Кез келген елдің бағдарлы болашағын айқындайтын тарихи кезеңдері болады. Қазақ халқы үшін жаңа тарихтың жаңа парағының ашылған кезеңі – Тәуелсіздікке қол жеткізіп, егемен ел атанған тұс. Сол уақытта халық алдында шешуді қажет ететін күрделі де қиын мәселелер тұрды. Мемлекет басшысы Нұрсұлтан Назарбаев күрделі саяси-экономикалық мәселелерге қарамастан, жастар саясатын назардан тыс қалдырған жоқ. Яғни, сонау 1991 жылдан бастап, жастар саясаты мәселесіне ерекше зейін қойды, соның нәтижесінде сол жылдары Жастар ісі жөніндегі комитет құрылды.
Елбасының 1993 жылғы 17 желтоқсандағы Жарлығымен Қазақстан Республикасы Жастар ісі, туризм және спорт министрлігінің, ал 2012 жылы ел Үкіметінің 2012 жылғы 29 маусымдағы қаулысымен еліміздің Білім және ғылым министрлігіне қарасты Жастар ісі жөніндегі комитетінің негізі қаланды. Мұндағы негізгі мақсат – жастардың азаматтық, әлеуметтік дербес тұлғалық қалыптасуын жүзеге асыру үшін қажетті құқықтық, экономикалық, ұйымдастырушылық жағдайларды жасау. Жастардың құқықтары мен бостандықтарының сақталуын қамтамасыз ету.
Сонымен, жастар саясаты төңірегінде сөз қозғамас бұрын, Қазақстандағы жастардың жалпы санына шолу жасасақ. Статистикалық мәліметтер бойынша, олар қанша?
2015 жылдың басында республика бойынша 14 пен 29 жас аралығындағы жастар саны 4 миллион 206 мыңнан астам адамды құраса, оның 2 миллион 376 мыңға жуығы – қала, 1 миллион 830 мыңнан астамы – ауыл жастары.
Жастарды толғандыратын мәселелер қай кезде де болған. Солардың бірі – жұмыссыздық. Бүгінгі таңда жұмыссыздық біздің елімізде ғана емес, әлемнің дамыған алпауыт елдерінде де шешімін таппай келе жатқан мәселе екені жасырын емес. Мысалы, жұмыссыз жастардың саны 2015 жылы 4,5% болса, 2016 жылдың екінші жарты жылдығында 4,2%-ды құраған. Ал қазір Қазақстандағы жұмыспен қамтылған жастар саны – 2,1 миллион, жұмыссыз жастар саны – 95,6 мың адам. Бұл жұмыссыздық көрсеткішінің жылдан жылға төмендеп келе жатқанын көрсетеді. Мұндай оң үдеріске себеп жетерлік. Ол үшін, ең алдымен, жастардың өзі жүйелі түрде білім алып, қоғамдық жұмыстармен белсенді түрде айналысуы керек. Бұл ретте, мемлекет тарапынан жастарды жан-жақты қолдайтын түрлі бағдарламалар мен жобалар жеткілікті. Мұндай жоба-бағдарламалар, әсіресе, жастар саясаты тетігін мықтап бекіту мақсатында қолға алынған. Мәселен, 2012 жылдан бастап, Қазақстанның барлық өңірінде Жастар саясаты жөніндегі басқармалар құрылды.
Ал 2013 жылғы 27 ақпанда «Қазақстан-2020: болашаққа жол» Қазақстан Республикасы мемлекеттiк жастар саясатының 2020 жылға дейiнгi тұжырымдамасы мақұлданды. 2015 жылы 2020 жылға дейінгі мемлекеттік жастар саясаты тұжырымдамасының бірінші кезеңі сәтті аяқталды. Соның нәтижесінде, жастар ресурстық орталықтарының жұмысы кеңейген. Қазіргі уақытта республика бойынша жастар ресурстық орталықтарының саны 198-ге жетіп, штаттық саны аймақтар бойынша 1716 адамды құрады. Бұдан бөлек, жастар ісі жөніндегі кеңестер жұмысы да қарқын ала түсіп, әкімдер бұл кеңесті жеке өздерінің басқаруына алды. Бұл да атқарушы биліктің жастарға деген оң көзқарасын білдірсе керек. Бүгінде кәсіпорындар мен жоғары оқу орындарында, колледждерде барлығы 984 адамды құрайтын жастар ісі жөніндегі комитеттердің тетігі іске қосылған. Олардың ішінде жоғары оқу орындарында – 118, колледждерде – 697, кәсіпорындарда 169 азамат еңбек етеді.
