ХХVІІІ қысқы Универсиада ойындары спортшыларымыз ғана емес, еліміз үшін де үлкен сын болғалы тұр. Дүбірлі доданы аса жоғары деңгейде өткізіп қана қоймай, келген қонақтардың көңілінде еліміз туралы оң пікір қалыптастыруда волонтерларға, яғни еріктілерге де айрықша күш түсіп жатқаны анық. Осы орайда біз, Еріктілермен
жұмыс істеу департаментінің жетекші маманы, «Еріктілер лигасы» қоғамдық қорының жетекшісі Әзиз Оралбекұлы ҚАЖДЕНБЕКТІ әңгімеге тартқан едік.
– Әзиз, бәріміз көптен күткен қысқы Универсиада ойындарында тыным таппай зыр жүгіріп жүрген волонтерлар жұмысы жайлы кеңірек айтып өтсең...
– Қысқы Универсиада ойындарын тамашалауға келгендердің ең бірінші жолықтыратын адамы әлбетте, волонтерлар болмақ. Сондықтан, волонтерлар өз қызметін өте жоғарғы деңгейде атқаруы тиіс екені айтпаса да түсінікті ғой. Универсиада волонтерлары қазір 32 бағытта жұмыс атқаруда. Мәселен, қонақтарды әуежайда күтіп алу, шығарып салу қызметтерін атқаратын еріктілер бар. Спорттық жарыстар барысындағы жұмыстармен қатар, атташе қызметін атқаратын волонтерлар Универсиада аяқталғанша келген қонақтардың, делегаттардың қасында бірге жүреді. Яғни, сол қонақтардың көмекшісі де, досы да, жол көрсетушісі де, жанашыры да солар болмақ. Бұл бағытта жұмыс істейтін еріктілеріміз – міндетті оқу-жаттығудан өткен, ағылшын тілін өте жетік меңгергендер. Ағылшын тілін ғана емес, испан, жапон сияқты басқа тілдерді де меңгерген еріктілер әр елден келген қонақтарға жөн сілтеп жүрмек.
Сондай-ақ, еріктілер тобы баспасөз қызметі, медицина, Атлеттер ауылы, көрермендермен жұмыс, мәдени шаралар, делегаттарды, спортшыларды орналастыру, аккредитациялау, қауіпсіздік, басты ақпараттық орталық, компьютерлік жабдықтар, тамақтану, басқа да көптеген бағыттар бойынша жұмыс істеп жатыр.
Үш мың еріктінің жұмысына жауапты 150 үйлестіруші бар. Олар әр бағытқа жауап береді. Олар да бөлек тренингтерден өтті. Ең бастысы, патриотизм мен функционалдық бағыттарға айрықша көңіл бөлуге тырыстық. Өйткені, волонтерлар жарты жолдан жұмысты тастап кетіп қалмайтындай болуы керек.
– Жалпы, осы Универсиадаға волонтерлар таңдаудың қандай ерекшеліктері болды? Оларға ағылшын тілін білуден өзге, қандай басты талаптар қойылды?
– Қойылған талаптарға келсек, ең бастысы, волонтердың жасы 18-ден асқан болуы тиіс. Дегенмен, өтініш берушілер арасында Назарбаев зияткерлік мектебінде оқитын немесе РФММ мектебінің жоғары сыныптағы жасы 17-18-ге толған оқушылары да болды, оларды ата-аналарының рұқсаты бойынша алдық.
Ал екінші талабымыз – ағылшын тілі болса, үшіншісі – волонтерлар мінезінің ашық, жайдары, адамдармен тез тіл табыса білуі шарт болды. Аязды күндері 8-10 сағат далада тоңып жүрсе де, келген қонақтарға қонақжайлық танытып, жағымды көңіл-күймен жүре алатын жандарды іздедік.
Жалпы, волонтер болғысы келетіндерден 15 мыңға жуық өтініш түсті, солардың ішінен 3000 волонтерды қатаң талаптармен іріктеп алдық. Кейбір жандардың ағылшыншасы жақсы болғанымен, адамдармен қарым-қатынас жасай білу жағы кемшін түсіп жатса, кейбіреуі керісінше, ағылшын тілін орташа білгенмен, жайдары мінез жағынан басым түсті. Ондай мінез ерекшеліктері де ескерілді.
– Волонтерлардың басым санын қай оқу орнының студенттері құрады? Студент-жастардан өзге, ересек волонтерлар саны қанша?
