Қобызды киіз үйде отырып тыңдағым келеді
Қазақтың «құлақтан кіріп, бойды алар» әсем ән-күйлерінің құдіреті жер жүзін жаулауға жететіндей көрінеді де тұрады. Қайдан білейік, бәлкім, әлемдегі әрбір ұлт өкілі өздері туралы осылай ойлайтын шығар. «Қоғалы-ай, әркім көңілі жоғары-ай!» дегендей. Бірақ сол бабадан мирас байлығымызды базарлауға келгенде кейде біздің кежегеміз кейін тартатын тәрізді. Әйтпесе, бұл бағыттағы табыстарымыз қазіргіден гөрі қомақтырақ болмас па еді. Дегенмен, ауызды құр шөппен сүрте бергеніміз жарамас. Халықаралық байқауларда қатарынан қара үзіп, қанжығаларына бәйге байлап жүрген сахна саңлақтарымыз баршылық. Олардың орындауындағы ұлттық музыка туындылары арысы Американы, берісі Еуропаны елеңдетіп, талғамы биік көрерменді талай там- сандырғаны белгілі. Осыдан тура үш күн бұрын «Егемен Қазақстан» газетінің редакциясына Швейцариядағы DIVOX дыбыс жазу компаниясының президенті Вольфрам Бургерт келді. Алыстан ат арытып жеткен қадірлі қонағымыз құр қол емес екен. Аэрофония атты саз технологиясындағы ең соңғы үлгідегі үрдіспен шығарған екі бірдей ерек үнтаспасын әкеліп, бас басылымның төрағасы Дархан Қыдырәліге сыйға тартты. Мәселенің мән-жайын мәртебелі мейманның жолбастаушысы Ғазиза Жұбанова атындағы мемлекеттік шекті аспаптар квартетінің көркемдік жетекшісі, Қазақстанның еңбек сіңірген қайраткері Ернар Мыңтаев түсіндірді. Оның айтуынша, Бургерт мырза басқаратын DIVOX компаниясы негізінен кәсіби камералық музыканы күйтабаққа түсірумен айналысатын Еуропадағы ең танымал брендтердің бірінен саналады екен. Негізінен камералық музыканың майталмандарын немесе осы жанрда жаңа көріне бастаған жас жұлдыздардың орындауындағы елеулі дүниелерді жазып, таратады. – Біз бұл кісімен төрт жыл бұрын Швейцарияда кездестік. Шығармашылық ұжымдағы төрт жігіт Президенттің «Болашақ» бағдарламасы бойынша Базельде оқып жүрген кезіміз еді, – дейді Ернар өткен шақты еске түсіріп. – Бірде қаладағы студенттер концертіне қатыстық. Бойымыздағы бар қабілетімізді салып бақтық. Мендельсонның екі шығармасын орындадық. – Бәрімізге неке куәлігін тапсырғанда құлақ құрышымызды қандырған атақты махаббат маршының авторы ғой. Осыны ойнаған орган Лондондағы әулие Анна шіркеуінде орналасқанынан хабарымыз бар. – Дәл өзі. Содан концерттен кейін қолымызды қысып, орындаушылық мәнеріміз ойынан шыққанын, шығармашылық байланыс орнатуға құлықты екендігін білдірді. Жарты жылдан соң алғашқы альбомымыздың жарық көруіне жағдай жасады. Кейіннен тіпті достасып кеттік. Аралас-құраластықтың арқасында арамызда айтылмайтын сыр қалмайтын дәрежеге жеттік. Қаныма тартпай тұрам ба, емен-жарқын әңгімелер үстінде қазақ мәдениетінің інжу-маржандары жайын- да сөз қозғауды әдетке айналдырдым. Жақсыға жаны құмар продюсер бірден қызығушылық танытып, іркілместен іргелі іске кірісті. Астанаға арнайы