Кеше Астанадағы Тәуелсіздік сарайында Қазақстан Республикасы Тәуелсіздігінің 20 жылдығына арналған салтанатты жиналыс болып, онда Елбасы Нұрсұлтан Назарбаев сөз сөйледі.
Бұл күні еліміздегі ең үлкен және ең басты сәулетті сарайда Қазақстан Республикасы Тәуелсіздігінің іргетасын қаласып, оны нығайтуға өз деңгейінде атсалысқан еліміздің барлық жақсылары мен жайсаңдары: әлеуметтік-экономикалық және мәдени дамуға үлес қосқан қайраткерлер, өндіріс пен бизнес салаларының үздіктері, ғылым мен өнердің, әскери және құқық қорғаудың, спорттың айтулы өкілдері жиналған екен. Кең сарайдың қай бұрышына қарасаңыз да елімізге белгілі, ұлтымыздың атағынан ат үркетін ұран тұтар азаматтары. Бәрінің де жүздері жарқын, көңілдері шат, бір-бірімен қуана қауышуда. Еліміздің түкпір-түкпірінен келген жандар бір-бірін өмір бойы білетіндей, жақындаса кетсе жатсынбай, қуаныштан нұрланған жүзбен жылы жауаптасуда. Атақты адамдармен суретке түскісі келіп, ұмсына ұмтылып жүргендер қаншама? Олардың көңілге түйген пікірлерін, қуанышты сәттегі жан тебіренісін жазып алуға тырысып жүрген журналистер қаншама?
Жиналған жұрттың бәрі де Қазақ елі Тәуелсіздігінің 20 жылдығына жеткізген, жастары келіп қалғандары соны көрсеткен Жаратқанға іштерінен мың да бір ризашылығын айтатын секілді. Шетелдік қонақтар, олардың арасында дипломаттық корпус пен шетелдік БАҚ өкілдері де қазақстандықтардың шексіз қуанышына қызыға қарап, таңырқай қызықтап жүр.
Сағат тура 15.00 болғанда мәжіліс залына Елбасы Нұрсұлтан Назарбаев кірді. Оны қарсы алып, қуанған халықтың ішкі толқынысы қандай жанға болса да айрықша қуат берерлік күйде еді. Ұзаққа созылған қол соғу аяқталған соң залға Қазақстан Республикасының Мемлекеттік туы мен Президенттің штандарты салтанатты жағдайда енгізілді. Осыдан кейін Қазақстан Тәуелсіздігінің 20 жылдығына арналған салтанатты жиналыс ашық деп жарияланды. Мемлекеттік әнұран орындалғаннан кейін жиналысты жүргізуші, Сенат Төрағасы Қайрат Мәми алғашқы сөзді Елбасы Нұрсұлтан Назарбаевқа берді (Президенттің сөзі жеке беріліп отыр).
Президент сөзін аяқтаған соң алғашқы сөз еңбек ардагері, еліміздің абыз ақсақалдарының бірі Баян Жанғаловқа берілді. Оны мінберге сүйеп шығарған Елбасы Нұрсұлтан Назарбаев: «Егемен Қазақстан» газетіне Тәуелсіздік туралы алғашқы өлеңін шығарған Жамбыл 7 жаста, ал Баян ақсақал 97 жаста деп, қазақтың еңбектеген жасынан еңкейген кәрісіне дейін ұлы тойға үн қосып жатқандарын білдіріп кетті. Мен үш дәуірді бастан өткерген көнемін, деп бастады өзінің сөзін Баян ақсақал. Патша заманында дүниеге келіп, талай ауыртпалықты, алмағайып замандарды бастан кешіп, міне, бүгін Тәуелсіз қазақ елінің абыройы асқақтағанын көріп, Аллаға мың да бір шүкіршілік етіп отырмын. Азаттықтың алғашқы жылдары жадымыздан әлі шыға қойған жоқ. Тағдырдың талқысына түскен елдің еңсесін тіктеуге парасатты пайым, асқан білік керек болды. Тәуелсіздікті сақтау, егемен мемлекетті орнықтыру үшін көреген көсем қажет еді. Сол кезде еншісін алған елдің көшін Сіз бастап, оны көлікті қылып, керегесі мықты, көрікті мемлекет орнаттыңыз. Ұлтты ұйыстырып, оны бірлігі мықты ынтымақты елге айналдыра білдіңіз, деді ол Елбасы Н.Назарбаевқа қарап. «Сүйер ұлың болса – сен сүй, сүйінерге жарар ол» деп ұлы Абай айтқандай, Сіз халқыңыздың арқа тұтар панасы, мақтан тұтар данасы болдыңыз. Қазақстан айдай әлемге танылған абыройлы мемлекетке айналды. Сіз мұратыңызға жеттіңіз, Қазақ деген елді дүйім әлемге әйгілі еттіңіз. Сіздің ерен еңбегіңізді қазір әлем жұртшылығы тегіс мойындауда. Сіз дәуірдің дарабозы, ғасырдың ерен тұлғасысыз. Халқыңызды жарқын болашаққа бастай беріңіз, деді ақсақал.
