кейін шлезвигтік герцог Магнус Мәскеуде болған сапарында IV Иванмен одақ құруына орай Ресейдегі немістердің жағдайы күрт өзгерді. 1570 жылы олардың бірсыпырасын Мәскеудің солтүстік-шығыс жағына жинап, Яуза өзенінің жағасында Неміс слободасы (қала шетіндегі басыбайлы емес тұрғындар мекені – А.К.) ұйымдастырылды. Ал IV Иванның қолдауымен 1576 жылдың қазан айында лютеран шіркеуі салынды.
Солай бола тұрғанымен немістерге бөтен жерде өмір сүру оңайға түсе қоймады. Бірде қаһарына мініп, жыны ұстаған IV Иван слободаны өртеп, көптеген немістерді татарлармен бірге түрмеге қамаған. Сонда тұтқынға түскен татар мырзасының біреуі: «О, немістер, сендерге сол керек! Сендер орыстарға қару-жарақ бердіңдер, онымен бізді ұрды, соқты. Ал бүгін сол қамшымен сендерді тоқпақтап жатыр», деген екен.
Жатжұрттық Иоганн принцке қызын ұзатқан Борис Годунов патша тұсында неміс ағайындардың Ресейге келуі жиілей түсті.
Орыстың қарама-қайшы тарихы неміс қауымының тағдырына да әсер еткені сөзсіз. Патшаның сүйіспеншілігі мен езіп-жаншуын немістер орыстармен бірдей көрді. I Лжедмитрий қорғады, II Лжедмитрий – қуғындады.
Немістердің Ресейге қоныстану тарихында I Петрдің алатын орны ерекше. Оны «Неміс слободасының шәкірті» деп бекер атамаған. Сол кезде бұл өңір қала іргесіндегі құлпырып гүлденген жұмаққа айналды. Патшаның 1702 жылғы манифесіне орай немістер ұйымдасқан түрде орыс еліне келуін жалғастыра түсті. Мыңдаған әскери қызметшілер, ғалымдар, мұғалімдер, суретшілер, сәулетшілер үн қосып, оған «Еуропа терезесін ашуға» және Ресей елінің жаңа астанасын салуға көмектесті.
I Петрдің қызы – Елизавета Петровнаның тақта отырған кезінде Ока, жоғарғы және орта Еділ өзендері бассейніндегі кең байтақ алқапты отарлау мәселесі күн тәртібінде тұрған. Нәтижесінде орыс үкіметі осы құнарлы жерді игеріп, шаруашылық айналымына енгізу қажеттігінен туындаған іс-шараларды жүзеге асыра бастады.
Штеттинде туған, пруссиялық әскердің генерал-майоры герцог Ангальт-Цербст-Бернбургскийдің қызы София-Фредерика-Августа деген принцесса православие дініне өтіп, Бүкілресейлік император тағына орныққаны белгілі. Тарихқа II Екатерина Алексеевна Великая деп енген бұл жоғары мәртебелі ханымның 1762-1763 жылдары қол қойған екі манифесі шетжұрттықтарды Ресейдің бос жатқан жерлеріне орналасуға шақырған еді. Құжат қыр астындағы ағайындар арасында ерекше қолдау тапты. Өйткені, әйел патша сонау Еуропадан бақыт іздегендерге адам қызығарлықтай жағдай жасаймын деген уәдені аямады, үйіп-төкті. Қоныс аударушылар өмір бойы әскери міндеттен, ал 5 пен 30 жасқа дейінгілер салық төлеуден босатылады, оларға ыңғайлы егістік жер мен жайылым беріледі, діни салт-дәстүрді сақтауға кеңшілік жасалады, жерлестік серіктестіктерін өздері басқарады делінді.
Алыс жолға шыққандардың мақсат-мүдделері туралы бірлі-жарым зерттеушілердің өзі әртүрлі пікір айтады. Біреулердің ойынша, герман мемлекеттеріндегі жетіжылдық соғыстан ел күйзеліп, талан-таражға түскендіктен оларды бұлдыр болашақ күтіп тұрғандығын сезген пысық, жігерлі жандар жаңа аймақты игеруге аттанған. Салықтан қашқан, дүние-мүлкінен айырылып кедейленген шаруалар, қолөнершілер, бір тілім нанға жарымаған солдаттар деп есептейді басқалар. Қалай десек те, олар Гессеннен, Баденнен, Рейн облысынан, Вюртембергтен Балтық теңізіне, сосын Любек арқылы Петербургке, әрмен қарай сатылап, Еділ жағалап дегендей, Саратов маңайына келіп, қоныс тепкен.
