Елбасымыздың есімі күллі әлемге халқын өрге сүйреген бірегей басшы ретінде танылып, естіле бастағаннан бері дүниежүзі елдері Қазақстан мемлекетін мойындап, жағымды, жақсы аты үшін жақынырақ танығысы келетін райын байқата бастады. Қазақстанға тартылып жатқан инвестициялар, келіп жатқан даңқты тұлғалар, сапарлап жүрген саясат серкелері, өтіп жатқан беделді басқосулар – соның айғағы. Қазақстан бүгінде татулықтың, бейбітшіліктің алтын бесігіне айналды. Сонау Тәуелсіздіктің алғашқы жылдарының өзінде-ақ Н.Назарбаев басқарған Қазақ елі жер бетіндегі тұрақтылық пен қауіпсіздікті сақтап қалуды қолдайтын озық мемлекеттің үлгісін көрсетіп, шартараптағы жұрттың бәрін тыныштыққа шақырды. Міне, содан бері алғашқы кірпішін өз қолымен қалаған Астананы бейбіт келісімдердің алаңына айналдырды. Жер жүзіндегі алпауыт елдердің арасындағы текетірес күшейген кезінде алақандай ғана Астана араағайындық жүгін көтеріп, көзқарасы қайшы мемлекеттерді бір мүддеге ортақтастыру үшін бір үстелдің басына отырғызды. Саясат қайшылығын, дін алауыздығын ретке келтіру үшін өзара түсіністікке бастайтын мәмілелер жасауға ұйытқы болды. Астана аз ғана уақыттың ішінде дүниежүзінің дана басшылары бас қосатын саясаттың қаласына айналып шыға келді. Аз еңбек емес. Аз дейміз-ау, ұшы-қиыры жоқ осы еңбектің бәрі атан жілік азамат қана көтере алатын нардың жүгі емес пе. Елбасымыздың жүрген жері – бейбітшілік. Қайда барса да ымыраны, ынтымақты өзімен бірге ала жүреді. Еліміздің амандығы, жеріміздің тыныштығы үшін дәл біздің Елбасымыздай алаңдап, күн демей, түн демей, тәулігіне неше сағат аспанда ұшып, жұртының қамы үшін жанұшырып жүрген елжанды басшы некен-саяқ болар деп ойлаймын. Мемлекет тізгінін ұстаған соң бәрі де жұртының жайын ойлайды ғой, бірақ біздің Президентіміздің перзент ретіндегі парызын терең түсінуі және соған сай халқына адал қызмет қылуы алабөтен сияқты көрінеді. Елі Елбасыны қолдап, Елбасымыз еліне сүйеу болып атқаратын қыруар шаруа шаш етектен алда әлі күтіп тұр. Дүние жүзінде тұңғыш рет әлемдегі театрлардың фестивалін жас Астанада өткізуінің өзі неге тұрады! Мұндай халықаралық кең ауқымды шараны өткізуге екі елдің бірі бел шешіп кірісе алмайды. Қаражатын айтпағанда, бұған қаншама күш-қайрат жұмсалады. Президенттің пәрменімен өткізілген фестивальге Қазақстанға ғұмыры табаны тиіп көрмеген өзге елдің таланттары жиналып, өз өнерін көрсетіп, басқаның да өнерін парықтап, бүгінгі театрдың бағыт-бағдарын салыстырып, саралау үшін зор мүмкіндікке ие болды. Ал мұндай баға жетпес тәжірибе алмасулар еліміздің театр өнерін тағы бір белеске көтеріп тастайтыны анық. Бір ғана театр өнерінің өзі осыншама байлыққа кенелгенде, басқа салалар бойынша өткізіліп жатқан мың сан салмақты шаралардың елімізге, халқымызға берер игілігін, пайдасын санамалап шығу тіпті де мүмкін емес. Есмұхан ОБАЕВ, Қазақстанның халық әртісі, профессор АЛМАТЫ
Президент
•
06 Шілде, 2017
Татулықты ту еткен тұлға
264 рет
көрсетілді
Қазақтың маңдайы ашық, тілеуі дұрыс халық болған соң болуы керек, пешенесіне Нұрсұлтан Назарбаев секілді парасатты адамды Президент етіп сыйлап, жері үлкен болса да, халқы аз мемлекетті әлемге мәшһүр ету міндетін аманаттапты.