Сөз арасында ол өзінің алғаш рет Нұрсұлтан Назарбаевпен қалай танысқанын да әңгімелеп берді. Оның «ассалаумағалейкум» деп сол компартияның дәурені жүріп, қазақшылықтың заманы құрып тұрған кездің өзінде қазақша қол бергенінен көп үміт етіп қалғанын ауызға алды. Мен жыр алыбы Жамбыл секілді жүзге жетеғабыл жанмын. Осы мерекелік сәтте жүрекжарды тілегімді айтайын, дей келіп, ақсақал Президентке басыңыздан бағыңыз, астыңыздан тағыңыз таймасын, берекелі ісіңіздің жемісін көріңіз, еліміз дүние жүзінің алды болсын, Тәуелсіздігіміз мәңгі болсын! деп батасын берді.
Ақсақал сөзін аяқтаған соң жиналыс төрағасы Қайрат Мәми Қазақстан Президентінің атына Тәуелсіздіктің 20 жылдығына орай шетелдік мемлекеттер басшылары мен халықаралық ұйымдар төрағаларынан келіп жатқан құттықтаулардың бірқатарын оқып берді.
Парламент Сенатының депутаты, «Халық Қаһарманы» Мұхтар Алтынбаевтың сөзі Елбасыға бағытталды. Тәуелсіздіктің жолы даңғыл болған жоқ. Бірақ кездескен қиындықтардың бәрін Сіздің дана басшылығыңыз арқылы жеңе білдік. Бүгінде Сіз айқындаған мемлекеттік даму стратегиясының дұрыстығына дүйім жұрттың көзі жетті, деді сенатор.
Сіз ядролық қарудан бірінші болып бас тартып, бейбіт ел екенімізді дүние жүзіне дәлелдедіңіз. Ұлан-ғайыр даламыздың заң жүзінде тұңғыш рет шекарасын айқындап, іргемізді бекіттіңіз, дей келіп, кең байтақ Қазақстан жерінің шекаралық шеңбер бойында тату көршілігі қалыптасқанын, жиырма жыл ішінде ұлттық қауіпсіздікті қамтамасыз етуде үлкен нәтижелерге қол жетіп, Тәуелсіздігімізді қорғайтын айбарлы әскеріміздің жасақталғанын, сарбаздар мен сардарлардың еліміздің шекарасы мен тыныштығын қас қақпай күзетіп тұрғанына тоқталды. Әрі қарай елімізді түрлі дағдарыстардан аман алып шығудағы Елбасының рөліне мән бере келе, Қазақстан бейбітшілік пен келісімнің, тұрақтылық пен тыныштықтың ұлағатты мекеніне айналды, осының бәрі саяси тұлғасы биік Ұлт көшбасшысының арқасында жүзеге асты, Сіздің 20 жылда атқарған ісіңіз теңдесі жоқ ғажайып саяси ерлік болып саналады, деді
Мұхтар Қапашұлы ел жүрегі Астананың Арқа төсіне сонау қиын кезде көшіп, қазіргідей өсуін айта келе «Астана сіздің ерлігіңіздің жарқын көрінісі. Сондықтан барша Қазақстан халқы Өзіңізді Халық Қаһарманы деп есептейді.
