Осыдан он екі жыл бұрын ұлы ойшыл баба, данышпан дананың туғанына 155 жыл толуына байланысты Білім және ғылым министрлігінің ұйымдастыруымен бірінші рет қасиетті Жидебай төрінде, Абай-Шәкәрім кесенесінде бастау алған еліміз мектеп оқушыларының республикалық Абай оқулары жыл сайын дәстүрлі түрде өткізіліп отыратын мазмұнды да маңызды шараға айналды.
Білімдіден шыққан сөз
Талаптыға болсын кез
Нұрын, сырын көруге
Көкірегінде болсын көз, – деген ұлы ғұламаның арманды ойы мұратына жетіп, өресі биік өрелі сөзі өз тыңдаушысын елдің ертеңі – жас ұрпақ қатарынан табуы – береке бастауы екені анық.
Қазақстанның үкісі желбіреген үміті, үлбіреген асыл арманы, жарқын болашағы – бүгінгі жас ұрпақтың халықтың ұлы ұстазы Абайды оқуы, оның жауһар туындыларын жаттап өсуі, Абайдың әлі күнге дейін алыс тұрмақ өз елі, өз халқының біраз бөлігі үшін жұмбақ күйінде қалып отырған сырлы да мұңды әлемін зерттеуге деген ұмтылысы - елдің өркендеуі мен мемлекеттің дамуы үшін теңдессіз рухани байлық, үлкен игілік. Өйткені, Абай – Физули, Фирдоуси, Гете, Байрон, Пушкинмен қатар тұрар ұлы ақын, Платон, Сократ, Конфуций, Дрепер, Ницшемен ой жарыстырар ғұлама ойшыл. Абай сөзі бүгін де өз заманындағыдай аса өзекті, аса шынайы және алдағы небір замандарда да солай болып қала берері хақ. Қазақстанның әрбір жаңа буын жас өркені Абай мұрасынан нәр алып, оның жауһар сөздерін, асқақ поэзиясын, терең философиясын бойына сіңіріп өсуге тиіс.
Осындай ізгі мақсатпен ұйымдастырылған Абай оқулары бүгінгі күні «қуаты күшті нұрлы сөздің», құдіретті поэзия өнерінің жас дарындар арасындағы дүбірлі тойы ретінде республикаға танылды. 2000-2011 жылдар аралығында 12 рет өткізілген Абай оқуларының қорытынды кезеңіне еліміздің барлық аймағынан облыстық деңгейде жеңімпаз атанған оқушылар, Ресейде тұратын қазақ диаспорасының балалары – барлығы 900-ге тарта жыр сүйетін талантты жас өрендер қатысып, олардың 300-ден астамы республикалық оқулардың жүлделі орындарын иеленді.
Жыл сайын Абай – Шәкәрім кесенесіндегі амфитеатрда өткізілетін оқуларға 14 облыс пен Астана, Алматы қалаларынан, республикалық мамандандырылған дарынды балаларға арналған қазақ тілі мен әдебиетін тереңдете оқытатын, физика-математикалық, музыкалық, әскери мектептерден, ақынның өзі туған Абай ауданынан және Ресейдегі Омбы, Қосағаш өңірлерінен – барлығы 24-25 команда қатысып келеді.
Ең алғашқы Абай – Шәкәрім поэзиясы тойында «Өлең – сөздің патшасы» конкурсы бойынша ұлылардың 150 шығармасын жатқа білетіндігі үшін бас жүлде алған Ақылбеков Рүстем бұл күнде республикаға кеңінен танымал талантты айтыс ақыны. Кейінгі жылдары Абай мен Шәкәрімнен тіпті 400-ге дейінгі шығармаларды жатқа айтатын оқушылар көбейді. Мысалы, 2005 жылғы оқуларда бірінші номинация жеңімпазы болған қостанайлық Әлімбаева Раушан Абайдың 209, Шәкәрімнің 141 шығармасын жатқа білетін еді. 2008 жылғы жеңімпаз павлодарлық Мінайхан Салтанат ұлылардың 200-ден астам өлеңдерімен, 5 поэмаға, 35 қара сөзіне мүдірмеді. 2009 жылғы жеңімпаз, Абай ауданының 8-сынып оқушысы Сейітқазина Айдана 420 шығарманы, оның ішінде 418 өлеңді және Шәкәрімнің «Еңлік-Кебек», «Қалқаман-Мамыр» поэмаларын толық жатқа білгені үшін бас жүлдеге ие болды. 2011 жылғы ел Тәуелсіздігінің 20 жылдығына арналып өткізілген ХІІ Абай оқуларының жүлдегері қарағандылық Нұртай Айсұлу Абай мен Шәкәрімнің 341 шығармасын жаңылмай айтып берді.