Еуропадағы толып жатқан соғыстың от-жалынынан ығысқан адам легі көп тілді еді. Голландтар, шведтер, француздар, швейцарлар, болгарлар, гректер... Сөз жоқ, немістер басым болатын. Бұлар бейтаныс жердің кең жазығынан өз еліндегі қатыгездік пен қанжоса алауыздық жайлаған көптеген герман княздіктерінен көрген жантүршігерлік күйден пана іздеді. Сондықтан да неміс қоныстанушыларының арбалы керуенінен таза ақсүйек тұқымынан тарағандар көп бола қойды деу қиын шығар. Бұлар негізінен қолөнер шеберлері мен шаруалар болатын.
Келімсектер ешкімді сығылыстырып, ығыстырған жоқ – патша жарлығына сай негізінен Еділ бойының бос жерлеріне орналасты. Тек алғашқы үш жылдың ішінде 23 мыңнан астам, ал жүз жылға жетер-жетпесте екі жүз мыңға жуық шаңырақ көтерді. Бұл жерлерде жүзге жуық деревня-колониялар пайда болды. Олардың орыс көршілері славян мақамына салып осынау мекенжайларды айтуға жеңіл болсын дегендей колонкалар деп атады.
Нақты деректерге сүйенсек, 1764-1768 жылдар арасында Германиядан Еділ жағалауына мыңдаған неміс отбасы немесе 30 мың адам көшіп, олар 104 жерлестік серіктестігін (колония) құрған. XVIII ғасырдың соңғы онжылдығында Ресейге қоныс аударушы немістердің екінші толқыны – пруссиялық меннониттер келді. Бұл дінге құлшылық жасағандар қолына қару-жарақ алып, яғни әскери қызмет атқаруына тыйым салынады деп есептейді – Ресейге қашқан себебі де сол. Шет елден келгендер тобы XIX ғасырда да жалғасын тапты.
Кейіннен неміс колонистеріне ертерек тұрақ болған Еділ жағалауына ғана емес Украина, Кавказ, Қырым, Бессарабияға да қоныстана бастады. XIX ғасырдың соңына қарай ірілі-ұсақты ресейлік қалалардың қайсысынан болсын неміс қауымдастығын табуға болар еді. Олардың ең үлкені Санкт-Петербург (51 мың), ал сәл кішілері Мәскеу, Харьков, Киев, Одесса, Қазан қалаларының төңірегіне топтасты. Серіктестер мектеп, кітапхана салып, олардың жұмыс істеуін қамтамасыз етті, кедейлерге қамқорлық жасады. Ынтымақшыл, ұқыпты, тапсырманы бұлжытпай орындайтын педант неміс ағайындар аз уақыттың ішінде әлеуметтік жағдайын тез түзеп алды.
Патша үкіметі алыс аудандарда иесіз жатқан бос өңірді тезірек игеру үшін сол аймаққа барғысы келген адамдардың бәріне дерлік, соның ішінде немістерге де, жеке меншікке жер үлестіру сияқты қадам жасады. Мұның өзі шет өңірлердің экономикасын дамытуға, Ресейге сол кездегі озық деген еуропалық ғылым мен білімді жеткізуге жол ашты.
II Екатеринаның 1763 жылғы екінші жарлығына сәйкес тұрақты жер алу, зауыт-фабрикалар ашып, кәсіпкерлікпен айналысудың қалай жүргізілетіндігі туралы ережелер принципті түрде күні бұрын анықталып қойғандықтан қоныс аударушыларға жаңа жерде бұрынғы үйреншікті өмір салтын сақтауға тиісті жағдайлар жасалғандығын атап өткен жөн. Сол құжаттың өмірге келгеніне жүз жыл өткен соң Ресейдегі колония 505-ке, ал, неміс азаматтарының саны 2 млн. 70 мыңға жетті. Германиядан келгендердің өндірісті капиталистік әдіспен ұйымдастыруының арқасында Ресейде ірі шаруашылықтар пайда болды. Елдің оңтүстік өңіріндегі экономика саласы алдыңғы орынға шықты. Ресейдің сыртқа сататын бидайының 42 %-ын империя халқының 0,5 %-ына жетпейтін Новороссия мен Таврияның неміс колониялары өндірді.
Бірінші дүниежүзілік соғыс қарсаңында тоқыма өнеркәсібінің 50%-ын, металлургиялық және металл өңдеу зауыттарының – 50%, ал электротехникалық өндірістің 90 %-ын, Ресейдің барлық химия зауыттарын немістер иеленді.
Н. Бычков деген зерттеушінің 1890 жылы жазған дерегіне сенсек, Самар уезіндегі тұрғындардың сол кездегі орташа сауаттылық мөлшері 6,8 % болса, қоныс аударған немістер арасында 74 %-ға жеткен. Таврия губерниясында орташа көрсеткіш 11,8 % екен, ал колонистердің сауаттылық деңгейі 63 % болған.
