Сақтандырушыны таңдау және онымен сақтандыру шартын жасау жеңіл сияқты болып көрінгенімен, шын мәнінде, мәселе оңай емес. Бір жағынан, Қазақстандағы сақтандыру компанияларының елеулі саны (ағымдағы жылдың 1 қыркүйектегі жағдайы бойынша – 38) және олардың кең ауқымды жарнамалық қызметін сапалы сақтандыра отырып қорғау қолжетімді әрі қарапайым деген ой тудырады. Бұл ретте сақтандыру ұйымдарының өз қызметіне жарнама жүргізудегі белсенділігі түсінікті, өйткені өз акционерлерінің мүддесі үшін олар кіріс сақтандыру сыйлықақысының мүмкіндігінше ең көп көлемін алу үшін тұрақты өсіп отырған сақтандыру шарттарын сату көлемін қамтамасыз етуі тиіс.
Екінші жағынан, әлеуетті сақтандырушыларды ресми БАҚ-та пайда болып отырған сақтандыру қызметін жүзеге асыруға лицензияны тоқтату және/немесе қайтарып алу туралы хабарламалар сақтандырады. Осыған байланысты, сақтандырушымен сақтандыру шартын жасамас бұрын, сақтандыру төлемдерін төлеуден бас тарту және өз ақшаңызды жоғалтып алу мүмкіндігін азайту мақсатында, оның ішкі тәуекелдерін сапалы бағалау керек.
Жұмыс істеп тұрған қазіргі сақтандыру ұйымдары туралы, олардың сақтандыру қызметтері нарығындағы беделі, қаржылық жай-күйі туралы, сондай-ақ қандай да болсын сақтандырудың пайдалылығын және құнын бағалау туралы барынша көп ақпаратты алуға қабілетті тиісті заң және/немесе талдама қызметтерінің болуына байланысты заңды тұлғаларға жеке тұлғаларға қарағанда осындай бағалауды жүргізу анағұрлым жеңіл. Жеке тұлғалардың сақтандыру шарттарын жасау туралы шешім қабылдауы үшін мүмкіндіктері анағұрлым шектеулі. Оларға негізінен сақтандырушылардың жарнамалық материалдары, сақтандыру шарттарын (полистерін) сатуға мүдделі сақтандыру агенттері мен брокерлерінен алынған ақпарат не таныс адамдардың ұсынымдары қолжетімді.
Осыған байланысты, сапалы таңдау жасау үшін төмендегі ақпарат көздерін пайдалану ұсынылып отыр. Біріншіден, ҚР ҰБ Қаржы нарығын және қаржы ұйымдарын бақылау мен қадағалау комитетінің www.afn.kz ресми сайтында орналастырылатын ақпаратпен танысу. Бұл Интернет-ресурста жұмыс істеп тұрған сақтандыру ұйымдары, оларға қатысты қолданылған шектеулі ықпал ету шаралары мен заңнамада көзделген санкциялар, олардың қаржы көрсеткіштері туралы жалпы мәліметтермен танысуға болады. Сақтандыру ұйымдары қызметінің жұмыс істеу мерзіміне назар аудару маңызды, яғни компания нарықта қандай уақыт аралығында жұмыс істегендігін білу қажет.
Сақтандыру ұйымдарының қызметі туралы толық мәлімет алу үшін кәсіби талдаушылар БАҚ-та орналастыратын сақтандыру қызметтері нарығындағы мәліметтерді қосымша пайдалануға болады, әртүрлі форумдарда сақтандыру ұйымдарының жұмысы туралы пікірлерді біліп отыру абзал. Алдын ала зерттеу жүргізе отырып, өзіңіз қызығушылық танытқан сақтандыру өнімі бойынша сақтандыру шарттарын кейіннен анықтау үшін, әлеуетті және сізге анағұрлым сәйкес келетін сақтандырушылардың тізімін жасау қажет.
