Біздің елімізде, жасыратыны жоқ, жылма жыл көктемгі егіс және күзгі орақ науқаны қарсаңында жанар-жағармай «жыры» қоса басталады. Яғни, түрлі сұйық отын құны шарықтап шыға келеді не болмаса жанар-жағармай мүлде құриды. Бір ғажабы, оның не себептен екенін жұрттың бәрі біледі. Бірақ ешкім де жауапқа тартылмайтын. Әйтеуір бұған Үкімет араласып барып, жағдайды ушықтырмай басатын. Шыдамның да шегі бар дегендей, көзге көрініп тұрған кемшілікті жоймаса жағдайдың тіптен асқынатынын сезген билік нақты шараға көшті. Атап айтқанда, «ҚР бәсекелестікті қорғау агенттігінің Астана қаласы, Ақмола, Қарағанды облыстары бойынша аймақаралық инспекциясы» мемлекеттік мекемесі бір істі сотқа жолдады. Сол арқылы сот, яғни Қазақстан Республикасының әкімшілік құқық бұзушылықтар туралы кодекстің 147-бабы, 2-бөлімімен қозғалған әкімшілік істі қарау барысында жанар-жағармайды сатумен айналысқан бірнеше заңды тұлға өкілдерінің өзара сөз байласып, оның құнын негізсіз жоғарылатқандығын анықтады, дейді Жоғарғы Соттың ресми өкілі.
Тек көлік жүргізушілерін ғана емес, жалпы жұртшылықты қызықтырған іс Қарағанды қаласының мамандандырылған әкімшілік сотында қаралды. Аталған іс материалдарына сай, «Star Oil 2030» ЖШС, жеке кәсіпкер Е., жеке кәсіпкер Б. 2011 жылдың маусым-шілде айларында өздерінің жанар-жағармайды сату стансаларында дизель отыны, АИ-80, АИ-92, АИ-93 сияқты көпшілік тұтынатын бензин түрлерінің бағасын өз беттерінше жоғарылатқан екен. Дәл осы кезеңде бензин құны еліміздің барлық дерлік аймақтарында көтеріліп, кейін Үкіметтің тікелей араласуымен әупірімдеп реттелген болатын. Тексеру барысында жоғарыда аталған кезеңде сұйық отын өндіруші зауыттар, оны жеткізуші компаниялар жанар-жағармай бағасын көтермегендігі анықталды. Бір сөзбен айтқанда, мемлекеттік органдар республика аумағында бензин құнының өсуіне тосқауыл қойып, оның тапшылығы секілді ушығып тұрған жағдайды қалыпқа келтіріп жатқанда, жоғарыда аталған заңды тұлғалар «етектен тартып» яғни осы күрделі кезеңді пайдаланып, тез арада артық табыс табуға әрекет жасаған. Ал жағдайды қадағалап отырған бәсекелестікті қорғау органдары мұндай құқық бұзушылыққа барған кәсіпкерлерге қатысты шара қолданып, ақыр аяғында істі сотқа жеткізді.
Сөйтіп «өзім қожа, өзім би» деп артық табыс табуды мақсат қылған заңды тұлғалар Қазақстан Республикасының әкімшілік құқық бұзушылық туралы кодекстің 147-бабы, 2-бөлімі бойынша сот қаулысымен кінәлі деп танылып, оның ішінде «Star Oil 2030» ЖШС 1 миллион 754 мың теңге, жеке кәсіпкер «Билак» 226 мың 800 теңге және жеке кәсіпкер «Ермаков» 226 мың 800 теңге көлемінде айыппұл төлейтін болды. Сонымен қатар олардың жоғарыда аталған кезеңдегі тапқан табысынан 563 133 теңге мемлекет пайдасына тәркіленді, дейді ресми өкіл.
Осылайша қарапайым тұтынушының арқасында қосымша пайда табамын деген тұлғалар жауапкершілікке тартылды. Оған қоса қазіргі күні жанар-жағармайды сатумен айналысатын тағы да бірнеше заңды тұлғаға қатысты осы сияқты әкімшілік істер қаралу үстінде.
Александр ТАСБОЛАТОВ.