«Қазақтың Қанипасы» атанып, әріптестерінің, шәкірттерінің шынайы сезіміне бөленіп жүрген Қанипа Омарғалиқызы туралы аз жазылып, аз айтылып жүрген жоқ. Одақ кезінде ол туралы «Народное образование» журналы, «Учительская газета» сынды орталық баспасөз дүркірете жазып жатты. Лев Красновский «Битибаева сделала карьеру – карьеру Учителя» («Народное образование», 1990 // №5) деп жазса, С. Синицкая, Пильгук сынды педагог-журналистер «Біз ондай мұғалімді кезіктірген жоқпыз», – деп ағынан жарыла мадақтады. Отандастарымыздың жазғандары, әрине, бір төбе. Ол туралы 200-ге тарта мақала, очерктер, үш кітап жазылыпты, оған бірнеше энциклопедияның алғашқы беттері арналыпты. Дегенмен, Қанипа ұстаздың «Жан атты жұмбағына» үңіле алып жүрміз бе? Оның адами болмысына, жан дүниесіне бойлай алдық па деген сұрақтар көптен бері мені ойландырып жүргені рас.Ұстаз менің көз алдымда, атқарып жатқан көп жұмыстарына да қатысып жүрмін. Ол туралы жазылған кітаптарды, мақалаларды оқып шыққанмын, іштей өзімше ой қорытқаным және бар. Дегенмен, Қанипа ұстаздың аңызға айналу себебі, оны қарапайым ұстаздан бастап, зиялылардың өзінің «педагогикадағы құбылыс» деп мойындаулары әлі де жұмбақ күйінде қалып қойған сияқты.
Енді жүріп-жүріп келіп, қолыма қалам ұстатқан жайға оралайын. Осыдан біраз бұрын Қанипаның еліміз ғана емес, тіпті ТМД елдері ұстаздарының тәжірибесінде де жоқ республикалық ғылыми-әдістемелік атаулы зертханасы ашылды. Зертхананың ашылу салтанатында қарымды әдіскер, республиканың түпкір-түпкірінен жиналған ұстаздарды бастап әкелген ББЖ КБАРИ қызметкері, белгілі ақын Жарылқасын Боранбайдың мына бір сөзі қатысып отырған жұрттың сезімін селт еткізгені шындық.
«Қанипаның зертханасына келіп, дәрісін тыңдаймын дегендер саны бізді біраз қиналтты әрі қуантты. Зертхана неге Шымкентте ашылмайды, себебі онда Қанипа жоқ, Астанада неге ашылмайды, онда да Қанипа жоқ. Түсінгенім, Қанипаға мұғалімдер тек тәжірибе алмасу үшін, үйрену үшін ғана келмейді, Қанипаны бір көруге де асығады екен. Мен соны түсіндім».
Мен бұдан 43 жыл бұрын қазір ұстаз еңбек етіп жүрген Жамбыл атындағы облыстық дарынды балаларға арналған гимназия-интернатын бітірген болатынмын. Тоқсан жылдық мерейтойына байланысты бір шаруамен алтын ордама келсем, балалар күзгі демалысқа кеткен екен, ешкім жоқ. Баласыз мектеп жетімсіреп тұрады ғой, аттың басын кері бұра бастағанымда, кезекші: «Үстіде Қанипа апай бар, мұғалімдермен жұмыс істеп жатыр» – деді. Жоғары көтерілсем, ол интерактивті тақтамен жұмыс істеп, дәріс оқып тұр екен. Өзіне тән елгезектікпен ұстаз мені таныстырып жатыр. Демалыс жарияланды, мен де оны пайдаланып мұғалімдермен сұхбаттаса кеттім. Олар күзгі демалыста өз қаражаттарымен ұстаз дәрісін тыңдау үшін жан-жақтан келіп жатқандар екен.
– Аңыз болып кеткен ұстазбен бұрын жүздескеніміз де, бірінші рет көріп отырғандарымыз да бар. Еліміздің барлық облыстарынан жиналып, оны аңсап, іздеп келдік. Жолдың өзіне ғана 4-5 күн жүргендеріміз бар. Енді, міне, екі күннен бері қарай таңғы 9-дан кешкі 5-ке дейін бас алмай жұмыс істеп жатырмыз. Жұмыс жоспары да ауқымды, әрі бізге өте қажетті мәселелерді қамтып жасалынған. Ғылым докторлары, ғылым кандидаттары, ғылым магистрлері, республикаға танымал жаңашыл ұстаздар бізге дәріс беріп, практикалық жұмыстар жүргізіп жатыр. Олардың барлығы ұстаздың шәкірттері екен. Тек мына зертхана ішіндегі том-том болып тұрған дүниелермен аз уақытта толық таныса алмайтынымыз ғана өкінішті. Болашақта оның барлығының электрондық жүйесі жасалынса... – дейді олар.
