Қазақ – өнегелі халық. Береке-бірлікті, ынтымақты, елдікті ту еткен ата-бабаларымыз: «Он адам жүрген жерде із қалады, жүз адам жүрген жерде – соқпақ, мың қадам жүрген жерде жол қалады», деген ұлағат қалдырған. Байыптап үңілген жанға бұл сөздің мәні өте терең. Халқымыздың ел болу тарихында аз ғана топ із салып, ол іздердің аумағы кеңейіп, жүздеген адамдар жүрген соқпаққа айналып, бірте-бірте мыңдарды үлкен жолға – іргелі жұрт болу жолындағы Ұлы көш жолына түсіргендігіне мысалдар аз емес.
Тәуелсіздікті ойлағанда КСРО көзге елестейді. Бұл империя оп-оңай тізе бүге салған жоқ. Ол державаны осыған мәжбүрлеген, кенеттен ұйқы-тұйқы етуге итермелеген себеп-салдар көп еді. Сол күрделі, әлемдік тарихта маңызы зор оқиғалардың бірі емес, бірегейі 1986 жылғы әйгілі Желтоқсан оқиғасы болды. Қазақ жастарының бұл наразылық толқуы тек Қазақстан үшін ғана маңызды болған жоқ, барлық бұрынғы одақтас республикалар үшін шешуші тұтқаға айналды десек те болады. Жастарымыздың өктем үні азулы да айбынды империяны қатты шошытты, олар бұл оқыс іс-әрекеттердің одақта жаппай қолдау тауып, белең алып кетуінен қорықты. Ол солай болуға тиісті де еді. Сондықтан да олар қолда тізгін барда мұның қанат жайып кетпеуіне күш салып, жөргегінде тұншықтыруға тырысты.
Осы бір еліміз үшін сын сағаттары соғып жатқан жауапты шақтарда мен Алматы архитектуралық құрылыс институтының доценті едім. Күні-түні кезекшілік қойып, жастарды тексеріңдер, жатақханалардан шығармаңдар деп қатаң талап қойылып жатты. Бірде бізді полковник шеніндегі орыс азаматы жинап алып: «Қазір бәріңізге бұзақылардан қорғану үшін қолдарыңызға арматура береміз, абай болыңдар, жаппай шабуыл болуы мүмкін», – деп қамқорси қорқытты. Сол жерде тұрған оншақты оқытушы – қазақ жігіттері бірде-біреуі мұндай қаруды алмай тастап кеттік. Кешкілік жатақханаға келсек, есік алды толған әскер, милиция. Кімнің үсті су «сендер алаңнан келдіңдер, сендерді сумен атқылағаны көрініп тұр», – деп студенттерді тексеріп жатты. Қолымыздан келгенше бірнеше баланы ішке кіргізіп, аман алып қалдық. Бірнеше оқытушы партия қатарынан шығарылды. Елім деп шырқырап, кеуделерін оққа төсеген жазықсыз қыз-жігіттеріміздің ашынған халін көрудің өзі ауыр еді. Бірақ олар ұлы іс атқарды. Тарих бетінде олардың сол тәуекел әрекеттері өз ізін өшпестей етіп қалдырды. Біздің арамызда жүрген сол қыз-жігіттер – бүгінгі үлкен азаматтар тәуелсіздікке өз үлесімізді қостық деп зор мақтаныш сезімімен еңселерін тік ұстап жүруге толық хақысы бар.
Сол кездегі кеңестік жүйенің кейбір идеологтары айтып дәлелдеуге тырысқандай, бұл маскүнемдер мен нашақорлардың басын қосып, бірігіп жасаған ақымақшылық, есерлік, даңғаза іс-әрекеттер емес еді. Тарих талабы алып келген, заманы тудырған заңдылық еді. Осы тарихи замана талабының сынын қаймықпай көтерген халқымыздың аяулы қыз-жігіттері болатын. Бұл біз үшін зор мақтаныш сезімін тудырады.
Тәуелсіздік тарихының жаңа замандағы жарқын беттері осылайша жазылды.
1990 жылғы наурыз айында он екінші сайланған Қазақ КСР Жоғарғы Кеңесінің «Қазақ КСР Президенті қызметін тағайындау және Қазақ КСР Конституциясына (Негізгі Заңына) өзгерістер мен толықтырулар енгізу туралы» Заңы қабылданып, Қазақ КСР Президентінің қызметі тағайындалды. Еліміздің Тұңғыш Президенті болып Нұрсұлтан Әбішұлы Назарбаев сайланды. 1990 жылғы 25 қазанда Жоғарғы Кеңес «Қазақ КСР-інің Мемлекеттік егемендігі туралы» декларацияны қабылдап, тұңғыш рет еліміздің халықаралық құқық субъектісі ретіндегі мәртебесі айқындалды.