Абай оқулары аясында өткен «Жүйріктен жүйрік озар жарысқанда» атты жас дарындар конкурсына келетін болсақ, мұнда жарқырап көрінген Байболов Бақытжан, Сағадиев Ұлан, Имантаев Айдос, Иманқұлова Венетта, Тимченко Евгения, Жүнісов Ерлан, Васильев Антон сияқты жас ақындардың өлеңдері республикалық баспасөзде жарияланып, жеке жинақтары шыға бастады. Ал «Көңілім әнді ұғады» атты Абай, Шәкәрім әндерін орындау конкурсының 2002 жылғы жеңімпазы, Абай әндерін ерекше сезіммен, аса шебер орындайтын Виктор Федянин мен ақын Айдос Имантаев Елбасы Н.Ә. Назарбаевпен кездесуге қатысты. «Адамзаттың бәрін сүй, бауырым деп...» уағыздаған Абай ұстанымына сай жеңімпаздар қатарында ұлты орыс, беларусь, молдаван, өзбек, ұйғыр оқушылар бар – Виктор Федянин, Евгения Тимченко, Антон Васильев, Мехрибанум Амансупиева, Эрметова Хурсаной, Луца Константин, Чурукова Назугум, еліміздің нағыз патриоттары.
Елбасы педагогикалық қауым алдына ХХІ ғасыр деңгейінде білім беру міндетін қойды. Ал Қазақстанның жас ұрпағы үшін қашан да білімділіктің бастау бұлағы – ұлылардың рухани мұрасы, кемеңгер ақынның әлем, адамзат, жеке адам, қоғам, ұлт, адамшылық негіздері жөніндегі данышпандық ойлары болып қала бермек. «Абайды таныту арқылы біз әлемге Қазақ елін танытамыз. Абай әрқашан біздің ұлттық ұранымыз болуға тиіс», – деген Н.Ә.Назарбаевтың сөзі біздің әрқайсымыздың жадымызда болғаны абзал. Белгілі жазушы Мұхтар Мағауин: «... Қазақта мінсіз адам болса, ол – Абай. Ақындық тұлғасы. Ұлттық санасы. Қайраткерлігі. Кемеңгерлігі. Кісілігі. Мінез-құлқы, жүріс-тұрысы. Бәрі де. Әулиеге тән сипат дарыған, өзгеше қасиет қонған. Міне, осындай асқар Абай, ұлы да ұлағатты Абай туралы айту үлкен жауапкершілікті талап етеді. Абай туралы айту – адамның ақыл, танымын ғана емес, адамның адамдығын айғақтайтын көрсеткіш», – дейді. Бұл ұлы бабамызды тануға ұмтылған жас ұрпаққа өнеге болар сөздер.
Республикалық Абай оқуларының жоғары деңгейде өткізілуіне қазылар алқасының әділетті де білікті әрі парасатты қызметі үлкен үлес қосты. Қазылар алқасын 11 жыл бойына республикаға танымал қоғам қайраткері, республикалық «Абай» қорының президиум мүшесі, Қазақстан халықтары Ассамблеясының мүшесі Хафиз Матаев секілді асыл тұлғаның басқаруы бұл шараның өзіндік дәстүрі қалыптасқан, ұстаздар мен оқушылардан оң бағасын алған, кеңінен танымал конкурстардың біріне айналуына қызмет етті.