– Мынау ақпарат, интернет, компьютер заманында, интерактивті тақта тұрғанда оның керегі бар ма?
Бұл сұрақ ұстаздарды жандандыра түсті.
– Оқушыны да, мұғалімді де ғылыми-зерттеу, іздену жұмыстарына өлі дүниелер баулымайды ғой. Олардың мынау технологиялық оқыту заманындағы орнын жоққа шығарып отырғанымыз жоқ. Тек сұрағыңызға ғана жауап берсек, зертхана мұғалімдерді ғылыми ізденіске, зерттеу жұмыстарына баулиды, мынау ғылым заманында оның маңызы ерекше. Зертхананың мақсаты – мұғалімдердің іс-әрекетін репродуктивті деңгейден – шығармашылық деңгейге, яғни зерттеуші, экспериментатор мұғалім дәрежесіне жетелеу. Сондай-ақ, дәстүрлі оқытудан келе жатқан сынып-аудиторияларды зертхана-аудитория дәрежесіне көтеру негізгі мақсаттың бірі. Қанипа ұстаздың атаулы зертханасының қоры ғажап деуге болады. Ауыз әдебиетінен бүгінгі таңдағы әдебиетті оқытудың ғылыми да, тәжірибелік те аса бай қоры жинақталған. Әлем әдебиетін оқыту мәселелері де назардан тыс қалмаған. Ең бастысы, қор бар... Әсіресе, оқушылардың өз бетімен білім алуы, бір-бірін оқытуына негізделген әр тақырыпты қамтитын бағдаршамдары, көмек-нұсқаулары, ғылыми ізденіске баулитын оқушыларға арналған оқулық дәптерлерін айта беруге болады...
Жүрекжарды пікірлер жалғасып жатты, оның бәрін термелей жазудың өзіне де көп уақыт кетер еді. Оның архивіне, ол туралы жазылған кітаптарға үңілсек, аңыз ұстаз туралы айтылған ой-пікірлердің өзін бірнеше кітаптарға жинақтауға болар еді десем, теңіздің суы тамшыдан дегендей, біз бүгін Қанипа апамыз жайлы орман ойларды іркіп беріп отырмыз.
Дегенмен, алты алашты былай қойып, кезінде Одаққа да кеңінен тараған Ұстазды әлі танып болдық деп айту қиын. Ал оны «аңыз-ұстаз» дегенді біреу мойындар, біреу мойындамас, ол түсінікті жайт қой. Ұлы балерина Галина Уланова «Сізді мойындамайтын, сізді сүймейтін адам жоқ шығар» деген журналистке былай жауап қатқан ғой: «Егер мені барлық адам жақсы көрсе, онда мен не екіжүздімін, не жағымпазбын». Осы сөзді аңыз ұстазға да қаратып айтуға болады. Кімнің алдында да болмасын кесіп тура сөйлеп тастауы, тік мінезі, қызуқандылығы, өзін қандай беделдінің алдында да тең ұстауы, көрінгенге иіліп тұрмауы, әрине кейбіреулер ұната бермейтін мінез. Осы бір шарт-шұрт мінездің ар жағында Қанипа ұстаздың рухани әлемі, жан дүниесі, тіршілік иесіне тән қуаныш-мұңы жатыр. Әріптестері жазғандай, аузын ашса жүрегі көрінетін ақ көңілі, ашықтығы, балаға деген, туған тілі мен әдебиетіне деген, ұлтына деген шетсіз-шексіз сезімі жатыр. Ең бастысы, сирек кездесетін еңбекқорлығы, жомарттығы, мейірімділігі, тынымсыз ізденісі, үнемі алға ұмтылуы, кім-кімді болмасын өзіне бас игізеді.
Осы орайда мына бір жайтты да айта кетудің артықтығы жоқ сияқты. 1990 жылы 16 қаңтар күні Кремльдің Свердлов залында небәрі 43 жастағы ұстаз Одақта бесінші, елімізде бірінші болып, КСРО Мемлекеттік сыйлығының Алтын жұлдызын кеудесіне тағады. Сол жолы ұстазды КСРО Оқу министрі Ягодин қабылдайды. Одақтық журналистер, басқа да лауазымды адамдар қатысып отырады. Өзіне тән тік, тура, батыл мінезімен: «Мен Мәскеуде он күн болдым, әдебиетті тереңдетіп оқытатын бірнеше мектептерді араладым. Оқушыны былай қойып, мұғалімдер ұлы Абай мен дана Мұхтарды білмейді екен. Менің үлгірімі төмен оқушыларым Пушкин, Лермонтовты жатқа біледі. Сонда қалай, мәскеулік мектептер туысқан халықтар әдебиетін оқытудан босатылған ба?» – дейді ол министрге қасқая қарап. Бұл оқиғаны «Народное образование», «Учительская газета» дүркірете жазды. Журналист Л.Красновский: «Министрге батылы барып, осылай тік сөйлеген адамды бірінші рет көрдім, келгендердің қолынан қаламы түсіп қала жаздады» – дейді сүйсініспен ұстазға. Бұл оқиға талай жазылды, оған көп тоқталмай-ақ қояйық. Қанекең туралы аңыздар осындай оқиғалардан кейін дүркірей жөнелді ғой, осы оқиға ол туралы аңыздардың негізінде шындық жатқанын еріксіз дәлелдемей ме?!
