Тәуелсіздіктің туын тіккенімізге де ширек ғасырдың шамасы болыпты. Қазағымның ықылым заманнан арман еткен азаттығын алған кезден бастап бүгінгі күнге дейінгі жеткен деңгейіміз бен дәрежемізді саралар болсақ, ең алдымен Есілдің бойынан еңселі Астана салғанымызды ауызға алуға болады.
Әлбетте, бүгінгі күн тұрғысынан алып қарағанда, бұл өзі заманның ыңғайы һәм уақыттың талабы бойынша дүниеге келе салған кереметтің бірі сияқты болып көрінуі мүмкін. Ал шын мәнісінде, мұның астарына үңілер болсақ, тарихта аса сирек кездесетін ақыл-ой, арман-мақсаттардың тау қопарып, қамал алғаннан да зор күш-қуатынан туындаған теңдессіз жоба екенін түйсінесіз. Міне, осындай ұлы істердің бастауында ұйытқы болып Нұрсұлтан Әбішұлы Назарбаевтай нар тұлғаның тұруы тарихтың бізге тартқан ғаламат сыйы екенін қалайша айтпасқа?!
Елбасының «Егемен Қазақстан» газетінде жарияланған «Ұлы дала ұлағаттары» еңбегінің «Еңсесі биік елорда» атты бөлімін оқып шыққанымда, осыдан бірнеше жыл бұрынғы бұйығып жатқан шағын ғана қала Ақмолаға ағылған көшті еске алдым. Жасыратыны жоқ, сол кезде Тұңғыш Президенттің сұңғыла саясатына терең бойлағанымыз, нартәуекелге бел буған көзсіз батырлығына күмәнсіз қарағанымыз кемде-кем еді. Сөйтсек, елдің ертеңін ойлаған кемеңгер біз төменде күңкілдеп жүргендей болған шақта қол жетпес биіктерден болашаққа көз тігіп, бәрін де болжап-біліп отырған екен ғой.
«Бүгінгі жаһандану шағында жаңа қала салудың мәселесі аса қиындық туғызбайды. Не керектің бәрі де бар. Расында солай ма? Асығыс ойласаң, оңай секілді көрініп кететін істің артында үлкен проблемалар туындап шыға келеді. Қала салу түгілі, үй салудың да машақатын бала кезден көріп өскен ұрпақтың өкіліміз», деп жазады Елбасы кітабында. Рас-ау, бір үйді салудың өзі бүтін бір әулетті әуре-сарсаңға салып қоятынын білеміз, талай мәрте куәсі де болдық. Ал аяғынан енді қаз тұра бастаған елдің заманның қиын-қыстау уақытында бас қаласын тұрғызуы – тарихтан іздесең таппайтын мысалдың бірі.
Кітапты оқи отырып шығарманың өнбойынан Астананың айшығын, елімнің айбынын танытатындай рухты екпін мен қуатты ой тасқынын сезінесің. Қазақстан деген елдің еңсе тіктеп, ендігіде келешекке қыранша көз тіккен болмыс-бітімін танисың!
«Қылыш пен найзаның заманы өтті. Зіркілдеген зеңбіректеріңіздің өзі қазір қару-жарақ мұражайында тұр. Қазіргі рухты сөз – ұлттың танымын да, тарихын да толғайтын сөз «Мәңгілік Ел» болуы керек. Бұл сөз халықтың өз көкірегінен шығып, әр адамның жүрекжарды сөзіне айналуы қажет, сонда ғана ұлы мақсат өзінің межелі биігіне шығады», деп жазған Ұлт көшбасшысының сөзіне алып-қосарымыз жоқ.
Боранбай ЖҰМКЕҰЛЫ,
еңбек ардагері, «Құрмет» орденінің иегері,
Шет ауданының құрметті азаматы
Қарағанды облысы