Еуразияның жүрегінде бас қаласы Астана аққудай сыланып, тотыдай таранып бой көтеріп келе жатқан Қазақстан – ұлтаралық қатынастардың жоғары мәртебесін түсінген, құрметтеген ел.
Тағдырдың жазуымен географиялық, демографиялық және мәдени тұрғыдан да Еуропа мен Азияның ортасынан орын тепкендіктен Қазақстан көне заманнан бері-ақ әртүрлі діндер мен тарихи дәстүрлердің Отаны болып табылады.
Халқымыздың тарихи жолы және дүрбелеңге толы ХХ ғасырдың рухани ұлағаты жаһандану мен ұлттық бірегейлікке ұмтылу үдерісінің өзара ұшырасуында адамдардың, олардың дүниетанымдары мен мәдениеттерінің өзара түсіністік табуы қажеттігін әр уақытта еске салады. Қазіргі уақытта жаңа биіктерге көтерілу үшін өркениеттер, этностар, ұлттар, конфессиялар, мемлекеттер арасындағы үн қатысудың, халық пен билік, қоғамды дамытудағы модернизм мен дәстүрлердің өзара кірігуі – өте маңызды фактор. Көп ұлтты Қазақстан жағдайында осындай мәселелерді шешудің және іске асырудың пәрменді тетіктерінің бірі – Қазақстан халқы Ассамблеясы.
Аталған қоғамдық ұйым елімізде өмір сүріп, тіршілік етіп отырған барша азаматтардың ұлтына, нәсіліне, тіліне, діліне қарамастан еркіндігін, құқығын, бостандығын қамтамасыз етуді іске асырудың кепілі болып табылады.
Отырарда отыз баб, Түркістанда түмен баб, Сайрамдағы сансыз баб, ең үлкені Арыстанбаб деп дәріптеген, қасиетті Оңтүстік Қазақстанда 108 ұлттың өкілі тұрады. Қазір біздің өлкеде 22 ұлттық мәдени орталық жұмыс істейді. Олардың әрқайсысы өз ұлттарының тілін, салт-дәстүрін жан-жақты насихаттап, адамдардың рухани баюына ықпал етуде. Әсіресе, жас ұрпақтың тәрбиесіне тигізері ықпалы көп.
Облыстағы іргелі оқу орындарының бірі – Оңтүстік Қазақстан мемлекеттік университетінде де 31 ұлттың өкілі білім алуда. Университет ректорының тікелей араласуымен 2003 жылы студенттердің кіші Ассамблеясы құрылған. Ол заңды тіркеуден өткен, өзінің жарғысы мен ережелері бар.
Бұл студенттік Ассамблеяның негізгі мақсаты – ұлтына, діни нанымына қарамастан тең құқықты және рухани бірлік жағдайында студенттердің сапалы білім алуына ықпал ету, әртүрлі ұлттар мен этностардың өкілдерін қазақ тілі мен ұлттық құндылықтарының ұйытқысын сақтай отырып, қазақстандық патриотизм және азаматтық, мәдени-рухани негізде біртұтас дамыту, жетілдіру өркениеттік, демократиялық бастауларға сүйене отырып, студенттердің этникалық және саяси мәдениетін қалыптастыру. Олар Тәуелсіздікті нығайтудың негізгі шарты – әрбір Қазақстан азаматының қатардағы қоғам мүшесі деңгейінен мемлекеттің саналы әрі белсенді азаматы, әрі өз Отанының, халқының нағыз патриоты дәрежесіне көтерілуі деп ұғынады.
Ал, отансүйгіштік – азаматтық санамен қалыптасатын қасиет. Азаматтық сана – біліммен ішкі дүниесін, қуатын жетілдірген, аға ұрпақтың інжу-маржанын бойына сіңірген, туған жері мен елінің рухани-материалдық, мәдени құндылықтарын жан-жақты игерген, жеке мүдде мен болашақ үшін жауапкершілікті өткен мен жас ұрпақ алдындағы парызбен ұштастыра білетін ұлтжанды адам болуды талап ететін құбылыс.
Ұлтжанды азамат бір күнде, бір сәтте туа салмайды. Оның қалыптасуына, пісіп-жетілуіне қоғамдағы көптеген тетіктер өзара ұшыраса, байланыса отырып, ықпал етеді.
Ассамблея мүшелері мұны өте жақсы түсінеді. Әрқайсысы өзі өкілі болып отырған ұлттың мәдениетін, әлеуметтік тәжірибесін, адамаралық қатынастардағы шеберлігін, сонымен қатар, өнерін, бітім-болмыстық ерекшеліктерін басқаларға таныстыруға тырысады.
Әртүрлі халықтардың салт-дәстүрін және тарихын облыс көлемінде, университет аясында дөңгелек үстелдер, пікірталастар, демалыс кештерінде таныстырумен, насихаттаумен айналысады.
Әсіресе, мемлекеттік тілде поэтикалық шығармалар жазу конкурсында көптеген өзге ұлт студенттерінің қазақ тілін жақсы меңгергендігі байқалды. Осы бағыттағы «Тілге құрмет – елге құрмет» деген іс-шаралардың тәрбиелік және танымдық маңызы өте зор болды. ОҚМУ-дің студенті Юрикова Анна «Қазақстан» телеарнасында «Тіл мен дін» деген хабарға қатысып, қазақ тілінде көріністер бейнеледі.
Университетте студенттік Ассамблеяның студенттері қатысқан «Бұл біздің әнұран» тақырыпты патриоттық акциясы, жыл сайын Қазақстан халықтарының достығы мерекесі қарсаңында «Қазақстан – біздің ортақ үйіміз» деп аталатын демалыс кештері студенттерді бұрынғыдан да ортақ бір іске жұмылдыра түсті.. Мұны бәрі патриотизмнің тереңдеп, ұлттар арасындағы достық көңіл мен жарастықтың дамуына жол ашады.
ОҚМУ-дің студенттік кіші Ассамблеясы славян, татар-ингуш этно-мәдени, «Ынтымақ» мәдени орталығымен, Тілдерді дамыту, Әділет департаменттерімен тығыз байланыс орнатқан.
Күні кеше Шымкентте қала тұрғындарының демалып, көңіл көтеруіне жағдай жасалып, жаңа демалыс орны пайда болды. Оның ашылу салтанатына Елбасы Н.Назарбаев қатысты. Осы салтанатты іс-шараның басы-қасында ОҚМУ-дың студенттік Ассамблеясының жүруі біз үшін үлкен мәртебе болды. Олар өнер көрсетіп, мерекенің сәнін келтірді.
Әртүрлі ұлтты, халықты біріктіретін ортақ мақсат – ол Қазақстан Республикасының экономикалық, мәдени, рухани тұрғыдан дамуы, жетілуі және гүлденуі. Осыны өте жақсы түсінетін студенттердің кіші Ассамблеясының мүшелері Қазақстан Тәуелсіздігінің жиырма жылдығын жақсы оқу, өнегелі тәртіп, күнделікті жақсылыққа ұмтылыстары мен лайықты қарсы алуға дайындық жасауда. «Тілі басқа – тілегі бір, жүзі басқа – жүрегі бір» жастарымыздың әлі талай игі істердің ұйытқысы боларына университет ұжымы сенеді.
Назгүл МҰСАЕВА, философия ғылымдарының докторы, профессор, М.Әуезов атындағы Оңтүстік Қазақстан мемлекеттік университетінің кафедра меңгерушісі.
Шымкент.