Неміс қауымы өздерінің берекелі еңбегімен, өнегелі іс-әрекетімен, үлгілі тәртіптілігімен әрдайым биік деңгейден көріне білсе де орыс империясы оларды ақырын-ақырын ығыстырып, құқықтарын бірте-бірте шектеп, бұрынғы «бозторғай жұмыртқалаған заман орнатамыз, жарылқаймыз, көгертеміз» деген көл-көсір уәделерін «ұмыта» бастады.
XIX ғасырдың орта шенінде, әсіресе, 1871 жылғы жарлықтан – Қоныс аударушыларды орналастыру Ережесі – кейін неміс колонияларының өзін-өзі басқару құқығы біртіндеп шектеле бастады. 1875 жылы әскери міндеттілік туралы құжат шықты. Ол немістерді сол кездің өзінде Ресейден шет елге кетуге итермеледі. Кейін қайту процесін, яғни алғашқы эмиграцияның неліктен туындағандығының негізігі себебін Э.Тотлебен деген граф «колониялар жуырда орыстандырылатын болыпты; барлық мектептерде сабақ орыс тіліне көшірілмек; орыстар мен неміс селолары бір болысқа біріктіріледі екен» деген сияқты қызметшілер мен жеке адамдар таратқан алып-қашты лақап сөздермен байланыстырады. Алайда, бұл өсек-аяң емес еді. Өйткені, бұл кезде 1871 жылғы жарлық толық күшіне еніп, орындалып жатқан. Ол уақытта колониялардың өзін-өзі басқару, өмірдің барлық саласындағы дербестілік дегеніңіз немістер үшін енді біржола келмеске кеткен болатын.
Осы себепті болар, 1870-1880 жылдар ішінде Ресейден негізінен Америкаға көшкендердің саны 150 мыңға жетті. Ал одан кейінгі онжылдықта мұхиттың арғы жағына тағы да жүз мынан астам адам қоныс аударды. Тап сол уақытта көптеген неміс серіктестері алғашқы аналық колонияларын тастап Ресейдің шығыс аймағына, сол кезде Түркістан деп аталатын өңірге кете бастады. Осындай тарихи жағдайларға орай қазақстандық немістердің түпқазығы Ресейден шыққандықтан күні бүгінге дейін Германияның өзінде ресейлік немістерміз деуге негіз болып отыр.
I дүниежүзілік соғыс басталысымен герман банкісінің ақшасына жер алыпты, герман өндірісшілерімен және саясаткерлерімен астыртын байланыс жасапты, тыңшылықпен айналысады екен деген сияқты жай адамның ойына келмейтін пәлеқорлықтың бәрі немістерге жабыла бастады. Мемлекеттік думаның қара жүзді комиссиясы «немістердің озбырлығымен» («немецкое засилье») күрес жүргізді. Мұның өзі орыс помещиктері мен шет аймақтағы буржуазияның арам пиғылына сай келді де олар астық рыногы мен өнеркәсіптегі бәсекелестерін құртып, сазайын тарттыруға толық мүмкіндік алды.
Жер сатып алуға деген тосқауыл күшейе түсті. Кей жағдайда іс насырға шауып, ойран, қырғын-бүлікке ұласып жатты. Мұндай келеңсіз оқиғалар мемлекеттің ірі мегаполистерінің бірі Мәскеу қаласының өзінде бірнеше рет қайталанған.
Мәселен, 1914 жылдың 10 қазанында Көпестік басқармада келесі 1915 жылға кәсіптік куәлік беру жөніндегі мәжіліс аяқталысымен-ақ көпшіліктің ойынша, қала экономикасында тым белсенділік көрсетіп кетті-ау деген желеумен немістер мен австриялықтарға қарсы ойламаған жерден дәл орталықта (стихиялық түрде) көтеріліс шығады. Немістердің бірнеше азық-түлік дүкендері мен дүңгіршіктері, оның ішінде Ильин қақпасының жанындағы жоғарғы сауда қатарындағы қала жұртшылығына белгілі Эйнемнің кондитер дүкендері бұзылып, талан-таражға түседі. Бұл жолы полиция ширақтық байқатып, бүлікшілерді (21 адам) ұстап, жазасын береді.
Мәскеудегі тәртіпсіздік 1915 жылдың сәуірінде тағы да қайталанады. Жүйкені құрту күшейтіліп жатқан қоғамды қорқыныш, үрей, жүрексіну, сескену сезімдері билейді. Барлық пәле-жала шетжұрттықтарға, ең алдымен немістерге, бағытталады. Соғыстың алғашқы күндерінде-ақ өсек-аяң молая береді.
«Неміс озбырлығын» сөз еткен газет хабарлары мәскеуліктердің ашу-ызасын күшейте түсті. Мұндай хал-ахуалдың өршуіне ең алдымен қалалық әкімшіліктің немістерге қарсы ресми түрде ашықтан ашық жүргізген іс-шаралары (меншіктегі жерін, мүлкін тәркілеу, тұрған жерінен қуу, мектептері мен басылымдарын жабу, қызметтен шеттету т. б.) себеп болғаны шындық.