1991 жылдан ұстаздың қазақ әдебиетін әлем әдебиетімен байланыстырып оқытатын эксперименттік бағдарламасы бойынша тереңдетіп оқытатын сыныптары ашылды. Эксперименттік алаң негізінде сол кездегі Оқу министрлігінің бұйрығымен Бітібаеваның республикалық ғылыми-әдістемелік атаулы мектебі ашылады. Атаулы мектеп жұмысын ұстаз ұзақ жылдар бойы ақысыз- пұлсыз жүргізеді. Ал авторлық сыныптың басқа жетістіктерін былай қойғанда, одан 3 ғылым докторы, 17 ғылым кандидаты, бірнеше ғылым магистрі шықты. Бәрі де филология жолын таңдағандар. Авторлық сынып оқушылары облыстық пән олимпиадаларында үнемі жүлделі 1, 2 орындарды алып келді. 18 оқушы республикалық олимпиада жүлдегерлері. Ұстаздың өзі республикамыздың түпкір-түпкіріне барып, қыс, күз, жаз демей, үнемі іссапарда болып, авторлық дәрістерін өткізді. Әріптестері оның дария біліміне, шешен тіліне, М.Әуезовтің «Абай жолының» көп жерлерін жатқа айтатынына, көркем мәтінді мәнерлеп, рөлге кіре оқуына, әлем педагогикасын да, әдебиетін де терең білетініне қашанда таң қалатын. «Қазақтың Қанипасы» атты кітапта бұл мәселелер кеңірек жазылған. 100-ге тарта ғылыми әдістемелік мақалалар, 32 кітабы (екеуі оқулық) басқа әңгіменің желісі. Оның зертханасында өзінің қолымен жазылған 8 мыңдай дидактикалық материлдар мен көрнекіліктер орын таппай сіресіп тұр. Бір өзі бірнеше зерттеу институтының жұмысын атқарып келе жатқан Қанипаның атын аңызға айналдырған да осы ерекше еңбекқорлығы деп түйіндер едік.
Біртуар ұстаз еңбек етіп жатқан Жамбыл атындағы дарынды балаларға арналған облыстық гимназия-интернатқа 90 жыл толып отыр. Осы бір ғасырға жуық еңбек етіп жатқан білім ордасынан ірі қоғам қайраткерлері де, ғұлама ғалымдар да, әлемді аузына қаратқан спорт шеберлері де, ақын-жазушылар да шықты. Бұрынғы шәкірт, бүгінгі ұстаз, тәрбиешілер қаншама?! Бір қызығы, ең тамаша үлгі алатын қасиет бүгінгі ұжымның ішінде өз түлектерінің бұрынғы ұстаз, тәрбиешілерімен иықтаса еңбек етуі. Тарихи қара шаңырақтың тек Шығыс өңірінде ғана емес, байтақ еліміздің білім беру жүйесіне қосқан еңбегін ерекше қомақты деп айтуға болады.
Жариялылық нұры, Тәуелсіздік алуымыз алтын орданың да жұмысын заман талабына сай, жаңаша құруына мұрындық болды. Өскеменде қазақ тілі мұғалімдерінің жетіспеуі Қанипа ұстаздың авторлық сыныптарын бітірушілерді бірден педагогикалық колледжге (қазақ тілі мен әдебиеті бөлімі) қабылдау туралы салалық министрлік ұсыныс жасады. Кішкене интернаттан қаншама тамаша тіл мамандары шықты, бәрін айтпағанда бүгінде республикаға танымал болып отырған шәкірттері қаншама?!
Ауыл қарадомалақтары оқып жатқан осы шағын интернат елімізді былай қойып, Одақтың білім беру жүйесінде жоқ Қазақстанның еңбек сіңірген қайраткері Бітібаеваның республикалық ғылыми-әдістемелік атаулы мектебінің базасы болды. Республикалық семинарлар, ғылыми-практикалық конференциялар да осы шағын мектепте өтіп, оның тыныс-тіршілігін байтақ елімізге таратып жатты.
Аңыз ұстаз еңбегінің салмақты бір жағы қазақ тілі мұғалімдерін дайындау, кадр мәселесін шешуге ат салысуы дер едік. Енді зертхана ашып, әсіресе жас ұстаздарды зерттеуші, ізденуші, экспериментатор деңгейіне көтеру ісіне араласып отыр.
Оңдасын ЕЛУБАЙ, Өскемен қаласы.