Қаңтардың 30-ы күні Forbes журналына Қазақстан экономикасына, болашағына қатысты көлемді сараптама жарияланды. Біз мақаладағы негізгі ойларды оқырман назарына ұсынып отырмыз.
Еуразияның ортасында, табиғаты қатал, ұшы-қиыры жоқ далалы және таулы мекенде орналасқан Қазақстан – бай болғанымен, әлемге аса белгілі бола қоймаған ел. Дегенмен, Exxon компаниясының бұрынғы басшысы Рекс Тиллерсонды АҚШ-тың Мемлекеттік хатшысы етіп тағайындауға Конгресс келісім берсе, Қазақстанның танымалдығы арта түсуі мүмкін.
Бұл елде уран, мұнай және газ қоры мол. Бұрынғы Кеңес Одағы республикалары ішінде Қазақстан экономикасы тұрақтылығымен, инвестиция тартуға қабілеттілігімен ерекшеленеді.
Өткен аптада Астанада Сирия туралы келіссөздер болды. Башар Асад режімі мен Сирия қарулы оппозициясының өкілдері алты жылдан бері алғаш рет бас қосты.
Қазақстан көпвекторлы сыртқы саясат ұстанады, бұл бәрінен қазақ мүддесі жоғары дегенді білдіреді.
Қазақстан екі жылға БҰҰ Қауіпсіздік Кеңесінің мүшесі болып таңдалды. Президент Нұрсұлтан Назарбаев Кеңес мүшесі ретінде өз елі ИШИМ мен «Әл-Қаида» қаупімен күресуді мақсат ететінін айтты. Бұл Трамп пен Тиллерсонның позициясына жақын. Өйткені, олар АҚШ бизнесі үшін елде қауіпсіздік сақталуын қалайды.
Маусымда Астанада ЭКСПО-2017 көрмесі басталады. Қазақстан осылайша шикізат рыногынан басқа да салаларда жетістіктері бар алдыңғы қатарлы елдер қатарына қосылуды көздейді. 10 маусымнан 10 қыркүйекке дейін жалғасатын көрмеде негізінен экологиялық таза энергия көздері, жаңа құрылыс материалдары, жоғары технологияларға орын беріледі.
Тиллерсон Назарбаевпен 2016 жылдың маусымында Санкт-Петербургте өткен инвесторлар форумында кездесті. Кей мәліметтерге қарағанда, ол жүздесуде баға қолайлы деңгейге көтерілген кезде Exxon-ның Қазақстандағы жаңа мұнай кеніштеріне инвестиция салу мәселесі қозғалған. Мұнай баррелінің бағасы қазір $52. Былтыр бұл уақытта $35 болатын.
Exxon 20 жылдан бері Қазақстанда жұмыс істеп келеді. Рас, қазір Тиллерсонның компанияға қатысы болмауы мүмкін. Алайда, ол мұнай индустриясын назардан тыс қалдырмайды. АҚШ компанияларының Қазақстанда дамығанын ол неге жақсы көрмесін?
Қазақстан өкіметі тек мұнайға ғана сүйенгісі келмейді. Мұнайдың арзандауына қарай елдің экономикалық өсімі төмендеді. Алайда, мемлекеттік бюджеттің перспективасы және инвестициялық кредит рейтингі Бразилия және Ресеймен салыстырғанда жақсы.
Тиллерсонның Қазақстан жайлы білетіні көп болғандықтан, алдағы уақытта Вашингтон Астанамен қатынасқа ерекше мән бере бастауы мүмкін. АҚШ пен Ресейдің қарым-қатынасы жақсарған жағдайда оның әсері Қазақстанда сезілетін болады. Бұл ел – Еуразиялық экономикалық одақты құрушылардың бірі. Оның Ресей, Беларусь, Армения және Қырғызстанмен еркін сауда аймағы бар. БҰҰ Қауіпсіздік Кеңесінде дауысқа ие болды. Экономиканы әртараптандырғысы келеді. Және шет елден инвестиция тартуды қалайды.
ExxonMobil да Қазақстанда жұмыс істеп, пайда табуды көздейді. Мұнай бағасы көтерілген жағдайда, Каспий теңізіне инвесторлардың қызығушылығы қайта оянады. Мұнай $80-ге жетсе, Exxon және өзге де мұнай алпауыттары тезірек Қазақстанға барудың қамына кіріседі, дейді сала сарапшылары.
Қазақстан үкіметі биыл Қашаған мұнай кенішінен күніне 221 000 баррель мұнай өндіруді мақсат етіп отыр. Ал британдық Wood Mackenzie консалтингтік фирмасының жорамалы бойынша, Қашаған үшін күніне 154 000 баррель жақсы көрсеткіш. Дегенмен, Қазақстан шикізатқа негізделген экономика деңгейінде қалмау жолдарын іздеу үстінде.
Бүгінде Қазақстанға Қытай инвесторларынан да қаржы көп келіп жатыр. Еуропаның халықаралық қатынастар жөніндегі кеңесі Қазақстанның экономикалық өсімі инфрақұрылымдар мен аймақтық сауданың дамуына байланысты болады, дейді. Қытайдың «Бір белдеу және бір жол» бағдарламасы осы мақсатқа жетуге көмектеседі. Дүниежүзілік банк Қытай инвестициясы және мұнай бағасының көтерілуі нәтижесінде Қазақстанның ішкі жалпы өнімі 2016 жылғы 0,9%-дан биыл 2,2%-ға, 2018 жылы 3,7%-ға, ал 2019 жылы 4%-ға өседі деп болжайды. Бұған «Нұрлы жол» сияқты жобаларға жұмсалатын қаржының және болашақта Еуразияның қаржы орталығы болуы мүмкін «Астана» халықаралық қаржы орталығының қосатын үлесі көп болмақ. Экономиканың осындай ашықтығы арқасында Қазақстан Дүниежүзілік банктің Бизнес жасау жеңілдігі рейтингінде биыл 35-орынға көтерілді.
Дүниежүзілік банктің есебі бойынша, Орталық Азияға келетін шет ел қаржысының 80%-ы Қазақстанның үлесінде. Банк бұл елді инвесторлар үшін әлемдегі ең тартымды 20 елдің қатарына қосады. Өйткені, үкімет бүгінде инвестиция тартуға қатысты тәртіптерді қайта қарау үстінде.
Қазақ экономикасы жаңа технологиялар, ғылым мен техника негізінде дамуы, сөйтіп, табиғи ресурстарға сүйенбейтін бизнестің дамуына түрткі болуы тиіс, дейді Н.Назарбаев.
Қазақстанда бүгінде 475 колледж, 312 кәсіптік мектеп бар және әрбір төртінші студент техникалық мамандықтар бойынша білім алады.
«Біз Қытай мен Еуразия үшін логистика орталығы болғымыз келеді, – дейді Қазақстанның бұрынғы Сыртқы істер министрі Ерлан Ыдырысов. – Бұл жерде мәселе экономикалық дипломатияға қатысты. Біз мұнда халықаралық келісімдер жасалуы үшін қажет қолайлы саяси ахуал және заңдық шарттар жасаудамыз. Өйткені, біз халықаралық әріптестермен осында жұмыс істегіміз келеді. Меніңше, биыл әлем Қазақстан туралы көбірек білетін болады».