Қазақстан бүгін іргесі берік, ынтымағы жарасқан, экономикасы қуатты, саяси жүйесі сараланған, өз жолын, өз болашағын айқындаған әлемдік қауымдастық алдындағы беделі биік мемлекет. Оның туған халқын заманның сан-алуан сынынан аман алып шығып, биіктен-биікке бастап келе жатқан, елі сүйген – елін сүйген Елбасы бар», деді. Мұнан соң шешен Тәуелсіздіктің 20 жылы – бұл барша халықтың табанды еңбегінің 20 жылдық жеңісі және табысы екенін, Қазақстан Республикасы Тәуелсіздігінің жиырма жылдығы декларациясында айтылғанындай, барлығыңызды бүгінгі ұлы күнмен құттықтаймын, дей келе осы 20 жылдың екі ғасырды сыйдырғанына, ал олардың Елбасы өміріндегі үлкен дәуір екеніне тоқталды. Өзім әскери адам болғандықтан, Жоғарғы Бас қолбасшы қабылдаған дұрыс стратегия мен тактиканың қандай маңызды екенін білемін деген ол әрі қарай «Егер ол дұрыс болса табыстың сені айналып өтпейтінін анық білемін. 20 жыл ішінде Сіз, Нұрсұлтан Әбішұлы, мүмкін еместі мүмкін еттіңіз. Сіз тек Ұлы Көшбасшы атқаратын істерді атқардыңыз. Сіз бұған дейін болмаған жаңа мемлекетті, жаңа экономиканы, жаңа елорданы салдыңыз. Енді 2012 жылдан бастап біз мемлекеттік мереке – Қазақстан Республикасы Тұңғыш Президенті күнін 1 желтоқсанда мейрамдайтын боламыз», дей келе, өткен тарихымыздағы бабалар ерлігін де тілге тиек етті.
Біздің батыр бабаларымыз Отан үшін шайқасты. Олар қазақ жерінде азаттықтың таңы атып, тәуелсіздіктің күні туатынына сенді. Біз бүгін сол үміттердің ақталғанын көзімізбен көріп отырмыз. Ел егемендігі бекем. Экономика өсу үстінде. Қазақстан Республикасының шекарасы берік қорғауда, заманауи қорғаныс қуаты бар әскер жасақталды. Біздің әскеріміз тәуелсіздікті күзетіп, халықтың жасампаз еңбегін қорғауда. Осының барлығы елді бастаған нағыз Саяси көшбасшы – Елбасының арқасында мүмкін болды, деген Мұхтар Қапашұлы Нұрсұлтан Әбішұлының елді адастырмайтын даңғыл жолмен алып келе жатқанына тоқталып, Сіздің 20 жыл ішінде атқарған істеріңіз ұлттық және жаһандық өлшемдегі саяси ерлік, сондықтан да халқыңыз Сізді өзінің Елбасы санайды және бүкіл халық Сізді шын мәнінде қаһарман Халық батыры санайды. Сіз бойыңыздағы қарапайымдық қасиетіңізбен «Халық Қаһарманы» атағынан да, заңнан да бас тарттыңыз. Ол түсінікті, алайда біздің өз пікірімізде қалуымызға рұқсат етіңіз, деген ол Сіз қалай айтқанда да «Халық Қаһарманы» атын иеленуге толық құқылысыз, деп сөзінің соңын барша қазақстандықтарды мерекемен құттықтаумен аяқтады.
Мұнан соң мінберге Тәуелсіздік құрдастары көтерілді. Залда отырғандардың назары енді таза қазақ тілінде «Мәртебелі Нұрсұлтан Әбішұлы! Құрметті отандастар!» – деп сөз бастаған Анна Данченкоға ауды. Мен Қазақстан жастары, Тәуелсіздіктің төл құрдастары атынан сіздердің алдарыңызда сөз сөйлеп тұрғаныма қуаныштымын. Біздің буын қастерлі Тәуелсіздік тұсында дүниеге келген шын мәнінде бақытты ұрпақ, өйткені, жарқын болашағымыздың баянды болуы үшін елімізде барлық жағдай жасалған. Мұны кез келген мемлекет мақтанып айта алмайды. Ал біз болсақ, татулық пен тұрақтылықтың алтын бесігіне айналған Тәуелсіз Қазақстанда ғұмыр кешіп, еліміздің өсіп-өркендеуіне өз үлесімізді қосу үшін білім алып, еңбек етіп келеміз, деген оның әрбір сөзі нанымды шығып жатты. Тәуелсіздік құрдасы әрі қарайғы сөзінде қасиетті мекен Қазақстанның көптеген этнос өкілдерінің берекелі босағасы, жазиралы Жерұйығына айналғанын айтып, әр ұлттың келбеті мен болмысы, салт санасы мен дәстүрі ұлттық мәдениет пен тілінде жатыр, деді.