Немістерге жасалған үлкен қастандық, сөз жоқ, 1915 жылғы мамырдың 26-29-ы аралығында Мәскеуде болған қырғын. Үш-төрт күнге созылған бұл бейбастақтықта орын алған бұзақылық пен сотқарлық өрши келе бірнеше адамның өлім-жітіміне ұласты. Осы қанжоса оқиғада 475 сауда орындары, 207 пәтер мен үй, 113 германдық және австриялық азаматтар және 489 орыс (фамилиялары шетелдіктерге ұқсас) зардап шекті. Көптеген ресей, француз және ағылшын фирмалары, дүкендері, шетелдік консулдықтар мен тіпті әскери тапсырманы орындайтын кәсіпорындардың өзі үлкен шығынға ұшырады. Оның жалпы құны 50 млн. рубльге жеткен (Н.Харламов комиссиясының дерегі).
Ресми билік қырғынды ұйымдастырушыларды анықтай алмады. Бүлікке қатысты-ау деген біраз адамға іс қозғалып, абақтыға қамалды. Бірақ көп ұзамай «қылмысы дәлелденбеді» де бостандыққа шығарылды. Ал шаһардағы тәртіпке жауапты деген Юсупов князь төңірегінде көп шу бола қойған жоқ, қызметтен кетумен ғана шектелді.
1915 жылдың 1 маусымындағы жарлыққа сәйкес Мәскеу кәсіпорындарының бәрінен немістерді жұмыстан шығарып, неміс фирмалары жаппай жабылды. Көбі қаладан кете бастады.
1915 жылдың 26-29 мамырындағы немістерге қарсы жасалған ойранды билік ресми түрде «майские беспорядки» деген бұлыңғыр, тұманды анықтауышпен тасалады. Мыңдаған адам қатысқан демонстрациялар соғыс басталысымен-ақ Санкт-Петербургте өтіп, 1914 жылдың 4 тамызында Германия елшілігіне шабуыл жасалса, ал германофобияның шарықтау шегіне жеткен кездегі Мәскеудегі «тәртіпсіздік» «қап, әттеген-ай» деген кездейсоқ оқиға емес-ті. Ресейдегі антинемістік ынта-ықыластың шыңырау тереңдегі қызуы ең алдымен әлеуметтік сипаттың жиынтығынан бастау алатын. Соғыс бұрынғы қарама-қайшылықты одан әрі ушықтырып қана қойған жоқ, сонымен бірге сол кезде қоғам ішінде туындап жатқан жаңаша сезімнің алуан түрін (өкпе-наз, қорлыққа түскен империялық ар-намыс) көбейтіп жіберді.
Еділ жағалауындағы немістерді Сібірге жер аудару керек деген идея жазушы Г.Бельгер айтқандай, 1915 жылы патриоттық сезіммен тұншыққан және шетелдіктерге деген өшпенділігі күшейе түскен қаражүзді ақылгөйлердің басынан шыққан. Жөн-жосықсыз империядағы ырың-жырың мен шым-шытырықтан және майдан шебіндегі жеңілістерден есінен танған II Николай, ақыр соңында, мұны ұйымдастыруды 1917 жылдың басына жоспарлаған. Арамза пиғыл орындалмады. Ақпан революциясы, аумалы-төкпелі заман болды дегендей. Солай болса да депортация идеясы өлген жоқ, кезегін күтіп жатты.
Мұны 1941 жылы Сталин жүзеге асырды.
Автор туралы анықтама
Амантай Ғазизұлы КӘКЕН 1941 жылғы ақпанында Ақмола облысында туған. Ұлттық қауіпсіздік комитетінің ардагері, полковник, ҚазМУ-ді, Ресей Федералдық қауіпсіздік қызметінің академиясын бітірген.
Кен орындарында, облыстық «Арқа ажары», халықаралық «Түркістан» газеттерінде істеді. Қауіпсіздік саласында басшы қызметтер атқарды. Бірнеше медальдармен, төсбелгілермен марапатталған. Қазақстан Журналистер одағының мүшесі. «Жалын» журналының Ғабит Мүсірепов атындағы сыйлығының лауреаты. «Сәкен шындығын діттегенде», «Түркістан легионы», «Познание себя» (М.Омаровпен бірге), «Қазақтың Сәкені», «Непокоренный сын степи» кітаптарын жазған. Газетіміздің жанашыры әрі белсенді авторларының бірі Амантай Кәкенді 70 жылдық торқалы тойымен құттықтай отырып, оның төменгі материалын оқырман назарына ұсынамыз.
Амантай КӘКЕН, журналист. Астана.