Әркімнің алар биігі әр қиядан көз тартып тұрады. Оны біреу ерте, біреу кеш бағындырады. Былайғы жұрттың бақ жұлдызы ерте жанған адамдарға таңырқап жататыны содан болса керек. Біз мына дүниеде не істедік, қандай із қалдырдық деп өз-өзімізге сұрақ қоятын шақ туындарына да ешкім дау айта қоймас. Осы орайда мен өзімнің атам Ғаріпжан Қожахметұлы Досымбековтің өзгеше тағдырын сөз етсем деймін. Оның тағдыр-талайы сол уақыттағы өзге адамдардікі секілді жалпыға ортақ идеяға тәуелді болды. Алайда ол әрдайым өз көзқарасын, өз ұстанымын қорғай білетін тұлға екен. Бәлкім, тап сол бірбеткей мінезі үшін де шығар, 1956 жылы жалдамалы қылмыскердің қолынан қаза тапқаны.
Ғ.Досымбековтің 100 жылдығына орай мен ол кісінің өмірі, атқарған істері туралы естігендеріммен бөліссем деп едім. Естігендеріммен деп отырған себебім, мен атамды көзі тірісінде көре алмадым. Ол кісі жайында көбінесе анам әңгімелейтін.
Менің ата-бабаларым Семей облысының Белағаш ауданынан сонау Батыс Сібір өлкесіне 1903 жылы қоныс аударады. Ғ.Досымбеков сонда дүниеге келеді. Қазіргі таңда бұл жер Алтай өңірінің Құлынды ауданының Қаракөл ауылы деп аталады. Патшалық Ресейдің отарлау саясатына байланысты қазақтардың біраз бөлігі өз туған жерлерінен Құлынды даласына қоныс аударылған. Менің ата-бабаларым осылайша 1946 жылға дейін осы өлкеде ғұмыр кешеді. 1916 жылы кенжесі Қабду-Уахит дүниеге келісімен, анасы дүниеден озады. Сол кезде Ғаріпжан Қожахметұлы 5 жаста еді. Балалардың балалық шағы аштықпен, қиыншылықпен өтеді, бірақ аналық мейірім мен ыстық ықыластан кенде қалмайды. Себебі, әкесі үлкен жүректі, мейірімді жас келіншекке үйленеді.
Кеңес өкіметінің арқасында атам ауыл мектебінде оқиды (1918 ж.), сонан соң Ключев ауданының жастар шаруа мектебін тәмамдап шығады. Анамның айтуы бойынша, 1930 жылдары зерделі жастардың сауатын кеңейту мақсатында арнайы курстар ұйымдастырыла бастайды. Осындай курстарды бітіріп шыққан азаматтар идеологиялық жағынан сауатты саналады екен. Насихатшылар курсын Ор қаласында аяқтаған Ғ.Досымбеков Батыс Сібір өлкесінің Құрылтай ауылдық округіне насихатшы және Ключев ауданы оқу залының меңгерушісі ретінде жіберіледі. Алайда, Ғаріпжан Қожахметұлы өзінің идеологиялық біліміне қанағаттанбай, 1931 жылы Омбы қаласында агротехник мамандығын алып шыққан соң, 1934 жылға дейін Алтай өлкесінің Құлынды және Ключев аудандарында мәшине-көлік стансалар жүйесінде еңбек етеді.
1934 жылы ол атамекені – Қазақстанға жіберіледі. Алматы қаласындағы «Каучуконос» трест жүйесінде тресті жабдықтау бойынша аға жауапты орындаушы болады. Кейінірек «Каучуконос» тұқым базасы директорының орынбасары, сонан соң директоры қызметін атқарады. Сондай-ақ Алматы облысының Іліт ауданындағы №13 «Каучукопромхоз» директорының орынбасары болады. Сөйтіп, елді өркендетуге елеулі үлес қосады.
