Америкалықтар қазақшасымен қайран қалдырды

Шараның ресми бөлімі Қазақстанның Энергетика вице-министрі Мағзұм Мырзағалиевтің сөзімен басталды. «Американың ЭКСПО-2017 көрмесіне белсенді қатысып жатқанын және жасыл энергетиканы дамытуға жоғары үлес қосқанын айрықша атап өткеніміз жөн. Сонымен қатар, АҚШ-тың елімізбен берік қарым-қатынасына ризашылығымызды біл­діреміз. Екіжақты ынтымақ­тас­тық нәтижесінде америкалық «Шеврон» және «Эксон мобиль» компаниялары қазақстандық мұ­най нарығын игеруге атсалысып, біз үшін сенімді серік­тес­тік­терге айналды.  Тағы да айта кетерлігі, АҚШ-тың жаңартылатын энергия көз­дерін зерттеудегі тә­жі­ри­бе­сі Қазақстанның үлкен қы­зы­ғу­шы­лығын тудырды. Олар – жасыл технологиядағы жинақтаған тә­жірибесі тұрғысынан ең озық ел­дердің қатарында. Сондай-ақ, жүздеген америкалық компания жаңартылатын энергияға көшу жаһандық бастамасын қолдаған», деді ол. Жиында АҚШ елшісі, пави­ль­онының комиссары Джордж Кролл қазақ тілін әжептәуір бі­ле­тініне көпшіліктің көзін жет­кіз­ді. Қазақстан тарапы­ның ыс­тық ықыласына көңілі тол­ған­ды­ғ­ын білдірген комиссар па­ви­льондары жайында әңгі­ме­ле­ді. «Біз «Болашақ энергия­сы» тақырыбымен шабыттанып, «Сар­қыл­мас энергия көзі – әр­қай­сы­мыздың ішімізде» деген идеяны жет­кізгіміз келеді. Өзіміздің энергиямыз арқылы біз таңғаларлық нә­тижелерге жеткізетін иннова­цияларды ынталандырамыз. АҚШ пен Қазақстан арасындағы қатынастардың энергетикасы Америка павильонын идеядан шынайы жетістікке алып баратыны сөзсіз. АҚШ пен Қазақстан арасындағы серіктестік тек саяси лидерлер арқасында ғана емес, жеке сектор мен адамдардың арасындағы қатынастардың нә­тижесінде де нығая түсті», деді Д.Кролл.  Басқосудың екінші бөліміндегі концертті жүргізген америкалық жастардың қазақшасы ағылып тұрмаса да, әңгімелесуге жарап тұр. Ал сахнаға танымал Грейс Гаррет шығып, өзінің «укелеле» атты аспабымен «Дударайды» айта бастағанда, көзіне жас алған көрермендер болды.  Америкалықтар мұнымен шек­телген жоқ, АҚШ халқының бос­тандығын, еркін ойлау қабі­летін барынша көрсетті. Қазақ­тың күйлері мен өздерінің әуендерін үндестіріп, паппури орындады. Тіпті, «Қамажай» әніне билеп, оны да ұлттық музыкасымен шебер үйлестірді.  Мәдени шараның соңы жаппай биге ұласты. Содан кейін қатысушылар мерекелік шерумен АҚШ павильонына аттанды. Шерудің басында әлемге әйгілі «Harley-Davidson-ның» екі мотоциклі, оның артында әскери кур­санттар мен черлидирші қыз­дар жүрді. Павильонға келу­ші­лерге «Шексіз энергия көзі дег­е­німіз не?» деген сауал қой­ы­- ­ла­­ды. Содан соң болашақ энергия­сын айқындайтын фильм көр­сетіледі. Көпшілік келесі бө­­лікте «Өмір энергиясы» деп атала­тын таңғажайып шоуды тамашалайды. Шоу бір мезгілде үш үлкен экран арқылы көрсетіліп, кейін көпқабатты еден арқылы кеңейіп, жалғасады. Дәл осы кезде кіреберісте қойылған сауалдың жауабы шығады. Сонымен қатар, АҚШ пен Қазақстан арасындағы достықтың дамуы жайлы мәлімет беріледі.  АҚШ павильонының мәдени-бұқаралық шаралары осымен біт­пейді. Биыл мемлекеттің тәу­ел­сіздігіне 241 жыл толып отыр. Осыған орай, АҚШ мәдениетіне ар­налған мерекелік апталық ұй­ым­дастырылады. Соның аясында америкалық рок, блюграсс, соул мен хип-хоп өнері көрсетіледі. 

Топтаманы әзірлеген Асхат РАЙҚҰЛ, 

Суреттерді түсіргендер Ерлан Омаров, Орынбай Балмұрат,

«Егемен Қазақстан»