Ұлттық театр өнерінің көшін алға сүйреп, сахна сайыпқырандарының талай буынын тәрбиелеп шығарған М.Әуезов атындағы Қазақ мемлекеттік академиялық драма театрының ұжымы Н.Назарбаевтың Қазақстан халқына Жолдауын талқылаудан тыс қалмады.
Театр директоры, Қазақстанның еңбек сіңірген қайраткері Ерлан Біләлов Елбасының биылғы Жолдауының маңыздылығына тоқталып, Президент ұсынған биылғы Жолдаудың негізі болып отырған «100 нақты қадам» Ұлт жоспарының әрбір тармағын талдай отырып, соған сәйкес нақты театр өнері тарапынан жасалатын істерді байланыстыра көрсетіп, ұжым алдында баяндама жасады.
Жолдауда барлық саладағы жаңғыру, цифрлық технологияларға көшу мәселесі баса айтылған. Театрда да осы жаңа технологиялар спектакль қою барысында кеңінен пайдаланылып келеді. Айталық, «Ақтастағы Ахико», «Бақыт кілті» спектакльдерінде IT технологиялардың жетістігі қолданылды. Бұл бағыттағы жұмыс алдағы уақытта да жүргізілетін болады. Cондайақ, Жолдауда әлеуметтік сала, халықтың тұрмыс-тіршілігін одан әрі жақсарту бұрынғыдай мемлекеттің басты назарында болатыны, соның дәлеліндей зейнетақының 20 пайызға өсірілетіні айтылған. Білім беру, денсаулық сақтау салаларына қатысты нақты атқарылатын жұмыстар да көрсетілген. Мұның театр өнеріне қызмет етіп жүрген әртістер қауымын айналып өтпейтіні рас. Өнер адамының үнемі өзін өзі жетілдіріп, білімін толықтырып отыруы, денсаулығына мұқият көңіл бөлу қажеттілігі – актерлік қызмет талап ететін басты дүниелер. Сондықтан да Жолдаудағы білім беру мен денсаулық сақтау мәселелеріне қатысты нақты әрі даму жолдарының ашып көрсетілуі театр қызметкерлерінің де көңілін қуантады.
Театрдың көркемдік жетекшісі, КСРО халық әртісі Асанәлі Әшімов Жолдауда айтылған басымдықтарды жүзеге асыруда сырт қала алмайтынын, ел мен жердің жаңа уақыт талабына сай дамуы үшін әркім өз еңбегімен үлес қосуы керектігіне тоқталды. «Жолдауда айтылған дүниелерге біз де өз үлесімізді қосамыз. Біздің қосар үлесіміз, ол – заман талабына жауап беретін жаңа спектакльдер қою, театрдың репертуарын байыту, шығармашылық ұжымның жан-жақты толысып, өсуі, сапалы жұмыс. Сол арқылы елдің өнерін шетелге шығарып, өзге елдерге көрсету, насихаттау» екенін еске салып, үлкен-кіші әріптес әртістерді өз өнерін шыңдай түсуге, замана көшінен қалмауға шақырды.
Өнердің өміршеңдігі мен халықшылдық сипатын Жолдаумен байланысты қарастырған Қазақстанның халық әртісі Есмұхан Обаев Президент белгілеп берген басымдықтардың мазмұны мен жаңалығын түсіндіре келе, «Президенттің билік тармақтарының өкілеттіліктерін бөлу саясатын өте дұрыс шешім әрі демократияның нақты көрінісі» деп бағалады. Үкімет орындаушы рөлін атқарып отыра бермей, Президент билік өкілеттілігін бөлгеннен кейін жауапкершілігін арттырып, өз ісіне жауап беруі керек. Сол сияқты кез келген саладағы басшылар Президенттен үлгі алып, барлық істе бір өзі жауапкершілік ала беруден босап, өкілеттіліктерін бөлісуі тиіс.
Өзгеріп бара жатқан әлем шарайнасындағы Қазақстан келбетінің де жаңаруы, сол өзгерістерге қарай икемделуі, іс жүргізуі – уақыт талабы.
Айгүл АХАНБАЙҚЫЗЫ, «Егемен Қазақстан»
АЛМАТЫ