Еңбекке ерте араласты
Кейіпкеріміздің ныспысы – Виктор Буллер. Ертісті бойлай қонған Кереку өңірінің Шарбақты ауданында туыпты. Тарихқа қанды әріптермен таңбаланған Ұлы Отан соғысы жеңіспен тәмамдалса да, халық әлі етек-жеңін жия қоймаған тұс. Өзге топырақтан қоныс аударылып келген отбасылардың ахуалы да көңіл қаритындай. Дмитрийдің шаңырағына шаттық сыйлаған ұл ата-анасына қарашаның қара суығы мен тұрмыстың сызын елетпегендей еді. Десе де, зұлмат жылдардан кейін туғандарда қайбір оңған балалық шақ болды дейсіз?! Қазақы ауылдың қам-қарекетімен көз ашып, ер жеткен бала Виктор еңбекке ерте-ақ араласты. «Біздің заманымыздың ұраны тек еңбек еді ғой. Ауыл үлкендерінің қырман басында, егістік алқабында, мейлі, өзінің ауласында жан аямай жұмыс істеп, шаруамен айналысып жүргенін көріп өстік. Әке-шешелеріміз күнмен таласып тұрып, қара жұмысқа жегілсе, қас қарайғанда қайратын сарқып қайтатын. Міне, осындай жанкештілік менің замандастарымның, қатарластарымның қанына сіңіп үлгерген. Әлі күнге қол қусырып отырудан аулақпыз. «Еңбек етсең ерінбей, тояды қарның тіленбей» деген емес пе?» дейді Виктор Дмитриевич.Целиноградқа жолдама – болашаққа оң қадам
Виктор Буллер мектеп қабырғасын бітірер-бітірместен Павлодар қаласындағы «Элеватормельстрой» мекемесіне құрылысшы болып кіреді. Небәрі он жеті жастағы бала алып трестің ауыр жұмыстарына жегіле жүріп, болашақ мамандығының алғашқы қыр-сырына қаныға бастайды. «Биік үйлерге қатты қызығатын едім. Зәулім сарайлар соғуды армандадым да. Құдай тілеуімді берген екен ғой, көп ұзамай сол кездегі Павлодар индустриялық институтына құжат тапсырып, жолым болып кетті», деп еске алды бозбала шағын қарт құрылысшы. Бес жыл бойы білім алғанда, инженер-құрылысшы-технолог мамандығын теориялық тұрғыдан меңгеріп үлгерді. Жігері бекем, қайраты мығым жас маман жұмыс таңдаған жоқ. Басшылықтың жолдамасымен сол кездегі тың игерушілер қаласына жол тартты. Арқаның жазық даласын тіліп, еркелей аққан Есілдің оң қапталын бойлай қонған жас қала арманын қанат қылып жеткен Ертістің ұлын жатырқай қоймады. Виктор келе сала Целиноград темір-бетон бұйымдары комбинатына жұмысқа кірді. Қарапайым жұмысшы болып еңбек жолын бастаған ол араға аз уақыт салып арматура шығаратын цехтың аға шебері болды. Тынымсыз еңбегі мен біліктілігі оқу орнын кеше бітірген түлекті цех басшысы лауазымына дейін жеткізді. Тіпті, 1971 жылы бас инженер қызметіне тағайындалды. Ал екі жылдан соң Виктор Буллер комбинат директоры болды.Ер – туған жеріне
«Іргесі ыдырамастай көрінген Кеңес өкіметі де құлады. Қазақстан егемендігін алғанда шын қуанғандардың бірі мен едім. Өзге ұлттар атажұрттарына көш басын бұрғанда да, көңілім туған жерімді қимағанын неге жасырайын. Қазақтың «Ер – туған жеріне» деген мақалы әркез жадымда. Кіндік кескен жұртымды қиып кету ойыма да кірмеген екен. Бар мұратым дербестігін алған елдің бір кетігіне кірпіш болып қалану еді. Жасаған оған да жеткізді», дейді кейіпкеріміз. Тәуелсіздіктің алғашқы жылдарындағы сын сәттерде Виктор Дмитриевич «Стройконструкция» акционерлік қоғамына басшылық етуге келді. Отыз жылдан аса тарихы бар мекеме де ел экономикасымен бірге тоқырау кезеңдерді басынан өткергені рас. Қазақстанның көптеген кәсіпорындары жабылып, жабылмағаны тұралап, аласапыран күйге түскен шақта В.