Қазақтың біртуар аяулы ақын қызы Фариза Оңғарсынова, Мәжіліс депутаты Нұртай Сабильянов, белгілі ғалымдар Ғинаят Шаяхметов, Арап Еспембетов, Төкен Жұмажанова, Қаныш Бибеков, талантты ақындар Төлеген Жанғалиев, Тыныштықбек Әбдікәкімов, Мұратбек Оспанов, Серік Қалиев, Дәмеш Омарбаева, Қайырбек Шағыров, танымал журналистер Зернебек Шілдебайұлы, Сайраш Әбішқызы, Мінажадин Сермағамбетов, Саят Ибраев, дарынды ұстаздар Ләззат Бәйішева, Қанипа Бітібаева, Күліш Төлеуханқызы, Оспан Сүлейменов, Бақыт Аханова, Гүлзипа Қылышбаева әр жылдары қазылар алқасы құрамында табысты жұмыс жасады. Абай оқуларының өзіндік дәстүрі қалыптасып, деңгейі артуына үлкен еңбек сіңірген аудандық білім бөлімінің басшысы Қайырғазы Дүрмекбайды ерекше атауға болады.
Осы бағытта Білім және ғылым министрінің 2011 жылғы 4 сәуірдегі № 140 бұйрығы негізінде биылғы 28-29 қыркүйек аралығында мектеп оқушыларының республикалық Махамбет оқулары екінші рет өткізілді. Республикалық Абай, Махамбет оқулары үш номинация бойынша өткізілді: І. Абай, Шәкәрім, Махамбет шығармаларын жатқа оқу конкурсы (ақындардың шығармаларын көбірек жатқа білетін оқушыға жоғары баға қойылады); ІІ. Абай, Шәкәрім әндерін, Махамбет күйлерін орындаушы жас әншілер мен күйшілер конкурсы; ІІІ. Жас дарындар конкурсы (ақын, композитор балалар өз шығармаларын орындайды).
Абай оқулары аясында оқушылар Семей қаласы мен Абай ауданындағы тарихи жерлермен: М.Әуезовтің туған ауылы Бөрілідегі мұражаймен, Абайдың Семейдегі және Жидебайдағы мұражайларымен, тарихи ғимараттармен танысты, Еңлік-Кебек ескерткішінде, Үңгіртаста театрландырылған көріністер көрсетілді. Ал Махамбет оқулары аясында шәкірттер Махамбет – Исатай мемориалдық, Махамбет ауданындағы Сарайшық мемлекеттік мемориалдық кешендерімен, Индер ауданымен, Махамбет өмір сүрген жерлермен танысып, Қараойдағы Махамбет мазарында болды, Исатай Тайманұлы мен Махамбет Өтемісұлының өмірлері туралы театрландырылған көріністерді көрді.
Бірінші Махамбет оқуларында бас жүлде алған Байсеріков Бақтияр (Алматы қаласы) ақынның барлық 79 өлеңін біледі, екінші Махамбет оқуларының музыкалық конкурсында жеңген Шайхиев Ілияс (Атырау облысы) Махамбеттің күйлерін шебер орындайды.
Батыр Исатай Таймановтың биылғы 220 жылдық мерейтойына байланысты Исатай ауданы әкімінің арнайы сыйлығы «Тартынбай сөйлер асылмын...» конкурсында көзге түскен Солтүстік Қазақстан облысының 10-сынып оқушысы, дарынды жас ақын Қоңқаев Мұхамедке тапсырылды.
Аз уақытта Махамбет оқуларының да оқушылар мен ұстаздар қауымы арасында белгілі әрі қызықты шара ретінде танылуына қазылар алқасының, оның төрағасы Х.Досмұхамедұлы атындағы Атырау мемлекеттік университетінің профессоры, махамбеттанушы ғалым, елге сыйлы азамат Қадір Жүсіптің қосқан үлесі үлкен. Сонымен қатар, қазылар алқасы құрамында Қазақстанның еңбек сіңірген қайраткері, М.Өтемісұлы және А.Байтұрсынов атындағы сыйлықтардың лауреаты, белгілі ақын Қойшығұл Жылқышиевтің, Д.Нұрпейісова атындағы халықтық музыка академиясының Халық әндері және домбыра класының жоғары санатты мұғалімі Раиса Латифуллинаның, Қазақстан Жазушылар одағының мүшесі, ақын Қарасаева Жәнибаның болуы да үлкен іске игі әсерін тигізді.
