Мәңгілік ел – салтанат қақпасы егемен елдің бас қаласы – Астанада бой түзеді
Кеше Мемлекет басшысы Нұрсұлтан Назарбаев Қазақстан Республикасы Тәуелсіздігінің 20 жылдығы күні Астанада «Мәңгілік Ел» Салтанат қақпасын ашу салтанатына қатысты.
16 желтоқсанның ақ таңы алаулай атты. Ашық аспанда шөкімдей бұлт жоқ. Арқаның шыңылтыр аязы шымырлата қысқанымен, ауа таза, төңірек тымық. Ақ қарды күн нұрымен шағылыстыра, көз қарықтыра шықырлатқан Арқаның аязы ару Астананы арайландыра түскен. Мереке құшағындағы елорда тұрғындары мен қонақтары қыстың қысқа күні арқан бойы көтерілген кезден-ақ жаңа қала – Есілдің сол жағалауына ағылуда. Аязбен алабұртқан жұрт жүзінде ерекше бір тамашаға ынтыққан әуестік бар. Иә, қалың жұрттың назары Қазақстан Республикасы Тәуелсіздігінің 20 жылдығында – мерекелі Тәуелсіздік күні азат елдің Астанасында ашылатын «Мәңгілік Ел» Салтанат қақпасына ауған.
Сағат тура – 11.00. «Қазақстан Республикасының Президенті, Елбасы Нұрсұлтан Назарбаев». Ашық аспанда қалықтаған қуатты микрофоннан шыққан диктор үні ынтыққан жұрттың назарын бірден аудартты. «Мәңгілік Ел» Салтанат қақпасына Елбасы Нұрсұлтан Назарбаев салтанатты қадам басты. Алаң толы азат ел ұландары аязды ауаны жаңғырықтыра ұрандап, Тұңғыш Президентін, қазақтың біртуар перзентін риясыз құрметпен қарсы алды. Салтанатты жиынға жиналған 20 мыңға жуық жұрттың асқақ үні Астананың ашық аспанында ұзақ қалықтады.
Иә, Тәуелсіз еліміз азаттықтың айтулы мерекесін зор өрлеу үстінде қарсы алып жатқан 16 желтоқсан күні Мемлекет басшысы Нұрсұлтан Назарбаев Қазақстан Республикасы Тәуелсіздігінің 20 жылдығы құрметіне Астанада салынған «Мәңгілік Ел» Салтанат қақпасын сәніне сай салтанатпен ашты. Салтанатта сөйлеген сөзінде Президент Астанада Салтанат қақпасының ашылуы Қазақстанның Тәуелсіздіктің 20 жылындағы табыстарын білдіретінін атап өтті.
– Біз бұл тамаша Салтанат қақпасын біздің еңбегіміздің, біздің табыстарымыздың белгісі ретінде, болашаққа өтудегі белгіміз ретінде тұрғыздық. Қақпа біздің жас, әсем елордамыз – Астананың тағы бір символына айналатын болады. Біздің береке-бірлігіміз, біздің достығымыз, біздің көп ұлтты мемлекетіміздегі өзара сенім бізді үлкен жеңістерге жеткізді. Біз бүгін осы жерге Ұлы мерекені – Ел Тәуелсіздігінің 20 жылдығын атап өту үшін келіп тұрмыз, деді Мемлекет басшысы. Одан әрі Тұңғыш Президентіміз елімізді біріктірудегі жаңа елорданың ерен жетістіктерін айта келіп, «Табалдырықтан асқан тау жоқ», деген қазақ мақалын еске түсірген Елбасы бүгінгі ашып отырған «Мәңгілік Ел» Салтанат қақпасы қасиетті табалдырығымыз іспеттес, болашақта бұл ескерткіштің төңірегінде әдемі-әдемі ғимараттар салынып, гүлзарлар көмкерген алаңға айналатынын атап көрсетті.