Сақтандыру ұйымдарын таңдаумен қатар, ұсынылған сақтандыру шарттарын мұқият зерделеудің де маңызы зор. Республиканың қолданыстағы заңнамасына сәйкес сақтандырудың екі: міндетті және ерікті нысаны бар. Міндетті сақтандыру — егер сақтандырудың міндетті түрлерін реттейтін заңнамалық актілермен өзгеше белгіленбесе, шарттары тараптардың келісімдерімен айқындалатын заңнамалық актілердің талаптарына сәйкес жүзеге асырылатын сақтандыру.
2003 жылғы 21 наурызда Қазақстан Республикасының Премьер-Министрі әлеуметтік жағынан анағұрлым маңызды болып табылатын сақтандырудың міндетті түрлерінің оңтайлы тізбесін бекітті. Бұл тізбеге 11 міндетті сақтандыру түрлері кіреді, оның 10-ы қолданыста болып табылады: міндетті әлеуметтік сақтандыру, көлік құралдары иелерінің азаматтық-құқықтық жауапкершілігін міндетті сақтандыру, тасымалдаушының жолаушылар алдындағы азаматтық-құқықтық жауапкершілігін міндетті сақтандыру. Сондай-ақ тізбеде жеке нотариустардың АҚЖ міндетті сақтандыру; аудиторлар мен аудиторлық ұйымдардың АҚЖ міндетті сақтандыру; турагенттер мен туроператорлардың АҚЖ міндетті сақтандыру; қызметкерді өзінің еңбек (қызметтік) міндеттерін орындау кезіндегі жазатайым жағдайлардан міндетті сақтандыру; қызметі үшінші тұлғаларға зиян келтіру қаупімен байланысты объектілер иелерінің АҚЖ міндетті сақтандыру; міндетті экологиялық сақтандыру.
Ерікті сақтандыру — тараптардың еркіне сәйкес жүзеге асырылатын сақтандыру. Ерікті сақтандырудың түрлері, шарттары және тәртібі тараптардың келісімдерімен айқындалады. Сақтандыру шарты жазбаша нысанда:
1) тараптардың сақтандыру шартын жасау;
2) сақтанушының сақтандырушы бір жақты тәртіппен әзірлеген үлгі шарттарға (сақтандыру ережелеріне) қосылуы (қосылу шарты) және сақтандырушының сақтанушыға сақтандыру полисін беруі жолымен жасалатындығын атап өткен жөн.
Міндетті сақтандыру бойынша жазбаша шарттың нысаны республиканың міндетті сақтандыру туралы заңнамалық актілерімен, ал ерікті сақтандыру бойынша – сақтандырушымен не тараптардың келісімімен айқындалады.
Сақтандыру шартының жазбаша нысанын сақтамау оның жарамсыздығына әкеледі. Оған қоса, заңнамада сақтандыру шарты талаптарының мазмұнына қойылатын талаптар және сақтандыру шартын ресімдеуге және оның мазмұнына қойылатын жалпы талаптар айқындалған.