Осы орайда А.Данченко тәуелсіз елдің елдігінің, жас ұрпақтың парасатты да білімді, іскер де қабілетті, отаншыл әрі мемлекетшіл тұлға ретінде қалыптасуында мемлекеттік тілдің атқаратын қызметіне тоқталып, міне, өздеріңіздің алдарыңызда тұрып, қолымды жүрегімнің тұсына қойып: «Мен бақыттымын! Мен Қазақ елімен, қазақ тілімен бақыттымын», деп асқақ мақтанышпен айта аламын. Құдай қаласа, қазақ жерінің келіні болып, қазақы дәстүрмен ұл-қыздарымды тәрбиелесем деп армандаймын. Қазақтың киелі қара домбырасын қолыма ұстап, Құрманғазының күйлерін шертіп өскен менің ұлтым қазақ болмаса да жаным – қазақ. Қазақстан – туған жерім, қасиетті кіндік кескен Отаным. Мемлекетіміздің әрбір табысын біз жастар, өз жеңісіміз деп біліп мақтан тұтамыз, әр құтты қадамына жан-жүрегімізбен қуанамыз, деді мінберде толқи тұрып. Мұнан соң тәуелсіздік құрдасы А.Данченко Елбасыға қарап: «Елде жүзеге асып келе жатқан барлық жасампаз істердің басында Сіз өзіңіз тұрсыз. Бізді осындай бақытты күнге жеткізгеніңіз үшін Сізге деген алғысымыз шексіз. Сіз 20 жыл ішінде кірпішке кірпіш қалап сәулетті үй тұрғызғандай, құтты шаңырағымыз – киелі Қазақстанның Бас Сәулеткерісіз! Сондықтан біз, жастар, әрдайым өзіңізге қарап бой түзейміз. «Адамзаттың бәрін сүй, бауырым деп», дегенді 100 жыл бұрын ұлы Абай айтып кетсе де, Сіздің «Қазақстан жолы» атты кітабыңыз біз үшін Абайдың «Қара сөздері» сияқты өмірлік нұсқаулығымыз. Өйткені, мәдениет, ұлт даналығы, білімге құштарлық секілді сөздер байқаған адамға, осы кітаптың әрбір жолының астарында жатыр. Сол себепті жастар арасында сілкініс туғызып, жаңа өмірге, жаңа қадам басуға бірден-бір септігін тигізетін бұл кітап жастардың сүйікті кітабына айналды, деді.
Әрі қарай шешен қыз Елбасыға: «Өзіңіз қалыптастырған өнегелі дәстүрге әрдайым адал болуға тырысамыз. Бойымыздағы бар біліміміз бен жастығымызды арнаймыз. Сіздің бар сеніміңізді ақтаймыз деп уәде беремін. Сөзімді өзімнің жазған өлең шумақтарымен аяқтағым келіп отыр», деп мінберден саңқылдатып өлең оқып кетті.
Туған жерім, кең байтағым, бесігім,
Қайда жүрсем мақтан етем есімін.
Қасиетті кіндік кескен мен үшін
Қазақстан Елбасымен бұл қос ұғым,
– деп басталатын жыр жолдарын аяқтағанда зал ішін қол шапалағы кернеп кетті.
