Бір қарағанда, аңсарлы Азаттығымызға қолымыз жеткені күні кеше ғана сияқты. Десек те, сол жылы туған сәби бала бүгін тепсе темір үзетін 25-тегі өндір жас жігіт. Ал біздің Тәуелсіздік бесігінде тербелген, қилы дауылдарға төтеп берген Қазақстанымыз жасампаз жас мемлекет. Осы жайдың мәніне тереңірек бойласақ, еліміздің 25 жылда 25 ғасырға татырлық тарау-тарау тағдырлы тәуекел жолын абыроймен жүріп өткеніне сүйсінеріміз де рас. Қазақ елі халқымыздың жарым ырыс-ырымындағы жиырма бестің барлық жақсылықтарымен жасанып, жұлдызы шырқау биікте жарқырап, дүйім дүниеге даналығымен танылды, даралығымен айшықталды.
Осы даралықтың бір парасы, елдік болмысымыздың ажар-келбеті еркіндік жылдарында бой көтеріп, сақи сап түзеген еңселі ескерткіштер арқылы да паш етіліп жатқанын қаперге алмай тұра алмаймыз. Себебі, бұл да бір бақ-берекеміздің баяндылығын аңғартатын ғанибет жағдай. Бұл арадағы ең бір ғажабы сол, әлемнің Америка, Англия, Франция, Қытай, Түркия сынды алпауыт елдері өздерінің дара кескінін кейіптейтін бедер-белгілерін, нышанды жәдігерлерін жүздеген жылдар бойы тірнектеп түзіп келсе, Қазақ елі жалпақ жаһанға жайып салар жан дүниесін, жарқын дәстүрлерін, бекзат болмысын, тектілігі мен беттілігін ширек ғасыр жүзінде ғана байыптап та баяндап, неше сан кешенді һәм кенен ескерткіштермен өрнектеп өріп көрсете алды.
«Тәуелсіздігіміздің тал бесігі Алматы болды» деген сөзді Елбасымыз әрдайым айтып жүреді. Елдігіміз бен еркіндігімізді алғаш сәулет өнері тілінде айшықтап бейнелеген шын мәніндегі толағай да толымды ескерткіш кешені – «Тәуелсіздік» монументі нақ осы ұлық мерекеміздің бес жылдығына орай Алатау баурайындағы ару қалада асқақтады. Шот-Аман Уәлиханов жетекшілік еткен сәулетшілер мен мүсіншілер тобы монументті жасау барысында төл тарихымыз бен тәуелсіздік мұраттарын шебер тоғыстырып, бірегей көркем шешім тапқан. Көк аспанға шаншылған орталық сынтастың ұшар басында ойылып бәдізделген Қазақстанның Елтаңбасы, оның үстінде қанатты барыс. Ең жоғарыда – жаралғандай жасыннан, бес қаруын асынған, жауы болмас басынған, қолындағы қыран құсы талпынған, әлемге «Алтын адам» деп танылған дулығалы жас сарбаз. Монументтің қапталында Желтоқсан көтерілісі мен Тә- уелсіздік жарияланғанға дейінгі қазақ тарихынан сыр шертетін бедер-бейнелер. Ал дәл жанында дала данасы – ақылгөй Абыз ата мен жүрегі мейірімге толы ақ жаулықты Жер-ана, олардың алдында құлыншаққа мінген ұл мен қыз мүсіндері. Осылайша Монументтің мазмұнындағы ұлттық рух пен сыр-сипат осынау толағай туындыға деген халық құрметін арттыра түскені де ақиқат.
Елдігіміз бен ерлігімізді, ғасырлар қойнауынан тамыр тартқан мерейлі мемлекеттігімізді паш еткен «Тәуелсіздік» монументінің осыдан тура 20 жыл бұрын, 1996 жылғы 16 желтоқсанда болған ашылу салтанатына Елбасы Нұрсұлтан Назарбаев пен тәуелсіздігімізді бірінші таныған Түркия президенті Сүлеймен Демирел қатысты. Содан бері «Алтын адам» ескерткішінің айналасы алматылықтар мен оңтүстік астана қонақтарының, жас жұбайлардың шуақ күлкісіне бөленбеген күні болған емес.