Буллер жетекшілік ететін «Стройконструкция» АҚ та есігіне құлып салудың аз-ақ алдында тұрған. Алайда, өндіріс саласында ширек ғасырдан аса тәжірибесі бар маман іргелі мекемені аяғынан тік тұрғызу үшін барын салды. Күн-түн демей еңбек етуге, тер төгуге тура келді. «Әсіресе, 1995-97 жылдардағы қаржы дағдарысы күллі Қазақстанға ғана емес, әлем елдеріне де ауыр соққанын көпшілігіміз білеміз. Мен басқаратын кәсіпорынның да шаңырағы шайқалуға шақ тұрған. Біздің Президентіміз Нұрсұлтан Назарбаев көреген кісі ғой. Халықтың маңдайына жаза салған бірегей перзент дер едім. Сарабдал саясаты сондай алағай да бұлағай заманнан халықты аман-есен алып шықты. Біз де Елбасының жол көрсетуімен ірге бекітіп, еңсемізді түзедік. Барша қазақ, тіпті, әлем елдері біздің басшымызға қарыздар. Өйткені, Нұрсұлтан Әбішұлы жер бетіндегі тыныштықты, тұрақтылықты сақтауға көп ықпал етті, күш салды», деп иек астындағы ғасырдың соңғы жылдарындағы қиындықты есіне алды ол. Бетон өнімдерін шығаратын «Стройконструкция» АҚ Виктордың ұзақ жылғы тәжірибесінің, білім-біліктілігінің арқасында кадрларының негізін, аппараттарын сақтап қалғанын және дағдарыстан қарызсыз шыққанын баса айтуымыз керек. Қандай тоқырауда да жұмысшыларын нәпақасыз қалдырмады. Комбинат шағын қуатпен жұмыс істесе де, мамандарды қысқарту болған емес. Қандай жағдайда да қызметкерлерді әлеуметтік қорғаудан шектеген емес. Қайта жыл санап кадрлар санын ұлғайта түсті. Виктор Буллер өнімдер сапасын да назардан тыс қалдырған жоқ.Елордаға еңбек сіңірген
Бүгінде алып мекемеде сегіз жүзге жуық жұмысшы қызмет атқарады. Олардың барлық жағдайы жасалған деуге әбден болады. «Әрқайсысының қуаныштарын ескереміз, мерейтойларын атаусыз қалдырмаймыз. Еңбек өтілі жоғары мамандарды демалыс орындарына жіберу дәстүрімізге айналған. Ең ақыры, жұмысшылардың түскі асы да тегін. Жұмысқа қатынайтын көліктердің де мәселесін оң шешкенбіз», дейді комбинат директоры. Тіпті, «Стройконструкция» АҚ-тың жанында дүкен, асхана, наубайхана, медициналық пункт, аяқ киім жөндеу шеберханасы да бар екен. Байырғы Целиноград қазақтың астанасы болды. Күллі жұрттың көзін сүріндірген көркем шаһардың дамуына, өркендеуіне алғашқы қазығы қағылғаннан, кешеге дейін кейіпкеріміз өзінің үлесін қосып келеді. Сөз басында айтқан «Астана қаласының құрметті азаматы» атағын сол үшін де алған. Мақтана жеткізейік, елордадағы «Интерконтиненталь» қонақ үйі, «Алатау», «Қазақстан» спорт сарайлары, «Ащысай», «Есіл» тұрғын үйлері, Әскери-патриоттық мұражайы, Есілдің қос қапталын жалғайтын көпірлер, «ҚазМұнайГаз» ғимараты, «Хан Шатыр», «Мега», «Синема-Сити», «Думан» сауда және ойын-сауық орталықтары, астаналық цирк, Тұңғыш Президент – Елбасы атындағы әскери университет, «Алау» мұз айдынының, «Сарыарқа» велотрегі, Ұлттық академиялық кітапхана, «Шабыт», Оқушылар сарайы, №1,2 қалалық ауруханалар, «Бәйтерек» монументі, «Тәуелсіздік», «Бейбітшілік және Келісім сарайлары», «Нұр-Астана», «Әзірет Сұлтан» мешіттері, «Астана Опера» опера театры, Назарбаев Университет, Қорғаныс, Ауыл шаруашылығы, Қаржы министрліктері, тіпті, Ақорда сынды маңызды ғимараттардың құрылысына Виктор Буллер басқаратын мекеменің өнімдері пайдаланылды.Еселі іс елеусіз қалмайды
«Стройконструкция» АҚ уақыт озған сайын ісін жандандырып, ауқымын кеңейтіп келеді. Өйткені, соңғы жылдары құрылыс материалдарына деген сұраныс күрт артуда. Біз жылына 300 мың текше метр темір-бетон өндірсек, 50 мың текше метр бетон өнімдерін әзірлейміз. Біз өндірген тауарлар еліміздің Павлодар, Қостанай, Петропавл, Оңтүстік Қазақстан сынды өңірлеріне жеткізіледі. Мұны жұмысшылардың ерен ерлігі, маңдай терлерінің жемісі деу керек», дейді мекеме директоры. Виктор Буллердің табысты еңбегі елеусіз қалған емес. Кеудесінде «Құрмет», «Ұлттар достығы» орденьдері жарқырайды. «Еңбек ардагері» медалімен, «Астана», «Астананың 10 жылдығы» мерекелік медалімен марапатталған. «Қазақстанның құрметті құрылысшысы» төсбелгісі тағы бар. Жеке бөлмесінде алғыс хаттары мен грамоталары самсап тұр. Жетпістен асса да аяғын үзеңгіден үзбеген азаматтың өмірі мен еңбек жолы жас буынға үлгі боларлықтай. «Ғұмырымның тек ат үстінде өтіп келе жатқанына қуанамын. Елімнің, әсіресе, Астананың әр жетістігі, мұндағы қызу тіршілік, адамдардың, замандастарымның жарқын болашаққа ұмтылысы мені жасарта түседі. Соларға қарап жігерімді жани түсемін», дейді Виктор қарт. Көптің тілеуі де сол, ақсақал аттан түспесін! Асхат РАЙҚҰЛ, «Егемен Қазақстан»