Шарттарда мыналар болуы тиіс:
1) сақтандырушының атауы, орналасқан жері және банктік деректемелері;
2) сақтанушының (егер ол жеке тұлға болса) тегі, аты, әкесінің аты (егер бар болса) және тұрғылықты жері немесе оның атауы, орналасқан жері және банктік деректемелері (егер ол заңды тұлға болса);
3) сақтандыру объектісін көрсету;
4) сақтандыру жағдайын көрсету;
5) сақтандыру сомасының мөлшері (аннуитеттік сақтандыру шарттарын қоспағанда), сақтандыру төлемдерін жүзеге асыру тәртібі мен мерзімдері;
6) сақтандыру сыйлықақысының мөлшері, оны төлеу тәртібі мен мерзімдері;
7) шарттың жасалу күні мен қолданылу мерзімі;
8) егер олар сақтандыру қатынасына қатысушылар болса, сақтандырылушы мен пайда алушы туралы ақпарат;
9) шарттың (сақтандыру полисінің) нөмірі, сериясы;
10) шарттың талаптарына өзгерістер енгізу жағдайлары мен тәртібі;
11) сатып алу сомасын (жинақтаушы сақтандыру үшін) төлеу талаптары мен оның мөлшері;
11-1) сақтанушыны немесе сақтандырылушыны сақтандыру төлемін жүзеге асыруға қажетті жетіспейтін құжаттар туралы хабардар ету мерзімдері (2012 жылғы 1 қаңтардан бастап қолданысқа енгізіледі);
12) салық төлеушінің тіркеу нөмірін (егер бар болса), резиденттік белгісін және сақтанушының экономика секторын көрсету (2012 жылғы 1 қаңтардан бастап қолданысқа енгізіледі);
13) сақтандыру шартында сақтандырылушы (пайда алушы) көрсетілген жағдайда салық төлеушiнiң тiркеу нөмiрiн (егер бар болса), резиденттiк белгiсiн және егер ол сақтандыру шарты бойынша сақтанушы болып табылмаса, сақтандырылушының (пайда алушының) экономика секторын көрсету;
14) сақтандыру сомасының, сақтандыру төлемі мен сақтандыру сыйлықақысының валюта түрі.
Тараптардың келісімі бойынша шартқа өзге де талаптар енгізілуі мүмкін.
Сондай-ақ, азаматтардың сақтандыру мәселелерінде жеткіліксіз хабардар болуына байланысты тиісінше көңіл бөлмейтін маңызды бірқатар жағдайлар бар және бұл кейіннен сақтанушыны жағымсыз оқиғаларға және сақтандыру төлемдерінен бас тартуға алып келеді. Мәселен, сақтандыру кезінде ең маңызды құжаттар сақтандыру шарты мен сақтандыру ережесі болып табылады. Үлгі талаптарға қосылу арқылы шарт жасалған жағдайда сақтандырушы клиентті сақтандыру ережелерімен таныстыруға міндетті. Бұл ретте, осы сақтандыру ережесінің көшірмесін сұрап алуға болады.
Алайда сақтанушының бар үміті – сақтандырылған тәуекелдер, сақтанушы мен сақтандырушының құқықтары мен міндеттері, сақтандыру жағдайы басталған кездегі іс-қимыл тәртібі, сақтандыру төлемі үшін талап етілетін құжаттар тізбесі, төлем жасау мерзімі мен басқа да талаптар дәл осы құжаттарда болатынын есте ұстаған жөн. Соттық дау-дамайлар туындаған жағдайда дәл осы аталған құжаттардың мәтіндері қарастырылатын болады. Сондықтан, сақтандыру шартына (полиске) қол қояр алдында:
• осы құжаттардың мәтіндерімен танысу;
• сақтандыру компаниясының өкілінен өздерінің ережелерін түсіндіруді сұрау табанды түрде ұсынылады.
