қоғамдық қатынастар жүйесін түбегейлі өзгертеді
«Қазақстан-2050» стратегиясындағы Елбасымыздың сөзімен айтар болсақ, «болашағымыздың бағдаршамы, ұлтты ұйыстырып ұлы мақсаттарға жетелейтін идея бар. Ол – Мәңгілік Ел идеясы». Мемлекет басшысы мұнда татулықты, ішкі тұрақтылықты қалыптастыруды, елімізді мекен етіп жатқан өзге ұлт өкілдеріне құрметпен қарауды меңзеп отыр.
Мәңгілік Ел құндылықтары еңбексүйгіштікке, адалдыққа, отаншылдыққа, патриотизмге, ұлттық салт-дәстүрлерімізді үлгі етуге баулиды. Ал Мәңгілік Ел болу дегеніміз – ешқашанда бөгденің бодандығына түспейтін, халықтығын, ұлттығын, елдігі мен мемлекеттігін әрқашанда әспеттейтін, бар заманда ұлы мен қызының бағы басында тұратын, барша халқының бақыты баянды болатын ел құру.
Мәңгілік ел әрбір азаматымыздың отаншылдық сезімін еселеп, қазақ елінің азаматымын деген жауапкершілікті жүктеп, бойына мақтаныш дарытады. Елбасымыздың «ана тіліміз Мәңгілік елімізбен бірге мәңгілік тіл болады. Оны даудың тақырыбы емес, ұлттың ұйтқысы ете білгеніміз жөн» деген ойы бізді жігерлендіреді. Баршамызды мазалайтын тіл турасындағы сауалдардың жауабы: Мәңгілік Ел идеясының үлкен бір арқауы мемлекеттік тілді дамытуда жатқанын жақсы білуіміз керек. Себебі, тілі өркендемеген ел ешқашан ұлттық мемлекет болып салтанат құра алмайды. Тіл бірлігі болмаса не мемлекет, не тәуелсіздік баянды болмайды. Тарихи отанына деген сүйіспеншілігін, мемлекет құраушы ұлтқа деген құрметін қазақ жерін мекен еткен әрбір этнос өкілі мемлекеттік тілден бастауы керек. Осы тұрғыдан түсінісу, бір тілде сөйлесу этносты этносқа жақындастырып, тілімізбен бірге салт-дәстүрімізді бойларына сіңірген олар ұлтымызға сіңісіп, жарасымды болады. Мемлекетіміз Мәңгілік Қазақ Елі деп аталса, бүкіл еліміздің, халқымыздың рухы көтерілмей ме?
Біз Қазақстан халқының достығын еліміздің баға жетпес байлығы деп бағалаймыз. Себебі, түрлі ұлт өкілдерінің өзара ынтымағы, заң алдындағы теңдігі болмаса, мемлекеттің өркендеуі болмайды.
Еліміздің бүгінгі шыққан биігінде, әлем елдері алдындағы беделінің өсуінде, сөз жоқ, өзге этнос өкілдерінің де үлесі шексіз. Мұны Елбасымыз: «Біздің тәуелсіздігіміздің тарихы – бұл барлық этностар достығының жылнамасы. Біздің елімізді өркендетуге Қазақстанда өмір сүріп жатқан барлық этностық топтардың өкілдері ат салысып келеді», – деп атап өткен-ді.
Елбасымыз «Нұр Отан» партиясының кезекті съезінде Мәңгілік Ел болып қалудың, үздіксіз ілгерілеудің 5 реформасын ұсынған болатын. Сөз жоқ, Қазақстан сарабдал көшбасшысының арқасында әлеуметтік-экономикалық, саяси және әкімшілік реформалардың ауқымды жолын еңсергені белгілі. Бірақ, тоқмейілсіп тоқтап қалуға болмайды. Президентіміз ұсынған 5 реформа локомотив іспетті барлық мемлекеттік бағдарламалардың тиімді жүзеге асуын қамтамасыз етуде.
Бірінші реформа негізінде мемлекеттік қызметтің қазақстандық моделі қалыптасты. «А» және «Б» корпустары түзілді. Мемлекеттік қызметте өсетін әрбір басшы төменнен бастап, барлық басқарушылық сатыларын басып өтуі тиістігі бекітілді. Бұдан бөлек, Мемлекет басшысы этностық тегіне, қоғамдық-әлеуметтік орнына қарамастан, барлық талапты, дарынды, мақсатты адамдарды мемлекеттік қызметке тарту жөнінде тапсырма берді. Ал екінші реформа – Қазақстан Республикасының барлық заңының шынайы түрде қызмет атқаруына бағытталды. Жемқорлық пен жабық келісімдер, шешімдер шығара салу қоғамды іштей ірітетіні бесенеден белгілі. Сот жүйесінің әлсіз тұстарының барлығын күшейтуге арналған бұл реформа тұтастай республика халқының тыныш та бейбіт өмір сүруінің кепілі болмақ.
Үшінші реформа – елімізді дамыған елдердің қатарына қосатын маңызды фактор – мықты экономикамыздың болуына арналды. Индустрияландыру, өңдеуші сектор, аграрлық сектор, инвестиция тарту, экспортқа тауарлар шығару салаларына мемлекеттік қолдау жасалатыны нақтыланды. Түйіндей айтсақ, үшінші реформа экономиканы әртараптандыруға бағытталып отыр. Бүгінде осы реформа негізінде атқарылған жұмыстар бойынша тиісті мекемелер қолға алған жобалары бойынша халық алдында есеп беріп жатқанынан хабардармыз.
