Кеше Астанадағы Назарбаев Университетінде оқу орны студенттерінің қатысуымен «Жыр – семсер, күй – құдірет, өлең – өрнек» атты қазақтың біртуар қайраткер тұлғалары: Махамбет Өтемісұлы, Құрманғазы Сағырбайұлы және Фариза Оңғарсынованы еске алуға арналған әдеби-сазды кеш өтті. Іс-шара Елбасының «Рухани жаңғыру» бағдарламасы мен Астананың 20 жылдық мерейтойы аясында ұйымдастырылды.
2010 жылы іргесі қаланған әлемдік стандартқа сай білім беретін еліміздегі бірегей жоғары оқу орны – Назарбаев Университеті жастардың сапалы білім алуына жағдай жасап, олардың болашағына жарқын жол ашуда ұшан-теңіз жұмыс атқарып, талай игі бастамаларға мұрындық болып келеді. Соның бірі – «Рухани жаңғыру» мәдени орталығы. Университетте тек жаратылыстану мен медицина бағытында білім алатын жастарды рухани кемелдендіру, ұлтының тарихы мен табиғатын тануда, әрбір студентті ұлтжанды азамат етіп тәрбиелеуде аталмыш орталықтың берер тағылымы мол. Оның бір дәлелі – біз тамашалаған «Жыр – семсер, күй – құдірет, өлең – өрнек» атты әдеби-сазды кеш.
– Мемлекет басшысы Нұрсұлтан Назарбаевтың «Рухани жаңғыру» мақаласында ерекше аталып өткен мәселе – ол өзіңнің тегің мен тамырыңды тану, тарихыңа тағзым етіп, содан тағылым алу. Адам қанша білімді болса да, өз ұлтының болмысы мен төл тарихын білмесе, ол адамның елі үшін еміреніп, Отанына жан жүрегімен қызмет етуі мүмкін емес. Осы себепті де жастарымызды тек жаратылыстану саласымен ғана шектемей, рухани кемелдендіруге, жан-жақты, интеллектуал адам болып ер жетуіне барынша басымдық беріп, сол үшін аянбай жұмыс істеп жатырмыз. Назарбаев Университеті ұжымының басты ұстанымы – осы, – дейді жоба жетекшісі, Назарбаев Университеті жанындағы «Рухани жаңғыру» мәдени орталығының директоры Гүлтас Құрманбай.
Қазақ және ағылшын тілінде қатар жүргізілген әдеби-сазды өнер кешінде студенттер жыр атасы – Махамбет Өтемісұлы, күй атасы – Құрманғазы Сағырбайұлы және поэзия патшайымы – Фариза Оңғарсынованың өмір жолын баяндайтын театрландырылған қызықты қойылымдарын көрермен назарына ұсынды. Сонымен қатар шығармашылық иелерінің өлеңдерін нақышына келтіре оқып, Махамбет пен Құрманғазының рухты күйлерін күмбірлете орындады. Университет ішінен құрылған «NU» (Nazarbaev University) ұлттық аспаптар оркестрінің орындауындағы Махамбеттің «Жұмыр қылыш», Құрманғазының «Сарыарқа», «Серпер» күйлері кешке жиналған қауымның құлақ құрышын қандырды. Профессор Марк Лоуренс пен университеттің алғашқы түлегі Нұрсұлтан Есенқұловтың орындауындағы Ақан Серінің «Балқадиша» әні де көпшілік көңілінен шығып, қоғам қайраткері Оразкүл Асанғазы, ғалым Айгүл Ісмақова және университеттің профессорлық құрамы бастаған көрермендердің ыстық ықыласына бөленді. Осы арқылы Назарбаев Университеті студенттері тек ғылым жолында ғана көшбасшы емес, өнерді игеру мен рухани кемелдену тұрғысында бағытын айқындаған болашақ нағыз зиялы маман екендігін көрсетті.
Махамбет Өтемісұлы, Құрманғазы Сағырбайұлы және Фариза Оңғарсынова шығармашылығын біріктіретін ортақ тін – қазақы рух десек, сол отансүйгіштік сезімді бүгін көздерінде от ойнап, сөздерінен ұшқын атқан жалынды жастардың демінен анық сезіндік. Мамандығын жетік игеріп қана қоймай, елінің тарихы мен ұлтының болмысын танып, талантына тағзым етуге бағытталған талпынысына тәнті болдық.
Назерке ЖҰМАБАЙ, «Егемен Қазақстан»