КСРО-ның астық және мақта өсіру салаларын көтеру саясаты кезеңінде Ғ.Досымбеков Оңтүстік Қазақстан облысына жіберіледі. Бұл – аласапыран қызып жатқан 1937 жыл болатын. Сол жылдары атам әуелі орынбасар, содан соң бастық болған «Заготзерно» пунктінің жұмысшыларды тамақпен қамтамасыз етуде айтарлықтай зор стратегиялық маңызы бар екен.
1939 жылғы наурыз айында Ғ.Досымбеков Келес ауданы атқару комитетінің хатшысы, ал шілде айында Сарыағаш аудандық атқару комитетінің төраға орынбасары болып сайланады. Партияға қабылданады. 1940 жылы Оңтүстік Қазақстан облыстық атқару комитетінің жауапты хатшысы болып сайланады да, аз уақытта кеңес жұмысын дөңгелетіп әкетеді.
Атам адамдарды адамгершілігіне қарай бағалай білетін және кемшілікті көзіне тіке айтатын талапшыл да әділ адам болған көрінеді. Мұндай басшылардың әрдайым биліктің назарында тұрғаны белгілі. 1941 жылы Ғаріпжан Қожахметұлы Келес аудандық атқару комитетінің төрағасы болып сайланады. Соғыс жылдары ол басқарған аудан майданға қажет өнімдерді жеткізіп тұрады.
Соғыстан кейін Ғаріпжан Қожахметұлы Қазақ КСР Жоғарғы Кеңесі Президиумының ақпараттық-статистикалық бөлімінің меңгерушілігіне тағайындалады. Сол жылдары Қазақ КСР ақпараттық-статистикалық жүйесін қайта ретке келтіру Үкіметтің маңызды тапсырмасының бірі болады. Адал еңбегіне орай Қазақ КСР Жоғарғы Кеңесінің Құрмет грамотасымен марапатталады. Ғаріпжан ата 1949 жылы, Жамбыл облыстық атқару комитеті төрағасының орынбасары қызметін атқарған кезінде мал шаруашылығын алдыңғы орынға шығарып, осы саланың дамуына да өз үлесін қосады. 1954 жылы ҚазМУ-ді сырттай және Жоғары партия мектебін бітіріп шығады.
Сол жылдары БАҚ-тарда «Коммунистің жаны таза, ақылы дана», «Көптің көзі көреген» және т.б. насихаттық сөздердің көп айтылғанын білеміз. Сол дәуірдің азаматтары үшін қателікке ұшырамайтын дос та, жетекші де партия болғаны анық-тын. Бұл кезең де өзінше бір дәуір ретінде тарихтан орын алмақ. Ұзақ жылғы еңбек ғұмырбаянында Ғаріпжан атам да жұмысқа деген ынтасын бір жоғалтпаған, тәртіп пен жауапкершілік жібін босаңсытпаған, ар тазалығын әрдайым биік ұстаған жандардың қатарынан саналады.
Қатыгез дұшпандары оның өмірін ерте қиып кетті. Ол дүниеден озған кезде бар-жоғы 45 жаста ғана екен. Бүгінгі таңда өлімінің себебі ғана емес, сондай-ақ досы мен дұшпаны кімдер болғаны, отағасы ретіндегі мінез-құлқы, армандары мен мақсаттары қандай болғаны мен үшін жұмбақ.
Адам – өз дәуірінің түлегі, өз заманының перзенті. Ол қандай қоғамда өмір сүрсе, бойындағы бар қайрат-жігерін сол қоғамның игілігіне жұмсайды. Кешегі коммунистік дәуірдің белсенді патриоты болған ағаларды сол үшін кінәлай алмайсың. Қайта олардың еткен еңбегін, төккен терін бағалай білу, олардың бойындағы отаншылдық сезімді өз бойымызға сіңіре білу, кісілік пен адалдықтарын өнеге тұту – парыз.
Қайрат ЖАҢАБЕРГЕНОВ,
Есіл ауданының әкімі.
Астана.