Әбдібек Нұрмағамбетов деген қарт журналист өзінің «Албарбөгет» атты шағын кітабында Торғай даласын былай әспеттеген. “Сарыарқаның сауырында жатқан жалпақ дала Торғай алқабы боп аталады. Бұл өңірдің қашан да қысы – қысылшаң, қызыл шұнақ аязды, жазы – жайлы шуақ, аптаған ыстығы да баршылық. Осы алқаптың нақ ортасында егіз қозыдай қапталдаса, қатарласа ағып жатқан екі өзен бар. Ол өзендер: Қабырға, Торғай деп аталады. Осы өзендер бойындағы сандаған төрт түлік мал үнемі мәйек басып, мамырлап жатқаны. Иә, бұл екі өзен ежелден мал баққан елдің құтты қонысы, береке бастауы...”. Шынында да, Әбекең ақсақал айтса айтқандай, егіз қозыдай қатарласа ағып жатқан Қабырға, Торғай өзендерінің бойы күні бүгінге дейін мал бағып тіршілік етіп отырған елдің атақонысы.
Сәл шегініс жасап, тарихқа үңілсек – Қазан төңкерісіне дейін Торғай даласы, оның ішінде Қабырға мен Торғай өзендерінің бойы зерттелмей келгені мәлім. Осы өңірді мекендеген халық көшіп-қонып, ежелден мал бағуды кәсіп еткен. Малы жоқ кедей – кепшіктер сай саланы сағалап, “өзен жағалағанның өзегі талмастың” кебін киіп, су жиналған жыраны паналап, кетпенмен жер шауып, қадақтап тұқым сеуіп, апталап су шығарып, егін егіп күнелткен. Қабырға өзенін маңайлаған жұрт осылайша итшілеп күн көріп, өмір сүріп келген.
Сол кезде осылай өмір сүрген халық мынадай құлазып жатқан, құрғақшылық құшағындағы ен даланы суландырып, асау өзеннің арнасын бөгеп, ен дәулетке жетер күн бола ма екен деп армандаған. Осы елдің асыл арманының орындалуына ел қамын жеген Едіге сынды Торғай өңірінің аяулы азаматы Айса Нұрмановтың сіңірген еңбегі зор. Өзінің аз ғұмырында артына игілікті із қалдырған, жастайынан ат жалын тартып мініп көптеген шаруа тындырған Айсекең жайлы аруағы риза болсын деп осы тұста бір – екі ауыз сөз айта кетсек жөн болар.
Айсаның әкесі Нұрман жастай қайтыс болғаннан кейін ол әкесінің ағасы Бұқарбай деген кісінің тәрбиесін алады. Дәулеті мол, дастарқаны кеңге жайылған қасиетті қарашаңырақ иесін ауылдастары сый-құрметке бөлеп баққан. Сөзге шешен, дініне берік, жақсыға серік бола білген Бұқарбай ақсақалдың абыройы жалпақ жұртқа жетіп жатқан. Сондықтан бір тайпа елдің басы, әрқашанда еңсесі биік, аса тұлғалы, ақылгөй Бұқарбайды әрі аға, әрі әке тұтқан Айса оның айтқан ақыл-кеңесіне әрдайым құлақ асып отырған.
Жастайынан елім деп еңіреп, халқым деп қалтқысыз қызмет еткен Айса Нұрманов көзі ашық, көкірегі ояу, сауаты мол ер жігіт болып өседі. Жаратылысынан бойына көптеген ерекше қасиеттерді сіңіріп өскен ол өзі туып-өскен ортада, ағайын-туыс арасында үлкен беделге ие болып, 1924 жылы көпшіліктің дауысымен Торғай уезіне қарасты Қарақоға болысына болыс болып сайланады. Ең алдымен елдің елдігін, халықтың бірлігін ойлаған басшы елдің кемшілігін қарастыра бастайды. Ең бастысы «көшерін жел, қонарын сай білетін» көшпелі елді қоныстандыру, атакәсіп – мал шаруашылығын өркендетумен бірге жерді суландырып, егіншілік кәсібін де өрбіту еді. Ол үшін, ең алдымен жерді суландыру мәселесін қолға алып, түбегейлі шешу керек болды.
