Кеше Парламент Сенатының депутаты, «Нұр Отан» ХДП жанындағы Жемқорлықпен күрес жөніндегі республикалық қоғамдық кеңестің төрағасы Оралбай Әбдікәрімовтің төрағалығымен аталған кеңестің кезекті отырысы болып өтті. Онда партияның жемқорлықпен күрес бойынша бағдарламасының Қызылорда облысында іске асырылу барысы талқыға түсті.
Қоғамдық кеңес төрағасы өзгелерге сөз бермес бұрын Қызылорда облысының жетістіктеріне қысқаша тоқталды. Қызылорда облысының әкімі Болатбек Қуандықов өз кезегінде өңірде Қазақстан Республикасы Президентінің 2009 жылдың 22 сәуіріндегі Жарлығына сәйкес жемқорлыққа қарсы күрес жөніндегі қолданыстағы облыстық іс-шаралар жоспарына өзгерістер енгізілгендігін алға тартты. Әкім облыста сыбайлас жемқорлықпен күрес жүргізбей отырған бірінші басшылар жауапкершілігін қарау күшейтілгендігінен де хабардар етті. Оның сөзінен жергілікті өзін өзі басқару бағытында осы жылдан бастап Сырдария ауданындағы екі ауылдық округке тәжірибе ретінде 15 бюджеттік бағдарлама бойынша тиісті қаражат қарастырылғаны белгілі болды. Осылайша ауыл әкімдерінің елдің мәселелерін дербес шешулеріне және тұрғындардың ауыл әкімдерінің жұмысын бақылауына мүмкіндік туғызылуы тиіс. Сондай-ақ Болатбек Баянұлы апта сайын өзі прокуратура, ұлттық қауіпсіздік, қаржы полициясы, ішкі істер органдары басшыларымен кездесуді тәжірибеге енгізгендігін де назарға салды.
Облыс әкімі, сонымен қатар, жемқорлық құқық бұзушылықтар әлі де кездесетіндігін жасырмады. Оның басым бөлігі мемлекеттік сатып алу, тұрғын үй және жер беру төңірегінде қалыптасқан. «Бұл жемқорлық көріністерінің жолын кесу үшін тоқсан сайын барлық мемлекеттік ұйымдардың мамандары мен есепшілері үшін мемлекеттік сатып алу бойынша құқықтық оқулар ұйымдастырылуда», деді әкім. Одан басқа ашықтықты қамтамасыз ету мақсатында конкурстық комиссия құрамдарына мәслихат депутаттары, үкіметтік емес ұйымдар өкілдері және өзгелер енгізіліп келеді. Республика бойынша баға сұраныстары тәсілі арқылы өткен электронды мемлекеттік сатып алудың нәтижесінде 465 миллион теңге үнемдеуге қол жеткізілген. 2010 жылы осындай үнемделген қаражат 233 миллион теңге болған.
Келесі жылдан бастап конкурстарды толық электронды сатып алу түріне ауыстыру көзделуде. Өткен жылы несие арқылы сатылатын тұрғын үй бөлу барысында сыбайлас жемқорлыққа жол берген Қызылорда қаласы әкімінің орынбасары мен тұрғын үйді бөлу мемлекеттік кәсіпорын директоры тәртіптік жазаға тартылды. Өткен жылы 2002 жылғы өтініш білдірген азаматтарға берілуі тиіс жер учаскелерін кезексіз басқа тұлғаларға заңсыз бөліп, сыбайлас жемқорлыққа жол бергені үшін Қызылорда қалалық жер қатынастары бөлімінің бастығы лауазымынан босатылды. Бүгінгі таңда 40 мың адам жер кезегінде тұр. Бұл мәселені шешу үшін 1300 гектардан астам жер белгіленіп, оған ауыз су мен электр желісі тартылуда, деді Б.Қуандықов.
Қызылорда облысында жемқорлықпен күрес бойынша партия бағдарламасының орындалуына талдау жүргізу үшін құрамына Мемлекеттік қызмет істері жөніндегі агенттіктің, Қаржы бақылау комитетінің, Бас прокуратураның және Қаржы полициясының өкілдері кіретін Сараптама комиссиясының басшысы, Сенат депутаты Қуаныш Айтаханов та бірқатар фактілерге назар аудартты. Оның сөзінен белгілі болғанындай, Қызылорда облысында бірнеше жылдан бері жемқорлықтың жоғары деңгейі сақталып келеді. Мәселен, былтыр 74 жемқорлық қылмыстар тіркелсе, 2009 жылы бұл көрсеткіш 50 болатын. Осылайша жемқорлық қылмыс деңгейі 48 пайызға өсіп отырғандығы атап көрсетілді. Тек биыл 8 айдың ішінде жемқорлықтың 57 фактісі анықталған.
Комиссия басшысының сөзінен тағы мәлім болғанындай, әкімдіктер мен олардың құрылымдық бөлімдерінің қызметкерлері арасында жемқорлық кеңінен етек алған. Жемқорлық сипаттағы қылмыстың 46 пайызы солардың үлесінде. Тарқатып айтқанда, олар рұқсат беру процедураларын жүргізуде қиянатқа барған, тұрғын үй бойынша пара беруге итермелеп, мемлекет мүлкін талан-таражға салған. Мемлекеттік бюджетті пайдалану барысындағы жүйелі ұйымдастыру-әкімшілік кемшіліктерге жол беріп, жемқорлық әрекеттерге қолайлы жағдайлар жасаған. Облыстық қаржы бақылау органдары 2010 жылы 9 337,9 миллион теңге көлемінде заң бұзушылықтарды анықтаса, соның 7 110,4 миллионы кері қайтарылыпты. Сондай-ақ 2010 жылы мемлекеттік органдардың 1631 заңсыз актісі жарық көрген. Ал 2011 жылдың 6 айында 1304 заңсыз акт өзгертіліп, бұрынғысының күші жойылып отыр.
Отырыс барысында Қызылорда облысынан түсірілген екі бейнефильм көрсетілді. Оның алдыңғысы темір жол үстінен салынған көпірге қатысты. Аталған нысан құрылысына 1 миллиард 530 миллион 940 мыңнан астам теңге жұмсалған. Онда да оның 530 миллион теңгесіне қатысты сұрақ туындаған. Ал біткен көпірдің тарлығы сонша автобус пен жүк мәшинесінің көпірге сыймай қалып, әбігерге түсіп жатқан көрінісі ешкімді бейжай қалдырмады. Көпірдің үстіндегі жағдай осындай болғанда, астындағылар не күйде дерсіз. Бұл жерде де тұрғындардың жағдайы ескерілмепті. Көптеген отбасылар басқа жаққа көшірілмегендіктен, үстеріне көлік құлап кете ме деген қауіп те жоқ емес көрінеді.
Екінші бейнефильмде де көптеген кемшіліктер ашып көрсетілді. Осы ретте Экономикалық қылмысқа және сыбайлас жемқорлыққа қарсы күрес агенттігі (қаржы полициясы) төрағасының орынбасары Андрей Лукин облыста орын алған бірқатар сыбайластық фактілерін тізіп өтті.
Жемқорлықпен күрес жөніндегі республикалық қоғамдық кеңес отырысында осылайша көптеген келеңсіздіктердің орын алғандығы жан-жақты дәйектеліп берілді. Отырыс соңында өңірдегі жемқорлықпен күрестің тиімділігін арттыру және оны барынша азайту жөнінде ұсыныстар қабылданды.
Асқар ТҰРАПБАЙҰЛЫ.