Сауытбек АБДРАХМАНОВ – Ханойдан.
16 желтоқсан, азаттықтың ақ таңын атырған күн, тәу етер Тәуелсіздігіміздің ұлы тойы аталар күн жақындаған сайын бостандықтың бағасы, еркіндіктің қадір-қасиеті жайында бұрынғыдан жиірек ойлана бастайтынымыз белгілі. Осындайда азаттығын жылдар бойғы жанкешті соғыспен қорғап қалған елдердің талайлы тағдыры туралы да толғанасың. Арғы тарихқа тереңдеп жатпайық десек, ең бергі кезеңдегі сондай соғыстардың арасынан алдымен ойға оралатыны, әрине, Вьетнам соғысы. Бүгінде сол соғыс жайында шала-шарпы ғана білетін бүтін бір ұрпақтың өсіп шыққанына да таң-тамаша қаласың. Әйтпесе мына біздің буынның митингілерге қатысып, «Тарт қолыңды Вьетнамнан!» деген жазуы бар плакатты ұстап жүретіні күні кеше сияқты еді. Бірақ, шындық солай. Бұл да болса мына әрі ғажап, әрі азап өмірдің бір заңдылығы, тіршіліктің тағы бір тағылымы. Иә, өмірдің парадоксы сонда, мына дүниеде ештеңе ұмытылмаса да онша жақсы болмас еді.Тарихта ештеңе ұмытылмаса адамзат баласының көкірегін кек кернеумен, өзегін өштіктің оты өртеумен өтер еді, ол кек, ол өштік ұрпақтан ұрпаққа ауысып кете берер еді. Жасампаз жұмыс деген, жақсылықтың, жарастықтың жалғастығы деген жайына қалар еді. Сондықтан да бір кезде императоры астанамызды өртеп кетіпті деп қазіргі орыстар қазіргі француздармен қырқысып жатпайды. Сондықтан да бір кезде елімізді отарлапты деп қазіргі вьетнамдықтар қазіргі француздармен, бір кезде солдаттары топырағымызды таптапты деп қазіргі америкалықтармен барыс-келіс, алыс-беріс жасамай тұрмайды. Олармен ат құйрығын кесісе берсе алдымен өздері ұтылатынын біледі. Соның арқасында қазір арзан жұмыс күшімен арзанға тоқылған, тігілген киімдерімен Вьетнамның жеңіл өнеркәсібі Америка базарын бірте-бірте Қытайдың тауарындай жаулап алмағанмен, жайлап алып бара жатыр. Ана жылы Нью-Йоркте, Біріккен Ұлттар Ұйымының ғимаратындағы дүкеннен естелік болсын деп кеудесіне БҰҰ логотипі түскен жеңіл күртке алғанымыз бар. Қонақүйге келген соң қарасақ «Вьетнамда жасалған» деген жазуы тұр. Әлемнің бас кеңсесіне жер түбінен күртке таситындай не қажеттілік бар? Мұндағылар арзанға тігеді, арзанға жеткізеді, содан да арзанға сатады. Базардағы басты нәрсе – баға. Қазақстан Республикасының Президенті Нұрсұлтан Назарбаев кеше Вьетнам Социалистік Республикасына тұңғыш ресми сапарының бірінші күнінде ел басшысы – Президент Чыонг Тан Шангпен кездесуіндегі сөзін вьетнам халқының экономикадағы құтты қадамдарын атап айтудан бастады. Әсіресе, кейінгі он жылдың көлемінде Вьетнам тамаша табыстарға қол жеткізді. Қай салада да, экономикада болсын, білім беруде болсын, мәдениетті өркендетуде болсын, вьетнамдықтардың мерейі үстем түсіп тұр. Даму қарқыны бойынша Вьетнам экономикасының Азия-Тынық мұхит өңірінде көш бастап келе жатқаны қалай айтқанда да ауыз толтырарлық жай. Вьетнамның халықаралық аренадағы беделі де биік. Ел дүние саясатына белсене араласып жүр. Былайша қарағанда жердің бір түбінде жатқандай, ол кезде Қазақстанмен қарым-қатынасы атымен жоқ Вьетнамның біздің еліміздің тәуелсіздігін