ХІІ Абай және ІІ Махамбет оқуларын қорытындылай келе, төмендегідей ой түйдік. Біріншіден, балалар көркем әдебиетті, әсіресе, поэзияны аз оқитын қазіргі кезде Абай, Шәкәрімнің 300-400 шығармасын (өлең, қара сөз, поэмаларды), Махамбеттің барлық 79 өлеңін жатқа білетін жас ұрпақтың жарыса көбеюі – үлкен игілік. Бұл – Абай, Шәкәрім, Махамбет шығармашылығын зерделеу. Білімдерін тереңдету. Екіншіден, жас дарындардың конкурсы арқылы олардың ақындық, сазгерлік таланттарын ұштап, шығармашылық қабілеттерін, эстетикалық талғамдарын дамытуға көңіл бөлінді. Үшіншіден, Абай, Шәкәрім, Махамбеттің әндері мен күйлерін орындау сайысы дарынды балалардың музыкалық білімдерін, орындаушылық шеберліктерін кемелдендіруге ықпал етті. Осылайша, жалпы ұлылар мұрасын насихаттау арқылы рухани-адамгершілік, патриоттық тәрбие беру, жас өркенді ойлылыққа, адалдыққа, әділдікке, өрлікке, ерлікке баулу сияқты игі мұраттарға қол жеткіздік деуге болады.
Бұл шаралардың алғашқы ұйымдастырушылары қатарында әр жылдарда Білім және ғылым министрі қызметін атқарған Қырымбек Көшербаев, Жақсыбек Құлекеев, Шәмша Беркімбаева, қазіргі министр Бақытжан Жұмағұловтың, вице-министрлер Ерлан Арын, Күләш Шәмшидинова, Махметқали Сарыбеков және Абай ауданының бұрынғы әкімдері Қонысбай Төлеубеков, Бақыт Үйсімбаев, Ержан Сүлейменов, қазіргі әкімі Тұрсынғазы Мүсәпірбековтің, Шығыс Қазақстан облыстық білім басқармасының басшылары болған Светлана Ферхо, Нәзигүл Сейсенбина, Атырау облыстық білім басқармасының бастықтары Қилымғали Қайненов, Сатқан Есенғалиевтің, барша ұстаздар қауымының еңбегі ерекше. Аттары аталған және аталмаған барша қауым Абай оқуларына атсалысу арқылы кемеңгер ойшылдың рухы алдындағы азаматтық парыздарын өтеді және халыққа, халықтың болашағына қызмет етті деп ойлаймыз.
Осылай Білім және ғылым министрінің арнайы бұйрығы негізінде ұлылар туған өлкелерде, Қарауыл мен Қараойда өз кезегімен Тәуелсіздіктің 20 жылдығы қарсаңында дәстүрлі жыр мерекелері тағы да дүбірлеп өтті.
Арыстан туған Исатай
Дегеніне жете алмай,
Арманда өтіп кетті деп...
Қиналар ма екен біздерге?
Қиналсаңыз біздерге,
Мың рахмет сіздерге! – деп кейінгі келер ұрпаққа үміт артқан Махамбеттің жүрек тебірентер терең мұңын, түпсіз тұңғиық қасіретін түсініп, алмас қылыштай жарқылдаған жасын жырларын, асыл қазына – әдеби мұрасын зерделеген, Абайдай адамзат тудырған алыптар қатарындағы ұлы адамның, ойшыл кемеңгердің қасиетін танып, қадірін ұғар «көкірегінде көзі бар, тілі орамды» абайшыл жастар көп болса, ел болашағы жарқын болары анық. Білімге құштар, ізгілікке ұмтылған өнерлі жастар – ел мерейін тасытатын қуатты күш. Абай, Шәкәрім, Махамбет сөздерін жаттап, сырына үңілген, ұлылардан ұлағат іздеген баланың жаны жайсаң, жақсы адам, Махамбет сияқты «тартынбай сөйлер асыл» азамат болып өсетініне біз кәміл сенімдіміз.
Роза БАТТАЛ, Қазақстан Республикасы Білім беру ісінің құрметті қызметкері. Астана.