Жалпы, жастар саясатын іске асыру барысында үкіметтік емес секторлармен, жастар ұйымдарымен және жастардың өздерімен тікелей қарым-қатынас жасау өркениетті қоғамға аяқ басқан елдердің тәжірибесіне айналып келеді. Бүгінде бірнеше белсенді, үкіметтік емес жастар ұйымдарының жұмыстары жолға қойылған. Олардың негізгілері мыналар: «Жас Отан» жастар қанаты республикалық қоры», «Қазақстан жастар Конгресі» заңды тұлғалар бірлестігі, республикалық «Жасыл ел» жастар еңбек жасақтары, «Балалар мен жасөспірімдердің «Жас Ұлан» республикалық бірыңғай ұйымы», «Ұлттық волонтерлік желі» заңды тұлғалар бірлестігі, «Ұлттық Дельфийлік комитеті» корпоративтік қоры, «Қазақстан КВН одағы» республикалық жастар қоғамдық бірлестігі, «Қазақстан студенттерінің Альянсы» республикалық студенттік қозғалысы.
Қазіргі таңда жастардың біліктілігін арттыратын «Жастардың кадрлық резерві», отансүйгіштікке тәрбиелейтін «Жастар – Отанға», өнерлі жастарды қолдайтын «Ұлттық Дельфий ойындары» бар. Мәселен, биылдан бастап Ұлттық Дельфийлік ойындарға мүмкіндігі шектеулі жастар да қатысып, өз өнерлерін көрсетуге мүмкіндік алды. Сонымен қатар, жастардың сан қырлы көшбасшылық қасиеттерін ашатын «Жайдарман» көңілді тапқырлар клубы» сынды жобалар іске асырылып келеді.
Ел аумағында «Жасыл ел» бағдарламасы да сәтті жүзеге асырылуда. Осыдан 10 жылдан астам уақыт бұрын қолға алынған бұл бағдарлама жазғы уақытта жастардың демалысын тиімді өткізіп, қосымша қаржы табуын қамтамасыз етіп келеді. Мәселен, «Жасыл ел» жобасы бойынша биылғы жылы қосымша ақыны екі есеге дейін арттыру мәселесі қарастырылып, соның нәтижесінде бұл қаражат 35 мың 394 теңгеге жеткен. Жалпы, «Жасыл ел» бағдарламасын жүзеге асыру кезінде 200 мың адам жұмыспен қамтылып, 100 гектардан аса жер өңделіпті. Бүгінде «Жасыл ел» жастар еңбек жасақтары еліміздің «Нұрлы жол» бағдарламасы бойынша салынатын индустриялық нысандарын, ЭКСПО қалашығын тұрғызуға да атсалысуда. Бұдан бөлек, 2015 жылдан бастап еңбекпен қамтылған сарбаздар саны екі есеге, яғни 12 мыңнан 24 мыңға дейін артқан. Бұдан бөлек, сарбаздардың өтінімімен жұмыс кезеңі 2 айға ұзартылған. Әрине, мұндай шаралар өз нәтижесін бермей қоймасы анық. Себебі, олардың барлығы демалыс уақыты кезінде жастарды жұмыспен қамтуға септігін тигізері сөзсіз.
Жастар саясаты төңірегінде бүгінге дейін атқарылған жұмыстарды одан әрі жандандыру мақсатында биылғы жылдан, дәлірек айтсақ, 2016 жылдың 13 қыркүйегінен бастап Қазақстан Президентінің Жарлығымен жастар саясатының қызметі еліміздің Дін істері және азаматтық қоғам министрлігінің қарамағына берілді. Сол себепті, Жастар саясаты департаменті қазір осы министрлікте өзінің жұмысын жалғастыруда. Бұл департамент Ведомствоаралық үйлестіру, Әдістемелік қамтамасыз ету және халықаралық қатынастар, Жастардың әлеуметтік жобалары, Жастар ұйымдарымен әрекеттесу басқармаларынан құралады. Алдағы уақытта мемлекеттік жастар саясатын жүзеге асырудың кезеңдік сипаттағы іс-қимылдары бірнеше негізгі бағыттарды басшылыққа алатын болады. Олар: жастардың құқықтары мен бостандықтарының сақталуын, білім, еңбек және жұмыспен қамту салаларындағы кепілдіктермен қамтамасыз ету, жастардың кәсіптік, рухани және дене тәрбиесінің дамуына жағдай жасау, жас таланттарды қолдау мен шыңдау, жастарға әлеуметтік көмек көрсету мен қазіргі жағдайға бейімделу жүйесін қалыптастыру, балалар мен жастар бірлестіктерін дамытуға жәрдемдесу.
Қазіргі таңда Қазақстан Республикасы Президентінің жанындағы Жастар саясаты жөніндегі кеңес жұмысы мейлінше пысықталуда. Бұл ретте, Жастар саясаты департаментінің Кеңестің құрамына орталық мемлекеттік атқарушы органдардың бірінші басшыларын қосу туралы ұсынысы қолдау тапты.
