«Алпамыс» алға басуды қалайды

Қостанай қаласындағы «Ал­памыс» акционерлік қоғамы еліміздегі аяқ киім шығаратын бір­ден-бір кәсіпорын. Кеңес Одағы кезінде де санаулылар қатарында  болатын. Қазір еліміздің Қарулы Күштері мен әлеуеттік органдар­дың барлығын  қысқы-жазғы  аяқ киім түрлерімен қамтамасыз етіп отыр. Жақында  осында «Нұр Отан» ХДП Қостанай қалалық филиалының  өкілдері және журналистер келді. Оларды кәсіп­орын директоры Алмагүл Сәуде­нова фабриканың басты цехына бастады. Станоктар қаз-қатар тізілген атшаптырым цехта жұмыс­шылар мен партия өкілдерінің әдет­тегіден ерекше басқосуы өтті. Кәсіпорынның іргесі 1941 жы­лы, Кеңес одағына фашистік  Германия тұтқиылдан соғыс бастаған кезде  қаланды. Анығын  айтқанда, Ресей мен Украинаның соғыс өртінен қауіптенген аймақ­тарындағы  маңызы зор  зауыт пен фабрикалар Қазақстанға көшірілген болатын.  Қостанай аяқ киім фабрикасының  тарихы мен тағдыры  ХХ ғасырды тітіренткен соғыспен тікелей байла­нысты. Содан бері 70 жыл уақыт өтті. Мұнда  ұзақ жылдар бойы қалыптасқан жұмыс ұжымының еңбек дәстүрі осы күнге  дейін сақталған. Қазір кәсіпорында 380 адам жұмыс істейді. Ал жоспар­ды шұғыл орындау керек болған жағдайда жұмысшылар­дың саны 700-ге дейін барып жығылады.  Аяқ киім фабрикасында осы кезге дейін сақталып отырған дәстүрдің бірі – еңбек әулеттері.  Светлана Кревоспицкая осында  16 жасында келген болатын. Болашақ жарымен де  фабрика  цехында танысты. Светлананың енесі де, қайын апасы да  осы цехта жұмыс істейді екен. Міне, қазір ұлы Сергей де ата-ана­сының, әжесінің  ізімен  аяқ киім фабрикасына келді. Ол да  келіншегімен осы фабрикада танысты, бүгінде  Светлананың кішкентай  немересі өсіп жатыр.  Кәсіп­орында  еңбек өтілі қырық жылдан асқандар жиі кездеседі. Соның бірі, бас инженер Анна Бега ханым. – Институтты бітірген соң осында келгенмін, міне, уақыт қалай өзгерсе де екінші үйім болып саналатын фабрикадан еш­қайда кетпедім, суығына то­ңып, ыстығына  күйіп келемін. Біз бір атаның балалары сияқ­тымыз, еңбек демалысынан жұ­мыс орнымызды сағынып ора­ламыз. Қазір бүкіл фабрика бір-ақ тыныспен, бір оймен ғана  жұмыс істейді. Ол – отандық бұйымдарға  тұтынушылардың на­зарын аудару,  сұранымды кө­бейту, – дейді  Анна Владимировна. Алмагүл Қасымқызы тағы бірнеше жұ­мысшыны ортаға шақырды.  «Біз­­дің фабрика  ұжы­мында еңбек­сүй­гіштікпен қатар, нағыз дос­тықтың,  патриоттық сезімнің салтанат құратынын осыдан-ақ білуге болады», деп нықтап қойды басшы Валентина Пассикті арқасынан қағып  тұ­рып. Одан әрі  Валентина Алексеевна өзі туралы айтып кетті. – Осы ұжымда жас  күнімнен  бері жұмысшы болып істеймін. 