– Мен барлығыңызды осы мерекемен құттықтаймын. Халқымызға жақсылық, бақыт, әрбір отбасына амандық тілеймін, Қазақстан жасасын, Тәуелсіздік жасасын. Қазақстандықтардың бірлігі жасасын, мерекелеріңізбен, – деді өз сөзінде Елбасы.
«Мәңгілік Ел» Салтанат қақпасының ашылу салтанаты мыңдаған қазақстандықтардың көз алдында өтті. Олардың қатарында – Президент Әкімшілігінің басшылығы, Үкімет мүшелері, Парламент депутаттары, мемлекеттік органдардың, ұлттық компаниялардың басшылары, облыстар мен Астана және Алматы қалаларының әкімдері, Астанадағы салтанатқа қатысуға келген өңірлердің делегациялары, қала жұртшылығы, жоғары оқу орындарының басшылары мен студенттері бар еді.
Салтанатты рәсімде Қазақстанның әнұраны шырқалып, Қазақстан Республикасының Қарулы Күштерінің әскерлері Салтанат қақпасы алдынан сап түзеп өтті.
«Мәңгілік Ел» – Қазақстандағы тұңғыш Салтанат қақпасы – еліміздің әрбір азаматы үшін қашанда барыс бейнелі болашаққа нық қадам басқан мемлекеттіліктің айшықты белгісі, ұлттың ғасырлар бойғы арман-ойы мен өмірлік өнегесін үнемі еске салатын көрнекті тұғыр. «Мәңгілік Ел» Салтанат қақпасы – бұл азат елдің Тәуелсіздігінің 20 жылдығына тұрғызылған асқақ тұғыры. Ал осы Тәуелсіздігіміз төбеден салбырап түсе қалған жоқ. Бұл Тәуелсіздік еркіндігін өздігінен өзгенің қолына ұстата салмайтын ұлан дала ұлдарының ұлы шайқастарында шыңдалған. Бұл Тәуелсіздік бодандық бұғауынан бұлқынған қайсар қазақ қанымен суарылған. Бұл Тәуелсіздік халық шежіресінде көмескіленбеген ірілі-ұсақты ұлт-азаттық көтерілістерімен шыңдалған. Бұл Тәуелсіздік Тұңғыш Президентіміз Нұрсұлтан Назарбаевтың сара басшылығымен ғасырға пара-пар даму жолынан өткен бүгінгі ұландар қайсарлығымен нығайған.
Салтанат қақпасы – әлемдегі санаулы қалаларға тән ерекше сәулеттік-монументі туынды. Әдетте мұндай қақпа жеңіс рухын асқақтату немесе жасампаз жетістіктердің құрметіне қаланың кіреберісіне, үлкен жолдың бойына орнатылады. «Мәңгілік Ел» Салтанат қақпасы – Астана сәулетінің сәнін арттырар салтанат туындысы. Оның биіктігі 20 метр. Бұл Ел Тәуелсіздігінің 20 жылдығын паш етеді. Сыртқы қасбетінің безендірілу жағынан да қазақтың ұлттық өрнектеріне толы, негізі берік, мазмұны толайым нысан. Қақпаның әрбір қабырғасының симметриялық өлшемдерінің теңдігі бірдей. Сондықтан да ол халықаралық әуежай жағынан да (қалаға кіреберіс), қала жағынан да (қаладан шығаберіс) бірдей көрінеді.
«Мәңгілік Ел» Салтанат қақпасы Орынбор көшесі мен № 25 көшесінің қиылысқан жеріне орналасқан. Қақпаның биіктігі 20 метр, ені – 13 метр. Архитектуралық заңдылыққа сәйкес «Мәңгілік Ел» қақпасының әрбір қабырғасының симметриялық өлшемдерінің теңдігі бірдей.