Қазақстанның болашақ лидерлерінің рухани жетілуіне, олардың қоғамда өз орындарын табуына ықпал ететін маңызды іс-шаралар мұнымен түгесілген жоқ. Бүгінде Бүкіләлемдік банкпен арадағы Келісімді іске асыру бойынша жастар корпусын дамыту жобасын жүзеге асыру туралы жұмыстар да жүргізілуде. Бұл ретте, 8,5 мыңнан аса жас азамат, оның ішінде әлеуметтік жағынан әлсіз қорғалған жандар, сондай-ақ, 100-ге жуық жастар ұйымдары жобаны жүзеге асыруға атсалысатын болады. Бұл жоба алдағы уақытта Алматы, Қарағанды, Павлодар және Оңтүстік Қазақстан облыстарынан бастау алмақ. Осыған байланысты жобаны басқаратын арнайы топ құрылып, Бүкіләлемдік банкпен бірге құжаттары қаралып жатыр. Бұл да еліміздегі жастардың әлеуетін арттырып, жұмыссыздықпен күресуге өз септігін тигізуі мүмкін.
ХХІ ғасыр – білім ғасыры. Бұл ретте, бірінші кезекте мемлекеттің, ондағы жастардың білім сапасы алдыңғы лекке шығары сөзсіз. Мәселен, Жастар дамуының жаһандық көрсеткішінің қорытындысы бойынша 2016 жылы Қазақстан 170 елдің ішінен 61-орынға көтерілгенін айтқанымыз жөн. Яғни, бұл сатыда Қазақстан Түркиядан (62-орын), Ресейден (110-орын), Қытайдан (118-орын) еңбекпен қамтылуы, саяси және азаматтық белсенділігі жағынан алға шықты.
2016 жыл
Елдер
1
Германия
2
Дания
3
Австралия
4
Швейцария
5
Ұлыбритания
61
Қазақстан
62
Түркия
110
Ресей
118
ҚХР
Барлығы: 170 ел
Алайда, қазір тоқмейілситін кезең емес. Сондықтан Қазақстан жастары осы көрсеткішпен тоқтап қалмай, бұдан да жоғары деңгейге қол жеткізу керек. Ол үшін жастардың алдында бұрынғыдан да білімді, белсенді болу міндеті тұр.
Ал бұл ретте, жастарға қатысты өзекті мәселелерді шешу жолдарын қарастыру мәселесі де өзекті бола түсетіні сөзсіз. Мұндайда таптырмайтын оң әдіс-тәсілдердің бірі – белсенділікті, жауапкершілікті қалыптастыруға әрі қамтамасыз етуге мүмкіндік беретін форумдарды өткізу. Міне, осы орайда, 2015 жылғы 9 ақпандағы «Мемлекеттік жастар саясаты туралы» Заңның 20-бабына сәйкес, биылғы жылдың 29 қарашасы мен 1 желтоқсан аралығында Республикалық жастар форумы өткізілді. Оған Мемлекет басшысы Нұрсұлтан Назарбаев қатысты. Мұндағы негізгі ой – ел Тәуелсіздігінің 25 жылы ішінде жастардың жетістіктері мен жастар саясаты аясында атқарылған жұмыстарды көрсету, ел жастарын «Қазақстан-2050» Стратегиясының міндеттеріне жету жолында жұмылдыру, оларды «Мәңгілік Ел» құндылықтары аясында біріктіру, сондай-ақ, мемлекеттік органдар мен жастар ұйымдарының арасындағы қарым-қатынасты жалпыұлттық деңгейге жеткізу. Ол үшін олардың ортасында үнқатысу мен байланыс орнату, мемлекеттік жастар саясатын іске асыруды талқылау мен оны жетілдіру бойынша ұсыныстар әзірлеу.
Бұдан бөлек, Ұлт жоспары – бес институттық реформаны жүзеге асыру жөніндегі «100 нақты қадам» аясында «Нұрлы болашақ» ұлттық жобасын әзірлеу мен іске асырудың 89-қадамы – «Біртектілік пен бірлік» бағыты бойынша жұмыстар да қолға алынып келеді. Сонымен қатар, 2016-2020 жылдарға арналған «Қазақстан-2020: болашаққа жол» Мемлекеттік жастар саясаты тұжырымдамасының екінші кезеңін жүзеге асыру бойынша іс-шаралар жоспары мүдделі мемлекеттік органдармен және үкіметтік ұйымдармен бірлесіп әзірленді. Аталған іс-шаралар жоспары 10 бөлімнен, 73 тармақтан тұрады. Қазірдің өзінде оның 22 тармағы орындалды. Жалпы, Тұжырымдаманы іске асырудың екінші кезеңінің негізгі мақсаты – жастарды табысты әлеуметтендіруге бағытталған мемлекеттік жастар саясатының тиімді моделін қалыптастыруды аяқтау.
Мемлекет басшысы Нұрсұлтан Әбішұлы Назарбаев өзінің бір сөзінде: «...Ата тарихын, ана тілі мен түп тамырын білмей тұрып, нағыз патриот болу мүмкін емес», – деген еді. Ендеше, Елбасы сенімін ақтайтын азаматтар – білікті де, білімді жастар.
Ғабидолла ОСПАНҚҰЛОВ,
Дін істері және азаматтық қоғам министрлігі Жастар саясаты департаментінің директоры