Осы он екінші сайланған Жоғарғы Кеңес 1991 жылғы 16 желтоқсанда Қазақстан Республикасының мемлекеттік тәуелсіздігін жариялады. Осынау тарихи оқиғаларға толы толғаныс күндері Білім министрлігінде істеп жүрген уақытым еді. Тәуелсіздігіміздің Заңы қабылданған күні Алматының барша халқы жаңа алаңға жиналды. Халықтың санына көз жетпейді, ине шаншар жер жоқ. Бәрі көңілді, жүздері бал-бұл жайнайды. Бір-бірімізді құшақтап, сүйіп, танитын-танымайтыны бар «сүйіншілеп» жатырмыз. Бөркімізді аспанға атудамыз. Мінберде Нұрсұлтан Әбішұлы, ел ағалары, республика басшылары. Шешендер бірінен соң бірі сөйлеп жатыр. Бір мезгілде орта жастағы, ұзын бойлы бір бауырымыз «мен сөйлейінші» деп мінбеге көтерілді де: «Ата-бабамыз аңсаған ақ таң бүгін атты. Қазақ, қуан, қазақ, жыла бүгін», – деп Шәмшінің «Менің Қазақстаным» әнін шырқап қоя берді. «Осы ән біздің ұранымыз, біздің гимніміз», болсын деп жар салды. Барлық халық қосылып осы әнді шырқадық. Тұла-бойым тітіркеніп, дірілдеп көзімізге жас алдық, «Тәубе! Тәубе!» деп күбірлеп тұрдық. Сол күндер, міне, жиырма жылдай өтсе де әлі де көз алдымда күні кеше болғандай ап-айқын тұр.
Бұл ел тарихының беттерінде алтын әріппен жазылған, қазақша ұғыммен айтсақ, ақ түйенің қарны жарылған, миллиондаған жүректерді қуанышқа бөлеген, тілмен айтып жеткізгісіз, халқымызды зор бақытқа жеткізген ұмытылмас шақ еді. Осынау тарихи кезеңге данышпан Абай мен Шоқан, Ыбырайлардың, отаршылдыққа қарсы күрескен Кенесары, Махамбеттердің ғасырында жете алмадық. Біз Қазақ елінің азаматтығы үшін күрескен алаш қайраткерлері Әлихан, Міржақып, Ахмет, Мағжандардың, Кеңес өкіметі халқына бақыт әперетініне қалтқысыз сенген аяулы арыстар Сәкен, Ілияс, Бейімбет көре алмай кеткен тәуелсіздік таңын көзімізбен көрдік.
Қазіргі жылнамамыз жүрек жылуымен жазылуда. Тәуелсіздікке қол жеткізген жылдардан бергі елімізде атқарылған ұлы мемлекеттік істер, ауқымды іс-шаралар жетіп-артылады. Ұлы өзгерістердің, мемлекет абыройын көтеретін ауқымды істердің басында Тұңғыш Президентіміз Нұрсұлтан Әбішұлы Назарбаев тұрды.
Уақыт Елбасымыз ұстанған бағыттың дұрыс екенін дәлелдеп берді. Қазақстан санаулы жылдардың ішінде дүние жүзіне танымал әлеуетті елге айналды. Біз Тәуелсіз Мемлекеттер Достастығы және Азия елдері арасында бірінші болып Еуропадағы қауіпсіздік және ынтымақтастық ұйымына жетекшілік еттік. Осы беделді ұйымның Астанада өткен Саммиті де ел тарихындағы айтулы оқиғалардың бірі.
Ең бастысы – халқымыздың замана көшінде артта қалып қоймай, нық сеніммен алға басып келе жатқанымызға сеніміміз мол. Елімізді алдағы уақыттарда да тәуелсіздік тұғырымызды нығайта түсер үлкен істер күтіп тұр. Осы жолда халық болып сенім артқан Елбасымыз Н.Ә.Назарбаевтың салиқалы да сындарлы басшылығымен алға баса беретіндігімізге күмәніміз жоқ. Бағытымыз айқын. Елбасы мұны биылғы «Болашақтың іргесін бірге қалаймыз» атты Жолдауындағы қуатты, жарқын бағдарламасымен де дәлелдеп отыр. Біз нық қадаммен, еңсемізді тік ұстап, Тәуелсіздігіміздің жиырма жылдық абыройлы белесіне көтеріліп келеміз.
Найман ҚАЛАБАЕВ, Көкшетау мемлекеттік университетінің ректоры, техника ғылымдарының докторы, профессор.
Ақмола облысы.