Соңғы жылдары қазақ-түрік рухани байланыстары дамуының айқын нышандарын кітап ісі саласынан аңғарамыз. Алматыдағы Ұлттық кітапханада қазақ классиктерінің түрік тіліне аударылған кітаптарының тұсаукесері өтті.
Алматы қаласындағы Түркияның Бас консулдығымен бірлесе ұйымдастырылған іс-шара барысында Бердібек Соқпақбаевтың «Менің атым – Қожа», Тайыр Жомартбайұлының «Қыз көрелік», Спандияр Көбеевтің «Қалың мал», Міржақып Дулатұлының «Бақытсыз Жамал», Сұлтанмахмұт Торайғыровтың «Қамар сұлу» туындылары таныстырылды.
Ұлттық кітапхананың директоры Жанат Сейдуманов тұсаукесер барысында қазақ-түрік ынтымақтастығы аясында жасалып жатқан игі істерге тоқталды. Көрнекті қазақ қаламгерлері кітаптарының түрік тіліне және түрік жазушыларының шығармаларының қазақ тіліне аударылып, жарық көруі бауырлас халықтар арасындағы рухани қазына қорының толығып жатқандығының нышаны екендігін атап өтті.
Іс-шараны ары қарай жүргізген Нағашыбек Қапалбекұлы сөз кезегін Анкара қаласындағы Кечиорен ауданының әкімі Мустафа Ак мырзаға ұсынды. Мустафа Ак мәдени байланыстардың түп-тамыры тереңде жатқандығына тоқталып, екі мемлекет бүгінде осы өрісті ынтымақтастықтың аясын жылдан-жылға кеңейтіп келе жатқанын атап өтті. Сүйінбай ақынның 200 жылдығына орай Сүйінбай ескерткіші орнатылып, Кечиорен ауданының бір көшесіне қазақтың ұлы ақыны Жамбыл Жабаевтың есімі берілгені осы мәдени байланыстардың жалғасындай. Ендігі кезекте ынтымақтастық аясы кітап ісі саласында өркендеуде.
Одан кейін сөз алған Алматы қаласындағы Түркияның Бас консулы Рыза Қаған Йылмаз зиялы қауымға ыстық ықыласын білдіріп, қазақ қаламгерлерінің кітаптарын түрік тіліне аударуға қолдау білдірген Түркиядағы Қазақстан елшілігі мен Кечиорен ауданының басшылығына алғысын білдірсе, Алматы облысы, Жамбыл ауданының әкімі Бағдат Әлиев осы істің басы-қасында жүрген азаматтардың қолғабысы зор екендігін атап өтті.
Аталған жобаларды жүзеге асыруға мүдделі ТЕДА жобасы аясында түрік жазушыларының да еңбектері қазақ тіліне аударылған. ТЕДА жобасының жетекшісі, баспагер Шайзада Мұхамеджанова биыл қазақ тіліне аударылған түрік қаламгерлері кітаптарының алғашқы нұсқасымен таныстырып, баспаханалармен келісімдер жүріп жатқандығын жеткізді.
Осы игі шараға профессор Дандай Ысқақ, жазушы Берік Шаханов, ақын Аманхан Әлім, жазушы-драматург Ахметжан Ашири, белгілі мәдениет қайраткерлері, БАҚ өкілдері және т.б. қатысты.
Шара аясында Ұлттық кітапхананың қорынан «Қазақстан-Түркия: рухани жаңғырудың жаңа бағытында» атты кітап көрмесі ұйымдастырылды. Көрмеге Қазақстан мен Түркияның достығы, тарихи-мәдени байланыстарына қатысты және қазақ-түрік ақын-жазушыларының кітаптары қойылды.
Эльвира СЕРІКҚЫЗЫ,
«Егемен Қазақстан»
АЛМАТЫ