90-шы жылдары  Қазақстанды мекендеген  өзге ұлттардың тарихи отанына  көшуі  етек алған болатын. Уақыт та ауыр еді. Менің үлкен ұлым Белоруссияға көшті, мен де  балаларымнан қалмай қоныс аудардым. Алайда, мені  туған қалама, фабрикама деген сағыныш  тарихи отаныма  тұрақтатпады. Сонымен 2006 жылы Қостанайға қыдырып келдім де,  бірнеше күннен кейін ұлыма  телефон шалдым. «Ұлым, кешір, мен Қостанайда қаламын, бара алмаймын» дедім. Туған фабрикама келіп, Алмагүл Қасым­қызына «мені қайта жұмысқа аласыз ба?» дегенде, директор: «Сізді туған ұжымыңыздан айы­руға менің адамгершілік құқым жоқ» деп жауап берді, – деп ағы­нан жарылып әңгіме айтты Валентина Алексеевна. Жақында осындай ұйып отыр­ған жұмысшы ұжымында  «Нұр Отан» халықтық-демокра­тиялық партиясының бастауыш ұйымын құрайық деген бастама көтерілді. Қазір  адамдардың бар­лығы да ақпараттан кенде емес. «Нұр Отан» партиясының  белсенді қимылын барлығы да біледі. Сонымен оның қатарына өтуге  арыз  бергендер қатары көбейді. Партияның Қостанай қалалық филиалының төрайымы  Римма Бектұрғанова  мүшелік билеттерін табыс етті. – Партия лидері Нұрсұлтан Назарбаев кезектен тыс ХІІІ съезде үдемелі индустриялық-ин­новациялық даму бағдар­ламасы туралы айтты.  Бұл бағдарлама он жылға арналған.  Сіздер Қазақстан экономикасын да­мыту үшін осы бағдарламаға үлес қосасыздар. Сондықтан партия қатарында болу үшін өте оң шешім қабылдадыңыздар,–деді Римма Шыңғысқызы. – Биыл облыста осы бағдарлама  шеңберінде 11 жоба қолға алы­нып отыр. Оларда 9 мың  қос­танайлық  жұмыс орнын таба­тын болады. Қала көркейіп келеді. Ауылда да алға ұм­тылу­шылық бар. Бір адамның мүмкіндігі барлығына бірдей жетпейді,  ал біз Көшбасшының соңынан ергенде, оның бас­тамаларын қолдағанда ғана даму жолынан адаспаймыз. Алмагүл Сауденованың  ай­туынша, Қазақстандағы  жеңіл өнеркәсіп саласында «Алпа­мыс» аяқ киім фабрикасы сияқты ірі кәсіпорындар сиреп кеткен. Мұнда  өндірістік  жаб­дықтар, станоктар да,  заманауи жаңа технологиялар да бар. Алайда, тендер кезінде  аяқ киімді өздері сияқты таза теріден тікпейтін,  сырттан сатып ала­тын фирмалардың  бәсекелесіп, килігетіні ренжітеді екен. – Біздің  етіктер де, бәтең­келер де, жазғы туфлилер де таза теріден тігіледі. Біз жасанды терімен жұмыс істемейміз.  Өйткені, біздің дайындаған аяқ киімді елді қорғап тұрған сарбаздар – балаларымыз киеді  ғой, – дейді Алмагүл Қасым­қызы. Партия билетін алған сәтте сөз сөйлеген жұмысшылар кә­сіп­орынның тендер сайын жеңіске жетуін тілеп отыра­тынын айтты. Ал сұраным болу үшін олар жұмысты барынша адал, сапалы атқаруға тиісті екен. «Біз кәсіпорын басшы­лығымен бір кемедеміз. Сұра­ным болса – жұмыс болады, жұмыс болса – жалақы көбейе­ді, жалақы – әр отбасының нәп­ақасы» дейді олар. Жұдырықтай жұмылған  еңбек ұжымы сайлауға да бір кісідей барып қатысты. Олар өз таңдауын жасады.  Жақын күн­дерде  фабрикадағы  «Нұр Отан» ХДП бастауыш ұйымы іске кіріспек. Елбасының жеңі­сін олар өз жеңісіміз деп  қуа­нып жатты. Өйткені, нұротан­дықтарға Елбасы  бір табан жақынырақ. Нәзира ЖӘРІМБЕТОВА. Қостанай.