Көгімде ырыс тұрақтап, жерімде құт, Арманыма Астана төрін беріп. Ерке Есілдің жағасы ертегідей – Қараөткелге қара орман елім қонып.
Үмітім бар тұманың тұнығында, Мәңгілік ел тұрғанда тұғырында. Шырайланып жанымда тұр айналып – Елбасы мен Елорда бір ұғымға.
Сапар сайын жаңғырар санада аты, Ғажайыбы ғаламның, Ғаламаты. ...Әз, Астана жұртыңнан айналайын – Елбасының ертеңге аманаты.
Тұрғаны анық бұл шаһар тұлғаланып, Сырға қанып... толқыны жырлап, ағып... Тыңдатады құдіретін, Күн батады – Нұрсұлтанның қаласын нұрға малып.
Замандасым, Заңғарым, қатарларым. Таусылмасын тірлікте татар дәмің. ...Ай Астана Алаштың Аруанасы – Бауырынан өретін бота-арманым.
Әні Есілдей бұл жердің күйі Есілдей, Айтар сөздің айдарлы жүйесіндей. Елорда мен Елбасы байтағымның – Мәңгілікпен тілдесер киесіндей.
Ғалым ЖАЙЛЫБАЙ,
Қазақстанның еңбек сіңірген қайраткері, халықаралық «Алаш» әдеби сыйлығының лауреаты
АЛМАТЫ