Қазақтың «қасқыр ақыны». Л.Н.Гумилев атындағы Еуразия ұлттық университетінде Қазақстанның еңбек сіңірген әртісі Кенжеғали Мыржықбай жетекшілік ететін «Кəусар» мәдени-танымдық бірлестігінің ұйымдастыруымен өткен ақын Серік Ақсұңқарұлының шығармашылық кешінде белгілі сатирик Көпен Әмірбек жыр жампозын осылай атады.
Кеште филология факультетінің студенттері ақынның «Поэзия», «Іздейсің бе, сен мені», «Кенесарының басы», «Менің мұнда меншігім жоқ», «Қасқырдың монологы», «Аққулар-ай», «Қазақ», «Махамбеттің монологы» атты отты жырларын жатқа оқыды.
Белгілі сазгер Есжан Әміров ақынның бірнеше өлеңдеріне ән жазғаны мәлім. Осы кеште Қазақстанның еңбек сіңірген қайраткері Гүлмира Сарина «Есіл мен Нұра» және «Абыралы» әндерін тебірене орындады. Дарынды әнші Карина Каренинаның орындауындағы ақынның «Қызыма» әні де көрерменнің көңілінен шықты.
Университеттің журналистика кафедрасының ұстазы Ықылас Ожай Қ.Аманжоловтың «Өзім туралы» әнін орындады. Бұл жай емес, Серік Ақсұңқарұлы дауылпаз ақын Қасым Аманжоловты піріндей асқақ тұтады. Бір топырақ, бір рух!
Арқалы ақын Серік Ақсұңқарұлы өз өлеңдерін оқыған кезде зал сілтідей тына қалған. Кенет, жасындай жарқылдаған, алмастай жұтынған рухты жырлар көкке отшашудай шашылды. Әйгілі «Қасқырдың монологы», «Махамбеттің монологы» өлеңдерінің соңын ала сиясы кеппеген «Кейкінің басы», «Қазақ», «Қара таспен сырласу», «Қасиетті қалам» сияқты жаңа жырларын оқып, рухымызды асқақтатты. Енді бір сәтте: «Орыс әдебиетін үлгі тұтамын. Сергей Есенин – ең жақсы көретін ақыным. Мұндай ақын жер бетінде жоқ!» – деп Сергейге арнаған өлеңін оқи жөнелді.
Студенттер көкейдегі сауалдарын қойып, ақынның табанда қайтарған тұшымды жауабына тәнті болды. Кейбір сұрақ-жауап тұсында «Астанаға қалталыларды әкеле бермей, әдебиет, мәдениет және өнер адамдарын жинау керек», «Әдеби сын жоқ. Содан әдебиет бетімен кетті», «Әдебиетке мемлекеттен қамқорлық керек», «Әлем адасты...биылғы «Нобель сыйлығын» ақын емес адамға берді. Жалпы, түркі жұртына ортақ өзіміздің Нобель сыйлығымыз болу керек», деп өткір ойларын ортаға салып, азаматтық үнін іркіп қалмады.
Ақынның өз еліне деген сүйіспеншілігі әр сөзінен аңғарылып тұрды.
– Біз Еуропа жұртына жағымсақтанып, барлық дүниемізді шет тілдеріне аударып тастауға міндетті емеспіз. Өйткені, бұған олардың сөздік қоры, әлеуеті жетпейді. Мен ең алдымен қазақ халқыма керекпін! Өз халқыма қажет болмасам, өзгеге жағынудың керегі не?! Сол Еуропа классиктерін он орап алатын ақын-жазушылар өзімізде де, шіркін-ай, көл-көсір екенін кей пақырлар қайдан білсін! – дейді.
Кешті Еуразия ұлттық университетінің Әлеуметтік-мәдени даму жөніндегі проректоры, алаштанушы Дихан Қамзабекұлы қорытындылап, «Қарағандыдағы бүкіл халықтың тілегі, мұң-мұқтажы Серік Ақсұңқарұлының аузымен сөйленетіндей көрінеді», деп жылы лебізін білдірді. Ақынның кеудесіне университеттің медалін тақты. Жақсылар мен жайсаңдар ізгі тілектерін жеткізді.
Небәрі 25 жасында «Қасқырдың монологын» жазып, елді өзіне жалт қаратқан ақын поэзиясының «азу тісі» бөрілі байрақты бабаларының азат жолымен асқақтап келеді. Ақынның жырлары отты энергиясымен әсерлендірді.
Жұлдыз ТОЙБЕК,
Журналист