Әрбір қабырғаның төменгі табанында биіктігі 4,4 метр болатын көлемді мүсіндер бар. Қақпаның сол жақ қапталында «Ақсақал» мүсіні орнатылған. Бұл халықтың абыз ойы мен рухани өлшемінің көрінісі, даналықтың символы. Қақпаның сол жақ қапталында от иесі – «Әйел Ананың» рельефті мүсіні орнатылған. «Ана» бейнесі қазақ ұлты үшін «Отан Ана», «Жер Ана», «Ана тілі» сынды киелі ұлттық ұғымдарына ұласады. Қақпаның сол жағындағы орында Көшпенді сарбаздың, ал оң жағында қазіргі Қазақстан жауынгерінің мүсіні орналасқан. Ежелгі көшпенділер сарбазының мүсіні қазақ батырларының жанқияр ерліктері мен қаһармандығын бейнелейді, ал оның сыртқы стилі Аңырақай шайқасы кезеңіне негізделген. Жалпы алғанда, бұл мүсіндер жиынтығы қазақ халқы үшін қастерлі ұғым – ел қорғау ісінен бастау алады. Жаугершілік тақырыбы сонау көшпенділер сарбаздарынан қазіргі заман әскерлеріне дейінгі соғыс салттарын дәріптеп, қаһармандық тарихын паш етеді. Сонымен қатар қазіргі заманғы әскери қызметкер мүсіні өз кезегінде жастық пен жалынды ұрпақтың, ел болашағының белгісі болып табылады. Әр мүсіннің жоғарғы жағында Елтаңба орналасқан. Сыртқы бөліктің жоғарғы жағында «Мәңгілік Ел» жазуы бар. «Мәңгілік Ел» тіркесінің пәлсапалық тамыры терең, мағынасы зор. Композицияның жоғарғы бөлігін тұтас күрделі ою-өрнектер шоғыры алып жатыр. Дәл осы өрнектер мемлекетіміздің көк байрағында да көрініс тапқан. Мемлекеттік туға тән күн мен қалықтаған қыран бейнесіндегі символ бүкіл композицияның өзегіне айналған. Күн – өмірдің, күш-қуаттың көзі. Қыран – рәміздер тілінде билікті, кеңдік пен қырағылықты білдіреді. Ұлтымыздың дүниетанымында ол бостандықтың, тәуелсіздіктің, шырқау көкке, биік мақсаттарға ұмтылудың, болашаққа қанат қағудың символы.
Нысанның екі жағында «Тай- қазан» мүсіні орналасқан өзіндік орындармен ерекшеленеді. «Тай- қазан» тыныштық пен тоқшылықтың, бірегей көңіл мен қонақжай пейілдің терең ұғымын білдіреді. Қабырғалары қазақтың күрделі ұлттық өрнектерімен безендіріліп, ортасына қазақ жауынгерінің бес қаруының бірі «Қалқан» орналасқан. Қалқан қашанда қауіп-қатердің қорғаны, сенімділік, тұрақтылық, жеңістің белгісі. Қақпаның ішкі жағындағы екі қабырғаның әрбірі 7 х 3,5 метр болатын бедерлі суреттермен әшекейленген. Олардың бірінде «Сақтар» – «Түркілер» – «Қыпшақтар» – «Қазақтар» тізбесіндегі қазақтың шығу тарихының кезеңі көрсетілген. Келесі қабырғаның бас тақырыбы, ең қастерлі ұлттық құндылық – Тәуелсіздікке арналады. Өрнекті қабырға бүгінгі тәуелсіздіктің мазмұнын ашып, мағынасын тарқататын «Ақорда», «Бәйтерек» және басқа да нысан суреттерімен бедерленген. Болашаққа деген батыл қадамды жас буынға арналған бедерлі суреттер бейнелейді. Тұтас идеологиялық құрылымның тұжырымдамасын Қазақстан Республикасы Конституциясының бірінші бабынан алынған. «Қазақстан Республикасы өзін демократиялық, зайырлы, құқықтық және әлеуметтік мемлекет ретінде орнықтырады, оның ең қымбат қазынасы – адам және адамның өмірі, құқықтары мен бостандықтары» деген үзінді бекітеді.