Төртінші реформа – біртектілік пен бірлік. Яғни, бірыңғай болашақ ұлтты қалыптастыру. Шындығында, бүгінгідей тұрақсыз саяси күштердің кейбір әрекеттерінен туындап жатқан жағдайларда ұлттық ынтымақ пен қоғамдық келісімді сақтау саясаты ерекше маңызға ие. Алыстан болжайтын Елбасымыз осы бағытта Қазақстанның халықаралық деңгейде мойындалған өзіндік үлгісін қалыптастырды. Ортақ Отаны – Қазақстан болған барша ұлт пен ұлыс өкілдері осы реформа негізінде ынтымақ пен жарасымдықтарын одан сайын берік ете түсері ақиқат. Мемлекет басшысының өз сөзімен айтсақ: «Барлық азаматтар құқықтың бірдей көлемін пайдаланатын, бірдей жауапкершілік жүгін арқалайтын және тең мүмкіндіктерді иеленетін болады».
Жалпыхалықтық реформаның бесіншісі – транспарентті және халыққа есеп беретін мемлекетті құру. Мемлекеттің қуаты мен күштілігі халықтың еңбегімен құралады. Сондықтан мемлекет тарапынан орындалып жатқан ауқымды, игілікті істердің барлығының есебі анық көрініп тұруы керек. Қазіргі кезде Елбасы ұсынған бесінші реформаның негізінде Қазақстан қоғамының барлық саласы кезең-кезеңмен біртіндеп, халық алдындағы жариялылыққа бейімделіп жатыр. «Қуатты мемлекет қалыптастырып, либералды дамыған қоғам құру үшін елдің 40-50 жылды қамтитын тұрақты алға жылжуы қажет. Біз де соған бара жатырмыз. Мен ұсынған шаралар Қазақстандағы қоғамдық қатынастар жүйесін түбегейлі өзгертеді» деген Мемлекет басшысының жоспары көп күттірмей оң нәтижелерін көрсетері анық.
Мақсатқа қол жеткізу үшін ҚР Президенті жанынан бес бағыттағы реформамен түбегейлі айналысатын Жаңғырту жөніндегі ұлттық комиссия құрылып, әр реформаның тиісті мекемелер бойынша жүзеге асырылуы жіті қадағалануда. Себебі, әлемдік дамыған елдердің барлығы да даму жолын айқындап алып, ішкі-сыртқы жағдайларға түбегейлі реформа жасағаннан кейін ғана дамудың даңғыл жолына түскен. Президент ұсынған реформалар тәуелсіз еліміздің тәуекелді өткелі болып, қуатты мемлекетке айналуымызға, Мәңгілік Ел болып қалуымызға алғышарт болып табылады. Түйіндей айтсақ, Елбасымыз ұсынған тарихи 5 реформа – жаһандық түйткілді жайттардан шығатын қазақстандық модель.
Бүгінгі біздің басты парызымыз – Алаш қайраткерлерінің армандаған Мәңгілік Ел мұратын жас ұрпаққа насихаттау. Қасық қаны қалғанша шайқасып, атамекенінің сынық сүйем жерін дұшпанға бастырмай, кеудесімен қорғаған батыр бабаларымыздың, қаһарман хандарымыздың, елдің бірлігін даналығымен ұйытқан би-шешендеріміздің ерлік істерін жастарға үлгі ету. Сонау сақ-ғұн, түркілер дәуірінен жеткен алтын аңыздарымен әшекейленген қазақ елінің Елтаңбасын, Туын, Әнұранын ұлықтау. Қазақстанның кең байтақ шекара шебін кірпік қақпай күзетіп тұрған ержүрек жауынгерлерімізге жігер беретін, намысын қайрайтын толғаулар мен дастандар жазып, тарих беттерінде қалдыру.
«Мәңгілік Ел» – шынында да ұлы мақсат. Қазақ еліне көз алартып, қызғанышпен қарайтын жат пиғылдардан елімізді қорғау басты парызымыз. Бүгінде жаһан ғалымдары қазақ халқының басқа этнос өкілдерімен бейбіт өмір сүретін ерекше қасиетін толеранттылықтың, яғни төзімділіктің феномені ретінде әлем халқына үлгі-өнеге етіп келеді.
Қазір қарқынды түрде жүзеге асырылып жатқан 5 реформа мен оны іске асырудың 100 қадамы барша қазақ жерін мекендеген ұлт пен ұлыс өкілдеріне тыныш өмір, білімді келешек, бәсекеге қабілетті іскерлікті қамтамасыз етеді. Елбасымыз бекіткен Ұлт жоспарын жүзеге асыру арқылы әр азаматтың отаншылдық сезімін еселеп және мемлекетіміздің барлық құрылымдық салаларын түбегейлі өзгертіп, ынтымаққа ұйыған, шыншыл да ашық қоғам құрып, Мәңгілік ел болудың даңғыл жолына түсетініміз сөзсіз. Ең бастысы, бүгіннен де нұрлы, бүгіннен де кемел болашағы бар Мәңгілік Қазақ елі өркениетті, дәулетті ел қатарында болып, әлем сахнасында ұлттық мемлекет ретінде салтанат құратынына сенеміз.
Қазақбай ҚАСИМОВ,
Қазақстан халқы Ассамблеясының мүшесі, философия ғылымдарының докторы, профессор