Бүгінгі күнде мұғалім еліміздің білім беру саясатындағы басты тұлға ғана емес, оқыту сапасын жаңа деңгейге көтеру мәселесін шешуде айқындаушы рөлді де атқарады. Елбасымыз Нұрсұлтан Назарбаевтың айқындауынша, мемлекетіміздің білім беру саясатының басым бағыттарының негізі педагог мамандығының беделін арттыру болып табылады. Аталған бағыттағы жұмыстың басты көрсеткіштерінің бірі тәжірибе алмасу, білім, білік негіздерін тарату екені анық.
Алматы қаласы білім басқармасының «С.Қожықов атындағы №39 мамандандырылған лицей» КММ базасында Қазақстан математика мұғалімдері ассоциациясының ұйымдастыруымен жақында математика, физика және информатика пәндері бойынша ІV Халықаралық мұғалімдер шығармашылығы байқауы өтті. Байқау оқушылар мен студенттерді олимпиада мен конкурстарға дайындау жұмысымен айналысатын, өзін-өзі жетілдіре отырып, мұғалімнің шығармашылық еркіндік кеңістігін құруға ынталандыру, математика, физика және информатика пәні мұғалімдерінің педагогикалық тұрғыда өзіндік айқындалуын қамтамасыз етіп, әрі қарай жеке тұлғалық, кәсіби өсуін, педагогикалық қарым-қатынас аясын кеңейтуге құлшынысын арттыру мақсатында ұйымдастырылды. Қазақстан Республикасы мен Ресей Федерациясының мұғалімдері қатысқан байқауда барлығы 21 команда, соның ішінде, 173 мұғалім бақ сынады.
Математик мұғалімдер байқауына академик Асқар Жұмаділдаев бастаған айтулы мамандар төрелік жасады. Аталған іс-шара мұғалімдердің тәжірибе алмасып, біліктіліктерін көтеруіне зор ықпал еткен игі іс болды. Байқау қорытындысы бойынша Алматы қаласы бірінші орынды иеленіп, топтан озып шықты.
Гауһар БЕКТҰРҒАНОВА,
С.Қожықов атындағы №39 мамандандырылған лицей директорының тәрбие ісі жөніндегі орынбасары
АЛМАТЫ