Тәуелсіздіктің тағы бір құрдасы, «Жасыл ел» студенттік құрылыс және жастар еңбек отрядтарының Астана қалалық филиалының төрағасы Рахат Хамидуллин: Тереңнен бастау алған сан ғасырлық тарих қойнауында ерліктің, өрліктің өшпес ізін қалдырған, туды қолдан бермеген, ұлы даланы қоныс еткен өр мінезді батыр баба ұрпақтары армысыздар, деп бастады өзінің сөзін. Бүгін ата-бабаларымыз сан ғасырлар бойы аңсаған, Елбасымыз жүзеге асырған Тәуелсіздігімізге 20 жыл толып отыр. Бейбітшілік пен тұрақтылық салтанат құрған, береке мен бірлігіміз жарасқан егемен еліміз, Тәуелсіз Қазақстанның төл мерекесі құтты болсын, ағайын, деді ол. Одан әрі Президенттің сөзіндегі жастарға арналған тілек пен үміттерге тоқталып, олардың өз көңілінен шығатынын жеткізді. Бүгінгі күні Қазақстан бүкіл әлемге әйгілі ел. Бұл табысқа Қазақстан Президентінің орасан еңбегінің арқасында қол жеткізілгенін біз жақсы түсінеміз. Біздің елімізде жастардың білім алуы мен еңбек етуіне барлық жағдайлар жасалған. Соның ішінде бірқатарын ғана айтар болсақ, олар: әлемнің айтулы жоо-ларында білім алуға мүмкіндік беретін «Болашақ» бағдарламасы, дүние жүзінің ең мықты деген оқу орындарымен қатар түсетін «Назарбаев Университеті», «Дипломмен – ауылға» бағдарламасы және т.б. Мұндайды біздің бабаларымыз тіпті армандамаған да еді. Одан әрі Рахат өзі жұмыс істейтін «Жасыл ел» қозғалысы туралы әңгімеледі. 2011 жылы «Жасыл ел» қозғалысының сарбаздары Астананың жасыл белдеуінде, «Батыс Еуропа – Батыс Қытай» халықаралық автожол магистралі құрылысында еңбек етіп, табыс тапты, деді ол. Сіз бірде-бір қала мен елді мекен тұрғындарын назарыңыздан тыс қалдырмадыңыз. Біздің жүрегімізде сіздің «Қазақстанды сүю деген сөз оны үнемі жүректеріңде ұстау» деген аталы сөзіңіз жатталып қалды. Біз Отанымызды әрқашанда жүрегімізде ұстаймыз, деді ұлан. Одан арғы сөзінде Р.Хамидуллин Елбасына бізді алға бастай беріңіз, біз сізбен алдағы биік белестер мен жаңа жеңістерге бірге баруға әзірміз. Сіз бір сөзіңізде: «Еліміздің болашағы жастардың қолында. Бүгінгі игі істерімізді жалғастыратын сіздер боласыздар», деген едіңіз. Біз Сіздің үмітіңізді ақтауға, елдік салт-дәстүрімізді сақтауға, тәуелсіздік мұраттарын жалғастыруға әрқашанда әзірміз, деп сөзін аяқтады.
Бұдан кейінгі кезекте сөз тізгінін Астана қаласының әкімі Иманғали Тасмағамбетов алды. Аса мәртебелі Нұрсұлтан Әбішұлы! Ардақты да арқалы қауым! Сөзімді атадан қалған абыз оймен бастағанды жөн көріп отырмын. «Ерге де, елге де тән бір ұлы сезім бар. Ол – арман». Адамның арманы – риясыз өмір болса, халықтың арманы – тәуелсіз ғұмыр, деп бастады сөзін әкім. Расында да, Тәуелсіздік пен Теңдік, Азаттық пен Елдік, Береке мен Бірлік қай халық үшін де аса қымбат ұғымдар. Ал Қазақстан үшін соңғы жиырма жылда жеңісін де, жемісін де көрсете білген құрыштай құндылық. Орындалған Ұлы Арман. Осылайша шешен тілмен сөз тиегін ағытқан Иманғали Нұрғалиұлы Тәуелсіздік ұғымы, Тәуелсіздік құндылығы жайындағы өз көкейіндегі ой-байламымен бөлісті. Осынау өзгелер ғасырлап өтсе, енді біреулер аңсап кететін тарихи жолды біз небәрі ширек жаста жүріп шықтық. Созылған соғыссыз, ортайған ортасыз, күл болған шоқсыз өттік. Бұл тек киесі күшті Ел мен даналығы дара Елбасының, сол Елбасыға сенген әз халықтың ғана қолынан келген, ерекше тарих. Жасампаз тағдыр, деді ол.