Сөйтіп бөгет құрылысына жөн-жоба көрсететін мамандар табудың қамы қолға алынады. Бөгеттің табанын шегендеп салуға ағаш, тас, сырғауыл, бөрене қажет болатын. Құрылыс материалдарын табуды қарастырып уез, облыс орталықтарына барып, су құрылысының жайын білетін маманды тауып әкелген де Айса еді. Осылайша ауылға ала бақанын арқалаған су мамандары келе бастайды. Соларға басшылық жасаған инженер Николай Котельниковты көрген жұрт осы күнге дейін оны әлі әңгімелеп отырады. Әңгіменің үлкені – бөгетті қай жерден салу керек, өзеннің су тоқтарлық ұрымтал жері қай тұс болатыны төңірегінде өрбиді. Біреулер Ақтікен, екінші біреулері Ақсуат маңдарын нұсқаған. Ұсыныстар аяғы жинала келе ақыры Ақсуаттан төмен Көлқамыс маңына табан тіреді. Шынында да нағыз ұрымтал жер осы болып шықты. Бұл жер суға тосқауыл боларлық жар қабағы биік, өте қолайлы екенін кейін өмірдің өзі көрсетті. Қарабөгет табаны шөккен түйедей боп, о баста осы жерде орналасқан еді.
Сонымен не керек, су мамандары іске кірісіп те кетті. Бөгет жасаудың картасы да дайын болды. Оның табанына салуға қанша ағаш, тас керек, сонымен қатар, екі жақ қанатын қалаудың жоба жоспары сызылды. Қай жерге қанша топырақ салынады, оған қанша адамның күші керек, бәрі-бәрі межеленді. Осы маңайдағы жер-суды, ой-шұқырды, жазық та жалпақ даланы бес саусағындай білетін Айса жоба-жоспарға өзінің ұсыныстарын үнемі енгізіп отырды. Ендігі жерде еңбек дүбірі толастамай, аттың жалында, атанның қомында қыруар жұмыс атқарылып, өзеннің екі жақ қапталындағы бөгет бірте-бірте биіктеп, созыла түсті. Бөгет қанатын жайып, бір жағы Көкалат, екінші жағы Қарақоға поселкесіне дейін көсіліп жатты. Әрқайсысының ұзындығы 6 километр шамасы. Осымен бөгет бірер жыл ішінде салынып бітіп, ендігі кезек тереңдігі 10-15 метр, ені 100 метрге жуық өзен арнасын буып, бұғалақ салу сияқты күрделі де көлемді жұмыстарды бастау сәті тұрды. Бөгет салуға инженер-техниктер топ-тобымен қатысты. Әрісі Ленинград, Москва, берісі Ақтөбе, Қостанай жақтан келгендердің ішінде орыс та, украин да, башқұрт та бар еді. Олар ауыл аралап, сахара тұрмысына сұқтана қарап, тамашалап жүрді. Қысқасы “тоқсан ауыз сөздің тобықтай түйіні бар” дегендей, атақты Албарбөгет аталуы да тегін емес-ті. Өйткені, өзеннің екі жақ қанатын албарлап бөгеп тастағандықтан да осылайша аталып кеткен. Сөйтіп бөгет құрылысы екі-үш жылдың ішінде ойдағыдай аяқталды. 1927 жылдың күзінде аяқталған құрылыс келер жылдың көктемінде алғаш рет тасқын суды тосқан-ды. Бөгеттің тосқауылынан аққан су Қабырға өзенінің екі жак қапталындағы құлазып жатқан даланы басып өтіп, ғасырлар бойы кеуіп жатқан ой-шұқырды толтырып, жалпақ даланың шөлін қандырды. Содан нәр алған мал мен жан рахатқа батып, әп-сәтте жер бетіне өң кірді, ел іргесіне ырыс айналды. Сөйтіп, ел боп еткен еңбектің жемісін халық көрді. Айсаның армандаған ойы іске асып, ақыры ұшан теңіз табысқа тап болып, ел мен жер қуанышқа бөленді.
Дәл осы тұста өмір ағысының бір белесі болып, дүниеге келген ауыл-аймақ көлеміндегі елеулі бір құбылыс – Албарбөгеттің даңқы шығып дархан молшылықтың көзін ашқан еді. Сол бөгеттің арқасында елдің көркі, жердің сәні кіріп, тарихтан өз орнын тапқандай еді. Осы бөгетті кезінде халық ақыны Нұрхан Ахметбеков “Торғайдан сәлем” атты өлеңінде былай деп жырға қосқан:
...Таңы қулап тайлақтың,
Мойны түлеп бойдақтың,
Арқандаулы арданың
Құндыздай түгі құбылар,
Албарбөгет бөгеті
Асқар таудың орындай,
Қазыбай мен Шәкіртам
Арыстанбайдың желіндей.
Адам айтса нанғысыз,
Табиғаттың тегіндей,
Ат шаптырым бөгетті,
Азамат соққан ерінбей.
Көк долы жойқын асау су
Қайтсін мұнан шегінбей?
Аласұрған тасқын сел
Айналып келіп бас иді,
Ұялшақ жас келіндей...