таныған елдердің алдыңғы легінен табылғаны (1991 жылғы 27 желтоқсанда, яғни он бір күннен кейін), Қазақстанмен дипломатиялық қатынастар орнатушылардың арасында да алғашқылардың бірі болғаны (1992 жылғы 29 маусымда, яғни жеті айдан кейін) тіпті де тегін емес, осы арқылы да бұл ел азаттыққа ұмтылудың қадір-қасиетін өзгелерден бөлекше бағалайтынын білдіргендей. Елбасымыз ресми сапар бағдарламасын Ұлттық батырлар монументіне барып, азаттық жолында құрбан болғандар рухына тағзым етуден, елдің тәуелсіздігіне қол жеткізген тұңғыш Президент Хо Ши Миннің мавзолейіне гүл шоғын қоюдан бастады. Ел көсемі 1945 жылғы 2 қыркүйекте өзі Тәуелсіздік декларациясын жұрт алдында оқып беріп, Вьетнам Демократиялық Республикасы құрылғанын жария еткен Бадинь алаңында жерленген екен. Денесі бальзамдалып қойылыпты. Дәл сол жерге тұрғызылып, құрылысы 1975 жылы біткен Хо Ши Мин мавзолейі алыстан онша үлкен көрінбегенімен, түбіне тақасаң әжептәуір қомақты-ақ: биіктігі 21, ені 41 метр, айналасында елдің әр қиырынан алдыртылған 250 түрлі ағаш егілген көлемді бақ бар. Ғимараттың кәдімгі Мәскеудегі Ленин мавзолейін үлгі етіп жасалғаны көрініп-ақ тұр. Айтқандай, мұнда қаланың ортасында Ленин ескерткіші асқақтайды. Вьетнамдықтардың елдің социализм жолына түсуіне шешуші ықпал еткен тұлғаны құрмет тұтатын жөні де бар. Француз отаршылдығына қарсы күресте де, американ империализміне қарсы күресте де Ленин елінің ықпалы да, көмегі де көп болғанын бұлар жақсы біледі. Нұрсұлтан Назарбаевпен кездесу кезінде Чыонг Тан Шанг Қазақстанның тәуелсіздік жылдарындағы табыстары таңданарлықтай екенін қадап айтты, Елбасымызды егемен елдің жиырма жылдығымен құттықтай келіп, екі мемлекеттің сауда-экономикалық қатынастары алдағы кезде қазіргіден анағұрлым арта алатынын айтты. Онысы рас енді. Өткен жылы, мысалы, екі елдің сауда айналымының көлемі небәрі 44 миллион АҚШ долларына тең болыпты. Тіпті мардымсыз ғой. Қазақстан мен Вьетнамның әлеуетіне атымен сай келмейді. Кейінгі кездегі қадамдардың ішінен «Қазмұнайгаз» бен «Петровьетнам» арасында 2009 жылы құрылған жұмыс тобын ғана атай аламыз. Енді бұл қатынастар бұрынғыдай сылбырлау жалғаса бермейтін сияқты. Кеше осында қол қойылған алты құжат – Қазақстан Республикасы мен Вьетнам Социалистік Республикасы арасындағы азаматтық және коммерциялық істер бойынша өзара көмек жөніндегі келісім; Қазақстан Үкіметі мен ВСР Үкіметі арасындағы білім беру саласы бойынша ынтымақтастық жөніндегі келісім; Қазақстан Үкіметі мен ВСР Үкіметі арасындағы қосарланған салықты болдырмау жөніндегі келісім; Қазақстан Үкіметі мен ВСР Үкіметі арасындағы туризм саласы бойынша ынтымақтастық жөніндегі келісім; Қазақстан Республикасының Көлік және коммуникациялар министрлігі мен Вьетнамның Көлік министрлігі арасындағы азаматтық авиация саласы бойынша ынтымақтастық жөніндегі келісім; Алматы қаласы мен Хошимин қаласының Халық комитеті арасындағы өзара түсіністік жөніндегі меморандум таяу жылдардың өзінде солай болады деген сенім ұялатады көңілге. Аталған құжаттарға біздің тарапымыздан Әділет министрі Р.