Міне, әлемнің айтулы қалаларымен салтанат жарастырған Астанада егемен елдің тағы бір ерен ескерткіші бой көтерді. Бұл – Тәуелсіз Қазақстанның 20 жыл жасампаздық жолында жүріп өткен ерен ерлігінің, елеулі жеңісінің салтанаты. Осы ерен ескерткіш ашылардан біраз бұрын баспасөз бетінде «Егемен Қазақстан» газетінде басылым басшысы Сауытбек Абдрахмановтың «Астананың аркасы – азаттықтың арқасы» атты мақаласы жарияланған еді. Біз бүгінгі айтулы күндегі салтанатты рәсім туралы сөзімізді осы аталған мақаладағы тебіреністі толғаныспен түйіндеуді жөн көрдік:
«Біз, ақ-адалын айтқанда, өзгелермен бірге егемендікке қол жеткізген кезде тәуелсіз мемлекет құра алсақ та, ел қатарлы тұра алсақ та тәубе, тәубе дейтіндей жағдайда едік. Шүкір, ондай болған жоқ. Ел екенбіз. Рухы күшті, жігерлі жұрт екенбіз. Басқалар істегенді біз де істеп, басқалар тындырған шаруаларды біз де тындыра алады екенбіз. Тіпті талайлардан артық істеп, артық тындыра алады екенбіз. Оған алдымен өзіміздің көзіміз жетті. Одан кейін өзгелердің көзін жеткіздік. Тіл-аузымыз тасқа. Тәуелсіздік тойына осылай, асқақ абыроймен келіп отырмыз.
Бұл салтанат па? Сөз жоқ, салтанат. Елдіктің салтанаты».
Ендеше, егемен ел, азат халық, Тәуелсіз Қазақстан «Мәңгілік Ел» Салтанат қақпасы құтты болсын!
Жылқыбай ЖАҒЫПАРҰЛЫ.
Суреттерді түсіргендер
С.БОНДАРЕНКО, Б.ОТАРБАЕВ.
Бақыт босағасы
Астана нұрға бөлеп шартарапты,
Қанатын құаныштың серпе қақты.
Елорда босағасын биіктетіп,
Орнаттық алып Қақпа салтанатты.
Қайтеміз қозғай беріп шерлі күнді,
Жырлаймын ғажайыпты мен бүгінгі.
Ат басын тірегендер бұдан былай,
Қақпама қарап таныр Елдігімді.
Талайлар маңдайшасын көргеннен-ақ,
Мәңгілік ел болуды армандамақ.
Алдымен босағама тәжім етер,
Төріме шығу үшін келген қонақ.
Көркіне жалт қаратып мына әлемді,
Бұл қақпа мәңгі-бақи тұрады енді.
Айбынын Азаттықтың асқақтатқан,
Әйгілеп Нұр-ағамдай қыран ерді!
Жарасар күндіз-түні жырласа да,
Әр жылын Бостандықтың мыңға сана.
Бабам да, Алашым да жете алмаған,
Бақыттың босағасы – бұл босаға!
Қалдырған кемеңгерлер елге өсиет,
Қақпада құдіретті бар қасиет.
Қарсы алар келер ұрпақ керуенін,
Маңдайын жарқыраған таңға сүйеп.
Бірлігін берекемен құндақтаған,
Қазақпыз жүрегінде зіл жатпаған.
Сап түзеп, шеру тартып салтанатпен,
Ғасырлар өтеді әлі бұл Қақпадан!
Еңсесі биік елдің иық керген,
Қашанда босағасы биік келген!
Тәуелсіз туған Отан жасай берсін,
Ақордам ақ сәулесін құйып төрден!
Несіпбек АЙТҰЛЫ.