Қазіргі дүниенің кілті ғылымда екені анық. Ғылымға негізделмеген жұмыстың жасандылыққа ұрынып, қожырайтынын өмір ағысы көрсетіп отыр. Ендеше, ғылыми-зерттеу жұмыстарының зертханада зерделеніп, тамырын тереңге байлап, сабағын гүлденту жолындағы Елбасы алға қойған міндеттер ұшан-теңіз. Осыны қалай орындаймыз, мақсат-міндеттер нендей деген мәселе кеше Білім және ғылым министрлігінде талқыға түсті.
Елбасы Жолдауында «...Ғылыми зерттеулердің нәтижелілігі мен тиімділігін арттыру қажет» деп атап өткенін тілге тиек еткен Білім және ғылым министрі Бақытжан Жұмағұлов университеттердегі білім мен ғылымды ұштастыру мәселесі күн тәртібінде тұрғанын, әрбір зертханадағы дәйектелген жұмыс өндірісте орындалуы тиіс екенін, қазіргі кезеңде ел дамуы үшін ғылым мен өндірісті ұштастыру ісі оң нәтиже беретінін атап өтті. Ол сонымен бірге, кейбір ғылыми еңбектердің өндірісте орындалмай жататынын да айтып, бұл болашақтың ісі. Қазірше индустриялық-инновациялық негізде дамитын өндіріс ошақтарын зерттеу мәселесін алға шығару қажеттігін алға тартты. Қалай десек те, Мемлекет басшысы біздің алдымызға айқын мақсат етіп қойған, білімді ғылыммен және инновациялық процеспен біріктіру қажет. Бұл істе ұлттық және инженерлік зертханалардың орны ерекше. Еліміз бойынша 20 оқу орындарында талапқа сай зертханалар ұйымдастыратын боламыз. Онда негізінен алға қойылған істің нәтижесі бірінші кезекте тұратын болады, деді.
Министр барлық басымдықтар зерттеудің соңғы түйініне тірелетінін, ол – ғылымның әлемдік деңгейге шығуына жол ашатынын және нәтижелерінің инновациялық процесс, экономика және қоғам тарапынан жоғары сұранысқа ие болатынын жеткізді.
Қазір Отанымыз бойынша Үкімет жанындағы Жоғары ғылыми-техникалық комиссияның жоба-жоспарымен 2011-2013 жылдарға арналған ғылымның басым-бағыттары нақтыланған. Оның нәтижелі орындалуын қадағалау үшін Қазақ елі мен шетелдік ғалымдардың Ұлттық ғылыми кеңесі құрылғаны белгілі. Білім мен ғылымды ұштастыратын жоғары оқу орындарына қойылатын талаптар аз болмайтыны анық. Ал олардың алдында халықаралық стандартқа сәйкес ғылыми және инновациялық қызмет үшін заманға сай білікті кадрлар даярлау міндеті тұр. Биылдың өзінде екі зерттеу университетін және инновациялық бағдарланған 10 жоғары оқу орнын іріктеп алып, онда жұмысты жандандыру қолға алынады екен. Бұрын ғылыми-зерттеу жұмыстары арнаулы институттарда өтсе, енді жоғары оқу орындарында жалғасын табады. Мысалы, кеңес дәуіріндегі ғылыми-зерттеу институттарының зертханасында зерттеулер 68 пайызға дейін болса, қазір ол көрсеткіш 59 пайызға төмендеп, жоғары оқу орындарындағы зертханадағы зерттеулер 23 пайыздан 32 пайызға көбейген.
Жиында министр ғылыми-зерттеу институттары мен ғылыми орталықтарда жұмыс істейтін ғалымдар білім мен ғылымды ұштастыруға күш салу қажеттігін атап өте келіп, кейбір университеттерде ғылыми жұмыстардың жүйелі орындалмай келе жатқанын атады. Олардың қатарында тұрған университетті мысалға келтіріп, кемшіліктерді жою үшін төмендегідей міндеттерді жүктеді. Бірінші, жоғары оқу орындары мен ғылыми ұйымдардың басшылары: магистранттар, докторанттарды даярлау және олардың ғылыми-зерттеулер жүргізу үшін зертхананың тиімді пайдалануын қамтамасыз етуді, екінші, ғылыми қызметті, зертханалардың толыққанды іргелі және қолданбалы зерттеулерді дайындауын, рейтингтік басылымдардағы жарияланымдарды жандандыру, конкурстарға белсенді қатысуын, ол конкурстарда ел өміріне дәл қазір қажет зерттеулер болу керектігін, үшінші, 2011 жылы халықаралық аккредиттеуден зертханаларды өткізуді аяқтау, төртінші, инновациялық процеске қосу жөніндегі жұмыстарды жүйелі жүргізу, яғни ғылым нәтижелерін өндіріске енгізуді жүйелі жүргізу.
Сүлеймен МӘМЕТ.