ат басын бұрып, халқымыздың көне аспаптарымен, музыкалық мұраларымен жақынырақ танысты. Талант- ты тарланбоз Әлқуат Қазақбаев бастаған қобызшыларымыздың өнерін тамашалағанда аузын ашып, көзін жұмып, қайран қалды. «Мынау керемет қой. Сенің ниетіңді түсіндім. Мұндай ғажайыпқа бүкіл ғалам таңдануға тиіс» деп таңдайын тақылдатқанын көзіммен көрдім. Ұзын сөздің қысқасы, ағамыз алды-артымызға қаратпай жаңа жобасына қатысуымызды қолдады. Көктен тілегеніміз жерден табылып жатса, не тұрыс?! Ұтымды ұсынысты қуана-қуана қабылдадық. Маған ағаның музыкалық туындылар мен аспаптарды іріктеп, шебер орындаушыларды іздеп табуды тапсырып, қалған қажеттіліктердің бәрін өз мойнына алды. – Мына екі дискі соның жемісі ғой? – Иә. – Қай жерде жаздыңыздар? – Мәскеудегі Слободкин орталығында таспаға тарттық. – Анау Арбаттағы, Ресейдің халық әртісі Павел Слободкин салдырған концерт залы ғой. Бір жағы театр есебіндегі ғимарат білем. – Ол ортаның акустикасы ғажап! Оның үстіне дәл сол тұста рубльдің құны құлдырап, экономикалық жағынан тиімді болып тұрды. Ресейдің астанасына бәрімізді алдырып, қыруар қаржысына Еуропаның өзінде енді ене бастаған аэрофония технологиясымен өздеріңіз көріп отырған екі үнтаспаны дүниеге келтірді. – Мұнда қандай дүниелер қамтылған? – Біріншісінде – КСРО халық әртісі Ғазиза Жұбанова бастаған көрнекті композиторларымыздың классикалық шығармалары, ал екіншісінде – «Ұлы дала әуендері» айдарымен Қорқыттың «Қоңыры», Құрманғазының «Адайы», Тәттімбеттің «Қосбасары», Әбдімомын Желдібаевтың «Еркесылқымы», Төлеген Момбековтің «Салтанаты», Әлқуат Қазақбаевтың «Абылай ханның жорығы» секілді күйлер, сосын дәстүрлі әнші Елікбай Иса төгілдірген «Сүйінбайдың термесі» бар. – Бәрекелді! Ендігі әңгімені қазақ өнеріне осыншама қамқорлық жасаған швейцариялық жампоздың өзінен естігеніміз жөн болар. – Әлбетте. – Олай болса, Бургерт мырза, айтыңызшы, музыка сіз үшін мамандық па, әлде жүрек қалауы ма? – Мамандығым бойынша мен – психологпын. Ал музыка – менің өмірім- нің мән-мағынасы. Әдемі әуендерді тыңдасам жаным жай табады. – Иелігіңіздегі компанияның көздеген мақсаты не? – Өнер шіркін сан салалы екенін білесіз. Біз соның ішінде камералық музыканы насихаттауды жөн санадық. Оның тыңдарманы эстрада немесе операдағыдай көп емес. Сондықтан табысы аздау да, шығыны көптеу. Әйтсе де, алға қойған мақсатымыздан айныған емеспіз. – Классикалық композиторлардан кімдерді «пір» тұтасыз? – Брамс пен Стравинскидің шедеврлеріне елтуден ешқашан жалықпаймын. – Жөн екен. Бірі «Неміс реквиемін» жазған, екіншісі Санкт-Петербургте туып, Нью-Йоркте өлген орыс корифейі. Екеуі де романтикалық бағыттың баһадүрлері. Ал енді қазақ музыкасына құмартуыңыздың себебі неде? – Базельдегі байырғы досым профессор Райнер Шмидт мені бірде өз шәкірттерінің концертіне шақырды. Ол музыканың майын ішкен аса ірі