Кеше Алматыда «Бөбек» Ұлттық Орталығында «Бөбек» қорының Президенті Сара Назарбаеваның қатысуымен «Өзін өзі тану» рухани-адамгершілік білім беру бағдарламасы бойынша IX республикалық кеңес өтті.
Білім және ғылым министрлігінің ұйымдастыруымен өткен кеңес жұмысына ЖОО ректорлары, «Өзін өзі тану» РАБ бойынша Республикалық кеңестің мүшелері, мемлекеттік органдардың, үкіметтік емес ұйымдар мен педагогикалық қоғамның өкілдері қатысып, аталған бағдарламаны жүзеге асырудағы ұйымдастыру-басқару және ғылыми-әдістемелік негіздерін жетілдіру мәселелерін талқылады.
Баршаға мәлім, «Өзін өзі тану» жалпыға міндетті пәні – еліміздің мектепке дейінгі және орта білім беру жүйесіне, сондай-ақ педагогтар даярлаудың білім беру бағдарламасына 2010 жылдан бастап енгізілді. Ондағы мақсат – жас ұрпақтың құндылық бағдарларының қалыптасуында маңызды рөл атқарып, өсіп келе жатқан тұлғаның рухани дүниесі бай, жетістікке қол жеткізе алатын, өз өміріне жауапкершілігі жоғары адам болуға үйрету.
Отырыстың модераторы, Республикалық кеңестің төрайымы – Білім және ғылым вице-министрі Э.Суханбердиева өз сөзінде «Өзін өзі тану» рухани-адамгершілік білім беру бағдарламасының маңызы, оның іске асырылуы және бірыңғай білім беру кеңестігінде «Өзін өзі тану» РАБ бағдарламасын енгізетін қанатқақты білім беру ұйымдары жүйесін ұлғайту мәселесіне кеңінен тоқталды. Сондай-ақ, Ақтөбе облыстық білім беру басқармасының басшысы Сәуле Өмірбекова педагог үшін ең маңызды мәселе – алдыңдағы оқушының әлеуетін ашуға көмектесу, оны өмірде, тәжірибеде қолдануға, сөйтіп, баланың алдымен өзін, ортасын түсінуге мүмкіндік беру керектігін айта келе, бүгінде облыста бес білім беру мекемесінде бұл бағдарламаның тереңдетілген моделінің оқытылып жатқанын тілге тиек етті.
Ал Абай атындағы ҚазҰПУ ректоры Серік Пірәлиев бұл пәннің педагогикалық ЖОО оқытылу барысында студент жастардың адамгершілік сапалары мен қабілеттерін кеңінен ашуға мүмкіндік беретініне, гуманистік дүниетаным негіздері қаланатындығына тоқталды. Сондай-ақ, 2010 жылдан бері университетті 2 мыңға жуық жас маман бітіріп шыққанын, арнайы жабдықталған «Өзін өзі тану» оқу кабинеті ашылып, студент-волонтерлердің ұсынысымен «Мейірім» клубының жұмыс жасайтынын, алты жылдан бері өзін өзі тану кафедрасының күшімен монография, әдістемелер, оқу құралдары жазылғанын, алдағы жаңа оқу жылында магистратура, докторантура ашуды ойластырып жатқандарын ортаға салды.
Жиынды «Өзін өзі тану» рухани-адамгершілік білім беру бағдарламасының авторы С.Назарбаева қорытпас бұрын, аталмыш бағдарламаның қоғамдағы, адамның жеке басындағы маңызына тоқталып, он жылдан бері өзімен бірге осы жобаның жүзеге асуына атсалысып келе жатқан әріптестерімен емен-жарқын әңгіме-дүкен құрып, бүгінде атқарылып жатқан жұмыстарға жоғары баға берді.
– «Жалғыз ағаш орман емес» деген, егер сіздер менің осы бағдарламама қолдау көрсетіп, көмектеспегенде жалғыз өзім осыншама істі бітірер ме едім. Менің бұл бағдарламадағы басты айтарым, адамзаттың әуел бастан бірінші парызы – өмірге адам болып келген соң, адам болып қалу. Адам деген ұлағатты атқа лайықты болу. Байқадыңыздар ма, осы пәнді оқыған оқушылардың, студенттердің жүзінен бір жылылықты байқайсыз. Өйткені, жылылық адамның ішкі жан дүниесінің тазалығынан хабар береді. Ендеше, бүгінгідей қиын заманда біз алдымен маман емес, адам тәрбиелеуіміз керек, – деді Сара Алпысқызы.
Гүлзейнеп СӘДІРҚЫЗЫ,
«Егемен Қазақстан»