Қазақ өнеріндегі ерекше тұлғаның бірі – ғасырға жуық жасаған Шәкір Әбенов ақсақал. Үш дәуірдің куәгері, бір бойына ақындық, сазгерлік қасиет қатар дарыған, шежірешілік шеберлігі бір бөлек тұлғаның бертінде, еліміз Тәуелсіздік алған тұста Елбасы Нұрсұлтан Назарбаевқа бата беруі де еліміз тарихында алтын әріптермен жазылып қалды. Тәуелсіздігіміздің тура ширек ғасырында Шәкір ақсақалдың да атының аталуы, «Шәкір Әбеновтің күй мұрасы» атты кітаптың жарыққа шығуы – заңды дүние.
Жақында Ұлттық музейдің «Халық қазынасы» ғылыми-зерттеу институтының ұйымдастыруымен дөңгелек үстел өтіп, халық ақыны, фольклоршы, сазгер Шәкір Әбеновтің күй мұрасы әңгіме арқауына айналды.
Күйші Секен Тұрысбек Шәкір атаның көзін көрген азамат ретінде оның өнеріне, өміріне қатысты қызықты мәліметтермен бөлісті. 90-нан асқан шағында Елбасына бата берген қарияның сөзінің салмағын, батасының қасиетін әңгіме етті. Белгілі тұлғаның 15 әннің, 20 шақты күйдің авторы болғанын алға тартты.
Белгілі мәдениеттанушы Зира Наурызбаева Шәкір тұлғасының феномені ретінде оның барлық азапты, яғни қоғамдық өмірдегі, жеке тағдырындағы жан ауыртар жағдайларды қайыспай көтере білуін, оған қоса, халықтың да еңсесін түсірмеуге ат салысуын атап өтті. Қазіргі жастардың осындай адамдарды үлгі тұтуы керектігіне мән берді.
Филология ғылымдарының кандидаты Иманғазы Нұрахмет Шәкір Әбеновті үш ішекті домбыра мен соның күйін ХХ ғасырға жеткізген бірден-бір адам ретінде атады. Бұл тұрғыдан келгенде Ұлттық музейдің «Халық қазынасы» ғылыми-зерттеу институтының қызметкері Рүстем Нұркен шығарған «Шәкір Әбеновтің күй мұрасы» атты кітабының үш ішекті домбыраға арналған, сондай-ақ, Шәкір Әбеновке арналған тұңғыш зерттеу екеніне тоқталды. Ал автордың өзі Шәкір Әбенов күйлерінің ерекшелігі ретінде Еуропа музыкасында кездесетін сарындардың молдығын келтірді. Кезінде атақты музыка зерттеушісі Б.Ерзакович нотаға түсірген 9 күйді үш ішекті домбыраға лайықтап қайта нотаға түсіргенін, ізденістің нәтижесінде басқа да күйлерін айналымға енгізгенін, бұл күнде Шәкір Әбенов күйлерінің саны 19 болғанын айтты.
Айгүл СЕЙІЛОВА,
«Егемен Қазақстан»