Жуырда Астанда Қазақстан Сүт одағы «Сүт өнімдерінің сапасы» атты байқау көрмесін өткізді. Оған еліміздің осы саладағы өнім өндіретін онға тарта кәсіпорындары қатысып, өз тауарларын тұтынушыларына тағы бір көрсетті.
Аталмыш шара республикамыздағы сүт өнімдерінен өндірілетін түрлі тағам түрлерін жаңа сапада жасап, тұтынушылар тарапынан тек жақсы деген бағалар алу мақсатында орайластырылса, саладағы түйткілді мәселелер де жиын барысында мамандар мен ғалымдар тарапынан айтылмай қалмады.
– Азық-түлік тағамдарына тұтынушылыр талабы жыл өткен сайын артып келеді. Сүт өнімдерін өндірушілер сенімге ие болу және оны тұрақты түрде ұстап тұру үшін бүгінгі озық менеджмент жүйесін, сондай-ақ сапаны бақылау шараларын өндіріске енгізе отырып, тұрақты түрде өнімнің қауіпсіздігі мен сапасы төңірегіндегі мәселелерді жүйелі шешуі керек. Кейбір қайта өңдеушілер халықаралық озық тәжірибелер негізіндегі инновациялық технологияларды өндіріске енгізе отырып, техникалық қайта құру шараларын жүзеге асырулары қажет. Сонымен қатар, шикізаттың сапалық көрсеткіштері де маңызды. Осыған байланысты сапалы отандық шикізаттарды қажетті көлемде жеткізу мәселелерін шешу үшін жеке меншік мал шаруашылығы базасын дамытуға да барынша көңіл бөлген абзал, – деді жиында Сүт одағының атқарушы директоры Владимир Кожевников.
Ал, елордадағы «Әділет» тұтынушылар құқын қорғау қоғамдық бірлестігінің директоры Қабыкен Закарьянов сауылатын сиырлардың денсаулығы мен жем-шөп базасын қалыптастыру жайында бірқатар ұсыныстарын білдірді. Ғалымдар атынан сөз салған профессор Мариям Алимарданованың салаға қатысты пікірлері де көпшілік көңілінен шықты.
Малдың генетикалық әлеуеті төмендігі осы басқосуда тағы да айтылды. «Бұл тұрғыда Сүт одағының мамандары мал шаруашылығын жетілдіру жөніндегі шаралар шаруашылықтарды ірілендіру және малдың өнімділігін арттыру жұмыстарымен бірге жүргізілуге тиіс. Бүгінде бірқатар мемлекеттік мекемелердің көмегімен заманауи мал шаруашылығы кешендерінің құрылысын салу жөніндегі арнайы бағдарлама жүзеге асырылуда. Бұл кешендер жоғары өнім беретін мал басымен толықтырылып, халықаралық деңгейде жарақтандырылуы керек», – дейді аталған одақтың атқарушы директоры В.Кожевников.
Байқауға отандық ғалымдардың арнайы келуі саладағы кемшін тұстар мен жетістіктерді саралауға және ортақ тәжірибелер алмасуға негіз болды. Кәсіпорындарға өндірісте тәжірибе жүзінде қолдану үшін жаңа инновациялық жобалар қажет десек, оның біздің елімізге отандық рыноктағы басымдықты сақтап қалумен бірге, әсіресе, ұлттық қазақстандық өнімнің экспорттық үлесін арттыруда да маңызы үлкен. Осы ретте бүгіндері дүкендерден сатып алатын сүттің 80 пайызы елімізде өндіріледі. Бұл біздің өнімдеріміздің тұрақты түрде сапасын жақсартып, тек қана өзіміздің рынокта ғана емес, басқа жерлерде де сұранысқа ие болатындығының тамаша көрсеткіші екендігін алға тартады мамандар.
Жиын қорытындысында үздік деген тауар өндірушілер арнайы сертификаттармен марапатталды.
Әбдірахман ҚЫДЫРБЕК,
Суреттерді түсірген Орынбай БАЛМҰРАТ.