Алматыда кеңес жылдарында жалғызсырағандай күй кешкен хакім Абай мен ғұлама Шоқан ескерткіштерінің қатары Тәуелсіздігіміздің арқасында толыға берді, молыға берді. Ол ол ма, үш жылдан кейін Ордабасыда қазақтың бірлігін күйттеген Төле, Қазыбек, Әйтеке билер ардақталған ұлы жиын өтіп, ұлттық-мәдени қорық құрылған. Ал 1997 жылы тарих мінберіндей Ордабасы төбесінде Бірлік монументі бой түзеген еді. Ескерткіштерге айналып, еліне өршіл де елшіл рух сыйлаған Үш би бүгінгі бақ-берекелі ұрпағымен емен-жарқын жүздесіп, өркениет өріне шыққан қалаларымыз бен кенттерімізді аралап кетті десек те болғандай.
Әрине, Тәуелсіздігімізді дәріптейтін, айшықты бейнелейтін ең тамаша ескерткіш, ғажайып туынды – елордамыз Астана. Оның авторы қадірменді Елбасымыз екендігі де дүйім дүниеге мәшһүр. Жаңа астанамыздың көрік-келбеті келушіні де, көрушіні де тамсандырады. Орталығындағы бірегей сәулеттік ансамбль арман биігіне жетелейді, туған елің мен жерің, астана байтағың үшін мақтаныш сезіміне бөлеп мерейлендіреді. Бұл ансамбльдегі ең басты туынды Ақорда десек, оған жалғасып сәулеттік кешеннің арқау-өзегіне бір-бір жаһұт жауһардай болып тартылған «Бәйтерек», «Хан Шатыр», «Бейбітшілік және келісім» сарайы, «Тәуелсіздік сарайы», «Қазақ елі» монументі, «Мәңгілік Ел» қақпасы елдігіміздің, береке-бірлігіміздің дастандарындай өрнектеле өріледі, көңілімізді көкке өрлетеді. Бұл ғаламат ғимараттар мен еңселі ескерткіш кешендері Тәуелсіздігіміздің шежірелі сырын шертеді, жарқын тарих жасап жатқан жасампаз дәуіріміздің әуезді әуенін қалықтатады, егемен елдің өрелі өркениетін, жеңістері мен жемістерін жырғап паш етеді.
Тәуелсіз елдің барлық шапағат сәулесі, қасиет-киесі, даналығы мен саралығы, барша жақсылығы мен ар-ұяты Ақордаға жинақталған. Бағаналы басты ордамыздың сәулеті мен салтанатынан біз осындай сыр-сипатты аңғарамыз. Ақорда Қазақстан халқының баянды бақыты мен жарқын болашағының нышанды көрінісі, мемлекеттігіміздің ажырамас атрибуты десек, ақиқаты да сол.
Астанаға келген қонақтардың үлкені мен кішісі бірдей «Бәйтеректі» көруге асығады. Атауы да, жасауы да әр қазақтың жанына жақын, Тәуелсіздігімізбен үндес, Мәңгілікті көздеген мұратымызбен үйлес өнер туындысы, елорданың ең көрнекті ғимараттарының бірі һәм бірегейі де осы. Алтын күнге бой созған алып «Бәйтеректің» түйінді философиясы қазақ халқының жаңғырып қайта түлеуінің, өзгелермен терезесі тең мемлекеттілігінің, халықтық ұғымдағы биіктік пен тереңдіктің, кеңдік пен дарқандықтың белгісін білдіреді.