Иә, бүгінгі әңгімеміздің арқауы болған Қабырға, Торғай өзендері ежелден мал баққан елдің құтты қонысы, береке бастауы болған. Осы Қабырға бойын мекендеген қазіргі Көлқамыс ауылы менің кіндік қаным тамып, туып – өскен жерім, атамекенім. Осы атақоныста өзім іргетасын қалап ұйымдастырған “Сыма-К” шаруа қожалығы орналасқан. Қазір бұл шаруашылық орта және шағын бизнесті дамыту жолындағы Жангелдин ауданы бойынша мал өсірумен айналысатын ірі шаруашылықтардың бірі.
Ел қамын ертеден ойлаған Айса Нұрманов атамыздың салып беріп кеткен Албарбөгет бөгетінің арқасында бүгінде төрт түлік малды өсіріп, қыр қазағының таңдаулы тағамы ет пен қымыз, шұбат, қатық пен қаймақ, құрт пен ірімшік, жент сияқты асыл тағамдарды қорек еткен Торғай елінің қазаны ортаймаған. Бірақ “елу жылда ел жаңа” демекші осыдан 84 жыл бұрын құрылысы салынып, талай тасқын суға тосқауыл болған Албарбөгет 2007 жылы Үкіметтен бөлінген 70 миллион теңге қаражатқа күрделі жөндеуден өтті. Кеңестік дәуір күйрегеннен кейін осы сияқты бірнеше үлкен өзендерді бөгеп тұрған бөгеттер ешкімнің меншігінде болмағандықтан үлкен мәселе туындады. Осы орайда 1991 жылдың 21 тамызында Президент Н.Назарбаевтың апаттың алдын алудың және оларды жоюдың тиімді жүйесін жасау мақсатында “Қазақ КСР Қауіпсіздік кеңесін құру туралы” Жарлығы шықты. Осы маңызы зор Жарлық республикамыздың әр аймағында ел басқарып отырған барлық басшыларға үлкен жауапкершілік жүктеді. Солай десек те, мысалы басшылардың жауапсыз қарауынан Алматы облысындағы адам жаны түршігерлік орын алған жағдай, Батыс Қазақстанда болған су апаттары мемлекетке қаншама қыруар шығын әкелді. Бір ғана Қызылағаш оқиғасы қаншама адамның өмірін қиды. Мемлекетке 7 миллиард теңге зиян келтірді.
Осы сияқты апатты жағдайлардың алдын алу үшін халықтың тілегі бойынша мен Жангелдин аудандық мәслихатының депутаты ретінде жоғарыда аталған Албарбөгет су қоймасын Үкіметтің балансына алу жөнінде тиісті орындарға ұсыныс жасадым. Бұл ұсынысымды аудан басшылары қолдап Қазақстан Республикасы Ауыл шаруашылығы министрлігі Су шаруашылығы комитетінің төрағасы Анарбек Орманға хат жолдадым. Комитет төрағасы бұл ұсынысты қабылдап, осы жылдың 1 шілдесінен бастап Қостанай облыстық су шаруашылығының бастығы Ж.Райымқұловқа бөгетті бақылауға алу жөнінде тапсырма беріп, міндеттеді. Жоғарыдан берілген нұсқауға байланысты осы жылдың көктемінде су тасқыны кезінде аудан әкімшілігі бұл жерді қатты бақылауға алып, кезекші трактор бөліп, бөгетті аман сақтап қалды. Егер осындай жедел шара қолданбағанда Албарбөгет тағаны бұзылып кетсе қаншама елді мекенді су басып шығын болатын еді.
Мен айтып отырған Қабырға өзені басын Қарағанды облысының Ұлытау ауданынан алып, Ақтөбе облысының Ырғыз ауданына барып, Суаяғықұрдымға құяды. Ұлытау мен Ырғыздың екі арасында қаншама халық мал, егін шаруашылығымен айналысып, бау-бақша егіп, тіршілік жасап отыр. Ал Албарбөгет бөгетінің орналасқан жеріндегі судың тереңдігі 15-20 метр, енділігі 110-120 метрдей. Сондықтан бұл бөгеттің мемлекеттік балансқа алынбауы өте қауіпті.
Осы мақаланы жазған себебім, қаншама халықтың күн көрісін сақтап, түрлі апаттардың алдын алған республикалық су шаруашылығы комитетінің басшыларына, оның төрағасы Анарбек Орманға Қабырға өзенінің маңайын мекендеп отырған Торғай елінің атынан шексіз алғысымды айтамын.
Кәкімжан КАРБОЗОВ, Жангелдин аудандық мәслихатының депутаты.
Қостанай облысы.