Түсіпбеков, Сыртқы істер министрі Е.Қазыханов, Туризм және спорт министрі Т.Ермегияев, Көлік және коммуникация министрі Б.Камалиев, Алматы қаласының әкімі А.Есімов қол қойды. Рәсім аяқталғаннан кейін Нұрсұлтан Назарбаев пен Чыонг Тан Шанг журналистер алдында жасаған мәлімдемелерінде бұл сапардың тарихи сипаты бар екенін, екі елдің қарым-қатынастарында жаңа белес басталғалы тұрғанын бірауыздан айтты. «Жаңа ғана жоғары деңгейдегі ашық, өзара сенімді үнқатысу аяқталды. Ынтымақтастығымыздың басымдықтары дәл айқындалды. Екі елдің халықтарын татулықтың, тілектестіктің тарихи берік тіндері байланыстырып тұр. Қазақстан-Вьетнам қарым-қатынастарын қарқынды дамытуға барлық қажетті жағдайлар жасалды. Біздің елдеріміздің арасында шешімін таппаған ешқандай мәселе жоқ. Ең алдымен екіжақты сауданы жолға қоюымыз керек», деді Нұрсұлтан Әбішұлы. Қазақстан Президенті сөзінің соңында журналистерді таяу уақытта Ханойда біздің елшілігіміз ашылатынынан да хабардар етіп өтті. Қазірше бұл міндетті Икрам Адырбеков Бейжіңдегі миссиясымен қоса атқарады. Ханойда елшілік ашу өте орынды шешім, әрине. Қытайдағы елшілік қызмет басқа жұмыспен қабаттастыра жүргізетін жұмыс еместігін айтудың өзі артық. Оның үстіне Вьетнам Қазақстандағы өз елшілігін мұнан үш жыл бұрын ашып та қойған. Тағы бір айта кетер жай мынау: алдағы кезде екі елдің арасында тұрақты әуе рейстерін ашу да ойластырылып жатыр. Бұл мәселе әлі толық пісіп-жетіле де қоймаған сыңайлы, дегенмен, іскерлік байланыстар үшін де, туризмді дамыту үшін де мұның мәні үлкен екендігі анық. Елбасымыздың бүкіл әлемдегі биік беделіне біз вьетнамдық іскер топтардың ірі өкілдерімен сөйлескенде тағы көз жеткізе түстік. Құрамына елдің 33 кәсіпорны кіретін «Thaison group» вице-президенті Пхам Гап қазақстандық журналистерге берген сұхбатында Нұрсұлтан Назарбаевтың ел экономикасын дамытудағы ерен еңбегін ерекше айтты. Екі ел президенттерінің аз аядағы кездесуі өтіп жатқан кезде біз Премьер-Министрдің орынбасары – Индустрия және жаңа технологиялар министрі Ә.Исекешевпен, «Қазақмыс» басшысы В.Киммен қысқа-қайырым тілдесіп қалдық. Әсет Өрентайұлы бұл елмен экономикалық ынтымақтастықтың көкжиегі кең екенін нақты мысалдармен әңгімелеп берді, В.Ким дәл өзінің саласы бойынша дәл қазір нақтылы әріптестер таба қоймағанын, әйтсе де мұндағы арзан жұмыс күші қазақстандық инвесторларды қызықтырып отырғанын айтты. «Бұл елде қазірше банктердің құны өте төмен. Көзін тапқан адам банк сатып алу арқылы-ақ байып кете алады», деп қояды В.Ким. Біледі, білгеннен кейін айтады ғой. Кеше түстен кейін алғашқы Қазақстан-Вьетнам бизнес-форумы болып өтті. Біраз жайдың басы сол жиында ашылды. Қазақстандықтардан 39 адам, вьетнамдықтардан 103 адам қатысқан Ханой форумының ашылуында біздің тарапымыздан Премьер-Министрдің орынбасары – Индустрия және жаңа технологиялар министрі Ә.