– Рас, волонтерлардың басым көпшілігі студенттер. Еріктілер қатарына Алматы қаласындағы Абылайхан атындағы Шет тілдері университетінен, КИМЭП, әл-Фараби атындағы ҚазҰУ, Информациялық технология институты сияқты 38 жоғары оқу орны қамтылды. Соның ішінде, қыздар 60 пайызды, жігіттер 40 пайызды құрау арқылы қоғамда нәзік жандылардың көбірек белсенді екенін көрсетіп отыр.
Волонтерларды іріктеуде шаңғы тебу, сноубордта жүру сияқты қабілеттер де ескерілгендіктен, Спорт және туризм академиясының студенттері де алынды. Олар спортшыларға жайлы жағдай жасап тұрмақ. Мысалы, медициналық көмек бағытында С.Асфендияров атындағы Медицина университетінің жоғарғы курстарындағы ағылшын тілін білетін студенттер таңдалды.
Қазір волонтерлардың ең үлкені 78 жастағы Хилл Майкл деген канадалық азамат. Оның Алматыда тұрып жатқанына он бес жыл болған. Арамызда 50-60 жастан асқан еріктілер де баршылық. Оларды «Күміс еріктілер» деп атаймыз.
– 100 квота арнайы бөлінген шетелдік волонтерлардың міндеттері қандай?
– Иә, 100 квота шетелдік және тағы 100 квота еліміз облыстарынан келген аймақтық еріктілерге берілді. Дегенмен, шетелдік еріктілерден айтарлықтай көп көмек күтпейміз. Олар тек елімізді, Қазақстанды насихаттауға атсалысса деген оймен шақырылды. Ертең әрқайсысы өз еліне барғанда Қазақстанның, қазақ жастарының, жағымды имиджін қалыптастыруға үлес қосса дейміз. Сондықтан, олардың функционалдық бағыттағы әсері күшті бола қоймас, дегенмен шетелдік волонтерлар өзіміздің волонтерлармен бірге жүретін болады.
3500-ге жуық өтініш түсірген шетелдік волонтерлардың 100-і ғана арнайы сұхбат арқылы іріктеліп алынды. Ресей, Өзбекстан, Қытай сияқты жақын шетелдерден бастап, Италия, Канада, АҚШ, Ливан сияқты алыс шетелдерден де өтініш түсіргендер арасында бәсеке жоғары болды.
– Жалпы, ерікті, яғни волонтер сөзі біздің елімізге толық сіңісе қойған ұғым емес екені рас. Әдетте, волонтерлыққа дамыған елдер азаматтары көптеп ұмтылып жатады ғой. Ал біздегі жағдай қалай?
– Мен өзім «Еріктілер қозғалысы» деген қоғамдық қордың төрағасымын, еріктілікпен айналысып жүргеніме бес жылдай уақыт болды. Бір байқағаным, жалпы соңғы уақытта жастардың еріктілікке деген түсінігі өзгере бастаған. Болашақта тек спортта ғана емес, жалпы елімізге пайдалы іс-шараларда да еріктілер саны көбейе түседі деп сенемін.
Көптеген адамдар өмірге жаңаша көзқараспен қарап, тәжірибе жинау үшін волонтер болып жатады. Еріктілік – бекерге шапқылап жүгіре беру емес, өзгелерге көмектесу, өз елінің дамуына, өз қаласының көркейіп, кемелденуіне қандай да бір үлес қосуға деген ұмтылыс. Бір қуантатыны, ондай жандар бізде де баршылық. Өзіңді-өзің күштеп ерікті болу мүмкін емес, еріктілік – жүректің қалауы. Егер жаныңа жақпаса, бұл іспен айналысудың қажеті жоқ.
– Универсиада аяқталған соң волонтерларды ыдыратып жібермей, жиі бас қосып, елімізге пайдалы қандай да бір істерге жұмылдыру туралы ниет бар ма?
– Біз Қазақстанның дамуына үлес қосу үшін осы жарысты Еріктілер қозғалысының трамплині ретінде пайдалансақ дейміз. Универсиада арқасында ең белсенді, білімді жастардың басын біріктіріп, солармен арадағы қарым-қатынасты сақтай отырып, Еріктілер қозғалысын әрі қарай дамытуды көздеп отырмыз. Алматы қаласының әкімі Бауыржан Байбектің әкімшілік, қаржылық тұрғыдан қолдауымен еріктілерге ағылшын тілін оқыту ұйымдастырылды, әр түрлі тақырып бойынша түрлі тренингтер өткізілді. Тек спортта ғана емес, қаламыздың, қоғамның дамуына өз еркімен үлес қосқысы келетін жандар санын көбейтсек дейміз.
– Ендеше сәттілік тілеймін! Рахмет.
Әңгімелескен
Мира БАЙБЕК,
«Егемен Қазақстан»
АЛМАТЫ