Айта кететін жайт, «Бәйтеректің» негізгі идеясы Нұрсұлтан Әбішұлының эскиз-нобайының негізінде өмірге келген. Қазақ аңызындағы қасиетті Самұрық құсы «Мәңгілік Ел» мұратына қарай самғап ұшып барады. Темірқазық нысана – тіршіліктің тірегі Бәйтерек. Ұшар басындағы ұяда өмір ұйығы алтын жұмыртқа – алып шар. Оның ішінде Астана алақандағыдай көрінетін аялы зал, ортасында 17 жапырақтан тұратын, 17 түрлі әлем діндерінің өкілдері қол қойған ағаш ғаламшар. Келушілер оның қасындағы Президент Нұрсұлтан Назарбаевтың алақан ізіне алақанын беттестіріп, жақсы ырыммен, жоралғы үмітпен сәт сайын суретке түсіп жатады. Тәуелсіздік ескерткішінде туындаған тағылымды дәстүр осындай. Ал «Бәйтеректің» 97 метрлік биігінен заманауи қаланың көркем көрінісі ашылады. «97» саны да кездейсоқ емес, ол елорда мәртебесінің Алматыдан Астанаға ауысып келген жылын меңзейді.
Елордамызды қазір «Мәңгілік Ел» қақпасынсыз көзге елестету қиын. Биіктігі 20 метрлік осынау сәулет нысаны Тәуелсіздіктің 20 жылдығы қарсаңында ашылды. Қақпаның қос қапталындағы Ақсақал мен Ана мүсіндері, қалқан мен тайқазан ұлттық киелі ұғымдармен астасады. Жасампаздық Мәңгілікті мұрат тұтқан ел астанасының тағы бір жарасымды да мағыналы символына айналды.
2009 жылы қатарға қосылған «Қазақ елі» монументі жалпы еліміз бойынша Тәуелсіздікке тәу етер ең елеулі ескерткіштердің біріне айналғаны анық. Бұл мәдени-сәулеттік, тарихи-мемориалдық кешен Қазақстанның досқа құшағы ашық адал ниетін, мемлекетіміздің бейбітшілік сүйгіш парасатты саясатын білдіреді. Орталық барельефтен Ата Заңның үстіне қолын қойып, ант беріп тұрған Тұңғыш Президент Нұрсұлтан Назарбаев пен оның сыртындағы, ол арқа сүйеген халық көрініс тапқан. Бұдан басқа, «Қаһармандық», «Жасампаздық» және «Болашақ» атты барельефтерде Қазақ елінің бүгінгі таңдағы кемел бейнесі жан-жақты ашылып көрсетілген. Осы идеялардың бәрі Қазақстан халқының тәуелсіздік алған кездегі шаттығын паш ететін «Бірлік» атты мүсіндік композициямен түйінделуі тіптен ғанибет.
Елбасының идеясымен атақты ағылшын сәулетшісі Норман Фостер пирамида пішінінде жобалап жасап шыққан «Бейбітшілік және келісім» сарайы, отандық сәулетшілер атқарған «Тәуелсіздік» сарайы сынды және басқа сәулеттік өнер туындылары елордамызды жылдан-жылға көркейте түсуде. Әсем Астана бүгінде әлем таныған Қазақстанның брендіне айналса, уақыт өткен сайын қатары толыға түскен еңселі еркіндік ескерткіштері тәуелсіз еліміздің бас қаласының да, басқа шаһарларының да көркіне көрік қосып, көңілімізді өсіруде. Жер-жердегі Тұңғыш Президент саябақтары да, Алматыдағы Желтоқсан оқиғасына арналған «Тәуелсіздік таңы» ескерткіші мен Тараздағы «Қазақ хандығы» монументі де осындай. Олар жай ескерткіштер емес, елдігімізді асқақтатқан, айбынымызды асырған, келісті келбетімізді танытқан Тәуелсіздігіміздің символдары. Ол ескерткіштер Тәуелсіз мемлекеттің идеясын білдіреді, халқымыздың Мәңгілікті көздеген ізгілікті мұрат-мақсатын айғақтайды. Осы қастерлі ескерткіштерде қасиеттеп бәдізделген Еліміз де, Еркіндігіміз де мәңгілік болсын деп тілейік!
Қорғанбек АМАНЖОЛ,
«Егемен Қазақстан»