Бұдан кейін И.Тасмағамбетов Тәуелсіздіктің қандайлық қиын сынақтармен келгенін, оған халықтың қалай қол жеткізгенін тілге тиек етті. Елбасымыз өз баяндамасында атап өткендей, арғы-бергі замандарда тарихтың толқыны мен жаугершіліктің жойқыны жұтқан небір ел мен жер болды. Атажұрты тарылып, көбейген елден төбелдей елге айналғаны қаншама. Кезінде біз де ұлт ретінде жер бетінен жойылып кете жаздадық. Ақтабан халықтың «Қаратаудың басынан көш келеді» деп зарлағаны да, бабаларымыздың жер тіреніп, «Еділді келіп алғаны – етекке қолды салғаны, Жайықты келіп алғаны – жағаға қолды салғаны» деп жырлағаны да бар қазақтың жадында. Араға үш ғасыр салып сол күпті көңіл, алаң күй тәуелсіздіктің таңында тағы да туды. Осы тұста Елбасы астананы Алатаудан Арқаға көшірмегенде, қазақ ендігі «Еділді» емес, «Есілді» жоқтап қалар ма еді. Осы тарихи шешім үшін ғана қазақ халқы Елбасының алдында мәңгілік қарыздар. Бұл қарыз қарапайым өтеу емес, ұрпақ сүйген елдің құдайы парызы, сол ұрпақ тұратын жердің ұдайы мұрасы. Сондықтан да жүрегі өзгешіл сұлтандықты емес, отаншыл ұлтандықты қалап тұратын әз халқымыз әрбір тамырымен «сүйер елің болса, сен сүй, тұрар жерің болса, жұбан» деп тұр.
Бізде ел де бар, жер де бар. Ең бастысы, осы 20 жыл ішінде Елбасының сарабдал саясатының арқасында ешкімнің есігіне қарамайтын, өз шамасын өзі бағалайтын ұлттық мемлекетіміз бар. Міне, шарықтайтын кез – осы. Жеңіс деген – осы. Отан деген ұлы ұғым осы, деді Иманғали Тасмағамбетов. Ел билеу – өнердің өнері. Ал «өнердің анасы – мұң, атасы – нұр» дейді. Саясаттағы осындай халықтың батасындай шешімдер Алланың нұрымен келгеніне күмән келтіре алмаймыз. Елбасының осынау ордалы елінің қамын ойлаған қайраты мен ақылының, парасаты мен пайымының арқасында осы күні Елдің шүкірлігі мен Жердің бүтіндігіне жетіп отырмыз. Сондықтан да, «барымызды бар, жоғымыз толар, ең бастысы, еңселі еліміз мынау» деп айқара тұрып айтар кез келді, халайық.
Қала әкімінің Тәуелсіз Қазақстанның жаңа елордасы – Астана туралы жүрек тебіренісі де әсерлі шықты. «Осынау жүрекжарды сезімге мән де, сән де беретін, бүгін баршамызды төріне оздырып, айбарымен алаштың арқасын қоздырып тұрған мынау Астана. Бұл – ажары ақ сәулемен жарқыраған, назары күн нұрындай сарқылмаған, алтын күмбезді Астана. Әр даңғылы гүл ашқан, баянды болашаққа жол ашқан Астана. Астана болмағанда осынау жиырма жылда тізбектелген мол жетістікті осыншама сезінбес едік. Жетсек те жемісі жұтаң, егісі сирек ел болар едік. Олай болса, бұл туған елдің тағдыр алдындағы, Елбасының тарих алдындағы тұғырлы жеңісі, ұлы мақтанышы, деді қала әкімі. Тәуелсіздік бір күннің әңгімесі емес. Ал 20 жыл ата тарих үшін қас-қағым сәт, тас түсті мезет. Десе де, біз үшін бұл ел ішінде бейбітшілік пен жасампаздық салтанат құрған ең жауапты кезең – сындарлы уақыт болды. Осы сәтте біз даңғыл жолдың алдында, үлкен тілектің үстінде тұрмыз. Ал ендігі арман не?
Сөз жоқ, ол – басқа қонған тағдырдың кеңдігі мен сол бақты баянды еткен Елбасының ерлігін ақтау, тойған белді емес, туған жерді сақтау, осылайша бостан елдің биік байрағын мәңгілікке байлау. Ендеше, ақын Мағжанша айтқанда, «бостандық – ізгі періште, қадірін біліп, құрметтейік», ағайын.