Исекешев пен еліміздің Сауда-өнеркәсіптік палатасының басшысы Қанат Төлеметов сөз сөйледі. Айтқандай, Қанат бауырымыз өмірден ерте өткен айтулы азамат, депутат ретінде де, меценат ретінде соңында ізгі із қалдырған Қуаныш Төлеметовтің ұлы көрінеді. Сауда-экономикалық палатаның мүшелері қатарында меншік түрі әрқилы мыңнан астам кәсіпорын бар екен. Үлкен күш. Әсет Исекешев бастап келген іскер топтың құрамында 12 министрлік пен ведомствоның, 15 компанияның 47 өкілі бар болып шықты. Олардың да өз әріптестерімен нақтылы уағдаластықтарға қол жеткізу мүмкіндігі мол. Кеше кешке қарай Нұрсұлтан Назарбаев Вьетнам Коммунистік партиясы Орталық комитетінің Бас хатшысы Нгуен Фу Чонгпен, Ұлттық Ассамблеяның Төрағасы Нгуен Шинь Хунгпен кездесті. Ол кездесулер жайында келесі нөмірде әңгімелейміз. Мақаланың өн бойына біз келген елдің экономикадағы табыстары арқау болып тартылып жатқанын көріп отырсыз. Әрине, Вьетнам халқының табыстарын жоғары бағалағанда біз бәрін де салыстырмалы түрде айтамыз. Ханойда ескі құрылыстың көптігіне де куә болып келеміз, халықтың киінуінен де онша шалқып-толудың белгісін таба қоймайсыз, орташа айлықтың екі жүз доллардан сәл ғана асатынын да естіп жатырмыз, мұндағы жұрттың көбінің жеке көліктен қолы жеткен жері мопедтер екенін де, бар тұрқы бір метрлік сол көлікке үш адам мінгесіп алатынын да көріп отырмыз. Сонымен бірге біз вьетнамдықтардың көңілі көтеріңкі, рухы жоғары екенін де, ертеңгі күннен үмітті, келешекке сенімді екенін де сезіп тұрмыз. Қазіргі заманның жағдайында бүкіл планета көлемінде ішкі жалпы өнімнің жылдық өсім қарқыны жөнінен алдыңғы орындардың бірін мұнан қырық жылдай бұрын жерінде адам айтқысыз алапат соғыс аяқталған Вьетнам елі иеленіп отырғанын ойлағанда Уақыттың қандай ұлы емші екенін тереңірек түйсіне түсесің. Иә, уақыт жазбайтын жара жоқ екен. Біз Ханойға келгелі осыған тағы бір көз жеткізіп жатырмыз. Дүние дидарындағы ең қуатты елмен оншақты жыл бойы жан алысып, жан берісіп айқасқан, бүкіл адамзатқа қайсарлықтың қайран қалдырарлық үлгісін, шамырқанған шақарлықтың шыңын көрсетіп, ақыр аяғында қаруы да көп, қаржысы да қыруар америкалықтарды жат жердегі мәнсіз-мағынасыз соғысты тоқтатып, масқарашылықпен елді тастап шығуға мәжбүрлеген осы шағын мемлекет кешегі қан-қасаптың жарасын жалап жазып, соғыстан тас-талқаны шыға қираған шаруашылығын қалпына келтіріп, еңсесін көтеріп, бойын тіктеп, ойын жіктеп, санын түгендеп қана қоймай, анағұрлым асырып, жаһанданудың жанталасына да шыдас беріп, бейбіт өмірде де жаңа жеңістерге жетіп жатыр. 86 миллион халқы бар, тек астанасының өзінде 9 миллион адам тұратын елдің қазіргі таңда азық-түлік мәселесін шешіп, артылған астығын сыртқа сатып, күріш экспорты бойынша әлемдегі алдыңғы орындардың біріне шыққанын айтсақ та, Вьетнам тұрғындарының жетпіс пайызын бүгінде жасы отызға толмағандар құрайтынын айтсақ та мұндағы отаншылдықтың ғаламат қуатын көре аламыз, бәрінен бұрын – тәуелсіздігін қадірлеген халықтың қолынан қандайлық ұлы істер келетінін сезінеміз. Вьетнам елінің бізге берер басты тағылымы да осы.Тәуелсіздік тегеуріні бұл. Суреттерді түсіргендер С.БОНДАРЕНКО, Б.ОТАРБАЕВ.
•
01 Қараша, 2011
Тәуелсіздік тегеуріні
368 рет
көрсетілді