маман. Ұлағатты ұстаз. Көрермендер алдында жапониялық, испаниялық, британиялық, швейцариялық және қазақстандық квартеттер өнер көрсетті. Маған мына Ерландардың төрттігі қатты ұнады. Бұлардың қолтаңбасынан еуропалықтарда кездеспейтін ерекше нақышты байқадым. Бас-аяғы жұп-жұмыр тұтастықты тұла бойыммен сезіндім. Өнебойымды шымырлатқан өзгеше ағын жан-жүрегімді елжіретіп, бөлекше күйге бөледі. Содан өнерлі өрендермен өзара пікір алмасып, біте қайнасып кеттім. – Қазақстан жайында бұрын-соңды естіп-біліп пе едіңіз? – Өкінішке қарай, сіздердің елдеріңіз туралы мәліметім мүлдем мардымсыз. – Жарайды, Қазақстанның тарихын, мәдениетін, экономикасын, тағысын тағыларын білмей-ақ қойыңыз. Ал енді дүние жүзінің картасында далиып жатқан аумақты алып мемлекетті көрмеу мүмкін емес қой? – 1991 жылға дейін КСРО-ға көзқарасымыз онша дұрыс болмады да, оған қарасты одақтас республикаларға мән бермегенімізді несіне жасырайық. – Қазір қалай қарайсыз? – О, оны айтып жеткізе алмаспын. Астанаға осымен төртінші рет келуім. Көркіне көз тоймайды. Өте қысқа мерзімде самаладай қала салып тастағандарыңыз тым таңғаларлық құбылыс. Адамдарыңыз қандай ақжарқын. Отандастарыңыз материалдық игіліктерден гөрі рухани құндылықтар төңірегінде көбірек толғанатыны тәнті етті. Рухани ұстындарыңыз мықты екен. – Швейцария банктерінің ауылы бізден алыс, сондықтан көз алдымызға көкала қағазды ақшадан гөрі қолмен ұстауға келмейтін, тек санамен ғана сезетін алтынға айырбастамас байлықтар көбірек елестейтін шығар (Әзіл-шыны аралас сөзімізге кеңкілдеп күлген кейіпкеріміз отырған орнынан тұрып, қолымызды қысты да, үзілген әңгімесін әрі қарай жалғастырды). – Астанаға сапарларым аясында салт-дәстүрлеріңізбен де біршама таныстым. Конгресс-холдағы бірқатар мәдени шараларға қатыстым. Меніңше, әрбір музыка аспабының дыбысы тәуірірек естілетін орындар болады. Мәселен, орган дыбысының шіркеулерде шалқи шығатыны сияқты. Неге екені қайдам, қазақтың қасиетті қобызын киіз үйде тыңдағым келеді. Сұмдық сұңғыла аспап! Қоңыр үні кісінің қай-қайдағысын қозғайды. Біздің компания қолдарыңыздағы альбомды Қазақстан Тәуелсіздігінің 25 жылдығына орай ұсынады. – Меніңше, сөйтетін жөні бар. Өйткені, біздің қобыз – сіздер қатты қадірлейтін скрипканың бабасы. Алайда, музыкатанудың бірде-бір оқулығында бұл жайлы жазылмайды. – Скрипканың бірден қазіргі қалпында аспаннан түсе қалмағаны анық. Страдиварий сияқты шеберлер ғасырлар бойы жетілдіргені әмбеге аян. – Әңгімеңізге көп рахмет. *** Кеше Ұлттық музейде жоғарыда біз жай-жапсарын баяндаған үнтаспалардың тұсаукесер рәсімі өтті. Оған бір топ зиялы қауым өкілдері қатысып, швейцариялық продюсерге ризашылығын білдірді. Әңгімелескен Талғат БАТЫРХАН, «Егемен Қазақстан» Суретті түсірген Ерлан ОМАРОВ
•
08 Желтоқсан, 2016
Қобызды киіз үйде отырып тыңдағым келеді
249 рет
көрсетілді