Сөз соңын Иманғали Тасмағамбетов: «Сөз басында мен «малым жанымның садағасы, жаным – арымның садағасы», деп жатса-тұрса ердің емес, елдің қамын жеген бабалардың дуалы өсиетін әдейі атап өттім. Өйткені, дәм-тұзы асында, ұл-қызы қасында, көсемі басында тұрған ел бақытты. Ал бақыт – тек ақиқатқа айналған арманнан туады. Ынтымағы жарасқан елде ғана тұрады. Олай болса, осынау халықтың көңілдегісін тауып, көкейдегісін істейтін Ерді – Елбасын қазақтың Ұлы даласы талай ғасыр толғатып, Тәуелсіздіктің бағына берді. Бұрынғылар «Ұлылар екі дәуір алмасқанда туады» деп бекер айтпаса керек. Сөз жоқ, аумалы-төкпелі, ең қиын кезеңде ел тізгінін алған азаматқа үлкен жүрек те керек, қайратты білек те керек, ең бастысы, оны қолдайтын тілекші халық керек. Бірақ уақыт жинақтауға, көбейтуге, кері қайтаруға көнбейтін құдірет. Адами қасиеттердің ішінде оны жеңетін тек көрегендік қана. Олай болса, бүгін міне, ұлтымыздың рухани қуатын, қайыспайтын қара нардай қайратын, арыс алдаспандай сенім мен жігерін желдің жүзіне суарып, шыңдап жатқан уақыт – Елбасының, Нұрсұлтан Әбішұлының көрегендігі алдында басын иеді. Бұл еселі еңбек – елінің есінде, тарихтың төсінде мәңгілік қалатын Таутұлғаның теңдессіз мирасы. Тәңірі мойнына таққан талассыз тұмары. Өз кезегімде сөзімді Елбасының күллі алаштың баласына арнаған мына ұранымен тәмамдауға рұқсат етіңіздер: «Салтанаты жарасқан қаласы бар, байтағы ұшан-теңіз даласы бар, әруақ қолдаған бабасы бар ел екендігімізді мақтан етейік, ағайын!», – деп түйіндемекпін деп аяқтады.
Кешке қарай торқалы той салтанаты «Қазақстан» орталық концерт залында жалғасты.
* * *
Бұл кештің беташары Құрманғазы атындағы академиялық халық аспаптар оркестрінің орындауында Құрманғазының «Сарыарқа» күйімен ашылды. Әрине, одан әрі Абайдың әнімен жалғасқан бұл концертте әуелеген ән де күмбірлеген күй де, мың бұралған би де мол болды және оның бәрі көпшілік көңілінен шығып, кеш ажарын барынша аша түсті десек, Әлібек Дінішев, Айман Мұсақожаева, Жәния Әубәкірова, Роза Рымбаева, Нұржамал Үсенбаева сынды талант иелері өз өнерлері арқылы той тынысына лайық шашу шашты.
Бұл кеште бөле-жара айта кететін бір жәйт, Қазақ ұлттық өнер университетінің, А.Жұбанов атындағы республикалық және К.Байсейітова атындағы дарынды балаларға арналған музыкалық мектептердің домбырашылар ансамбльдері бірігіп орындаған «Күй тартыс» көпшілікті ерекше желпінтіп өтті. Иә, осынау жас домбырашылар өздерінің орындау шеберлігімен қазақ өнерінің көкжиегі келешекте бұдан да кең екенін байқатқан. Сондай-ақ жұртшылық жас домбырашы Нүркен Әшіровтің орындауындағы Қаршыға Ахмедияровтың «Елбасы» атты күйін де аса жылы қабылдады. Кеште бірқатар классикалық шығармаларға да орын берілген екен. Айталық, Дж.Пуччинидің «Джанни Скикки» операсындағы Лауреттаның ариясын халықаралық конкурстардың лауреаты Мария Мудряк орындады. Енді оны неге бөле-жара айтып отырмыз дегенге келсек, кезінде Елбасы Павлодар өңірінде іссапарда болғанында балауса Машаның өнерін көріп, оған ерекше риза болыпты. Сөйтіп, жас өскінге ақ жол тілеп, оның өз өнерін одан әрі шыңдауына қамқорлық жасауды жергілікті азаматтарға, өнер қайраткерлеріне тапсырған да көрінеді. Енді, міне, бүгінде сырт елде өз өнерін жетілдіріп жүрген жас талант ел Тәуелсіздігінің 20 жылдық мерейлі мерекесіне қатысу үшін сонау Италиядан Қазақстанға асыға жетіп, кешегі кеште өнер көрсетуі өз елінің қамқорлығына деген жас қыздың ризалығы десе де болады. Жалпы, тек Мария ғана емес, бүгінгі концертте өнер көрсеткендердің барлығы дерлік өрімдей жастар болды. Мұның өзі де елмен бірге қазақ өнерінің де жасарып, жайнап, толысып келе жатқанын аңғартты.
«Егемен Қазақстанның» тілшілер тобы.
Суретті түсірген Орынбай БАЛМҰРАТ.