Сақтандыру шартын жасау кезінде мына жағдайларға ерекше көңіл бөлген жөн:
1. Сақтандыру тәуекелдерінің (яғни басталған кезде сақтандыру төлемі жүзеге асырылатын тәуекелдердің) тізбесі. Сақтандыру ұйымы құжаттарда жазылған және шарттарда (ережелерде) көрсетілген жағдаяттардан өрбіген тәуекелдер мен сақтандыру жағдайлары бойынша ғана сақтандыру төлемдерін жүзеге асыратынын есте ұстаған жөн;
2. Ерекше жағдайлардың, яғни олар басталған кезде сақтандыру төлемі жасалмайтын оқиғалардың (талаптардың) тізбесі. Мысалы, сақтандырушы сақтандыру мәнін жоятын сақтандыру өтемінің ерекше жағдайларының тізбесін қалыптастыруы мүмкін, өйткені осындай ерекше жағдайлар кезінде сақтандыру тәуекелдерін іске асыру ықтималдылығы барынша аз болады;
3. Сақтандыру жағдайы басталған кездегі сақтанушы іс-әрекеттерінің тәртібі (әсіресе сақтандырушының орын алған жағдай туралы хабарлау мерзімдері мен тәртібі маңызды). Сақтанушының орын алған жағдай туралы хабарлау мерзімін бұзуы сақтандыру төлемін жүзеге асырудан бас тарту үшін негіздеме болып табылуы мүмкін;
4. Сақтандырушының сақтандыру жағдайы бойынша төлем жасау туралы шешім қабылдау мерзімі және сақтандыру жағдайының мән-жайы мен себептерін растайтын құжаттардың тізбесі. Сақтандырушы «және сақтандырушының талабы бойынша басқа да құжаттарды» деген тұжырымды беруі мүмкін. Осындай тұжырымның болуы сақтандырушыға оның негізінде сақтандыру төлемін кешіктіруге және сақтанушыдан растайтын құжаттардың ауқымды тізбесін талап етуге мүмкіндік береді. Міндетті сақтандыру түрлері бойынша сақтандырушы тиісті заңдарда көзделмеген қосымша құжаттарды талап етуге құқығы жоқ екендігін ескерген жөн.
5. Франшизаның болуы және мөлшері, яғни залалдың өтелмейтін (белгілі бір жағдайларда) мөлшері. ҚР Азаматтық кодексіне сәйкес франшиза – сақтандырушыны сақтандыру талаптарында көзделген, белгілі бір мөлшерден аспайтын залалды өтеуден босату. Франшиза шартты (шегерілмейтін) және шартсыз (шегерілетін) болады. Шартты франшиза кезінде сақтандырушы франшизаның белгіленген мөлшерінен аспайтын залалды өтеуден босатылады, бірақ егер оның мөлшері осы сомадан көп болса, залалды толық өтеуге тиіс. Шартсыз франшиза кезінде залал барлық жағдайларда белгіленген сома шегеріле отырып өтеледі. Франшиза сақтандыру сомасына қатысты пайыз бойынша не абсолютті мөлшерде белгіленеді. Франшизаның мәні сақтанушыға, бір жағынан, ұсақ залалды төлемеуге, екінші жағынан, сақтанушының сақтандырылған мүлікке деген жауапты қызығушылығын тудыру үшін тәуекелдің және сақтандыру жауапкершілігінің бөлігін беруде жатыр. Осыған байланысты франшизаның мөлшеріне ерекше көңіл бөлген жөн, өйткені көбінесе сақтандырудың сырттан қарағанда тартымды көрінетін талаптары, мәселен, сақтандыру сыйлықақысының аз мөлшері, кейіннен франшизаның көп мөлшерін белгілеуге байланысты пайдасыз болып қалуы мүмкін.
Осылайша, шарттың (полистің) және сақтандыру ережесінің аталған ережелерімен таныса отырып, әлеуетті сақтанушы өзі үшін барынша қолайлы сақтандыру талаптарын ұсынатын сақтандыру ұйымына таңдау жасай алады және сақтандыру жағдайы орын алған кезде бірқатар мәселелерді «реттейді».
Сонымен бірге, нарықтық ахуалдың (және азаматтарға қатысты емес басқа да жағдайлардың) өзгермелілігін ескере отырып, сақтандыру ұйымын таңдауға алдын ала мұқият талдау жасау сақтандыру төлемін алмау тәуекелін төмендетуге мүмкіндік береді.
Иман Аль-Кейси, Қаржы қадағалау комитеті Тұтынушылардың құқықтарын қорғау жүйесін жетілдіру басқармасының бастығы.
–––––––––––––
RSS Білім – сақтандырушыны таңдау кезінде жақсы сақтандыру. Сақтандыру компаниясын таңдауда қалай қателеспеуге болады
TW Сақтандыру үшін – істі білген жөн