Жетпіс бесінде де жеңілмеген ардагер спортшы Әмірбай Рысқұлов жайлы
Әсте жетпіс бес жастағы адамды аяғын ілбіп басатын жасы ұлғайғандар санатына жатқызамыз ғой. Бірақ, бұл жастағылардың бәрі бірдей емес екен. Оған көксулық Әмірбай қарияның гір көтеруден әлемдік, халықаралық, құрлықтық жарыстарда топ жарып, жанкүйерін желпіндіріп жүргені дәлел. Әншейінде сабырлы кейіптегі жан додалы жарыстарда қарсыластарына дес бермей, омырауына 74 медаль тағып, көкбайрағымызды желбіретіп, ел мерейін асырып жүр.
Жетпіс бесінде де жеңілмеген ардагер спортшы Әмірбай Рысқұлов жайлы
Әсте жетпіс бес жастағы адамды аяғын ілбіп басатын жасы ұлғайғандар санатына жатқызамыз ғой. Бірақ, бұл жастағылардың бәрі бірдей емес екен. Оған көксулық Әмірбай қарияның гір көтеруден әлемдік, халықаралық, құрлықтық жарыстарда топ жарып, жанкүйерін желпіндіріп жүргені дәлел. Әншейінде сабырлы кейіптегі жан додалы жарыстарда қарсыластарына дес бермей, омырауына 74 медаль тағып, көкбайрағымызды желбіретіп, ел мерейін асырып жүр.
Спортшы ағамыз жұбайы Жібек екеуі өткен күндерді еске алғанда ерекше әсерленіп, желпіне сөйлейді. Көксу ауданына қарасты Мәмбет ауылында тұратын спортшыны көргенде «Япыр-ау, мына кісі батпандай тасты қалай көтереді?» деп қалуың әбден мүмкін. Десек те шындығы сол.«Күш атасын танымас» демекші, қанша жеңіл болғанымен, жүректілігі мен ептілігі арқасында бар қиындықты көтере білген. Әмірбай ағаның балғын балалығы сұрапыл соғыс жылдарымен тұспа-тұс келген. Әкесі Отан қорғауға аттанған. Сол кеткеннен туған жерге оралмады. Немере бауыры Намазбай қабырғасы қатпаған төрт жастағы баланы бауырына басады. Кейіннен туысы Тоқсанбайдың отбасында тәрбиеленіп, тағдырдың кермек дәмін татады. Ширығып, қиындыққа мойымаған Әмірбайдың спортпен айналысуы жасынан бастау алыпты. Мектепте қыста шаңғы, жазда түрлі спорт түрлерінен жарыстар жиі өтетін. Шынашақтай қара бала солардың бәрінен қалмайды. Намысшылдығы басым. Құрдастарынан жеңіліс тапқан күні жаттығып, ауланы дүбірлетіп тынбайды. Арманы асқақ болып, жетуге талпынды. Осы кезде үлкендер «Талабы бар бала. Осыдан бірдеңе шығады» дейді екен.Қандай да бір жақсылыққа дәнекер, себеп болатын жайлар кездеседі ғой. Гір тасын көтерудің жайын өзі былайша әңгімеледі.– Осы күрделі спортқа біржола келуіме мына жай түрткі болды. Жаздың жайдары күні ауылға кәдімгі цирк өнерпаздары келді. Цирк аренасын жағалай отырып, әртістердің көз ілеспес жылдамдықпен әртүрлі ойын түрлерін көрсеткенін тамашалаймыз. Жаспын, еліктегіштігім басым. Бір кезде ортаға күштілер шықты. Бұлшық еттері бұлтылдап, зілдей гір тастарын көтеріп, күш сынасты. Шетінен ауыр салмақты сезінбейтіндей. Таңдандым, үйге келісімен ауладағы темір атаулыны көтеріп, күшімді сынай бастадым. Ауылымыз таудың етегінде. Жұмыр, қой тастар да менің қажетіме жарады. Қолым босай қалса, қорымдағы тастарды ары-бері лақтырамын. Кейін ауыр доңғалақтарды жинастырып, штанга жасауыма тура келді. Қарап отырсам, уақыт өткен сайын жігерім жанылғандай. Нәтиже жаман емес. Мектептегі спорт жарыстарында жеңімпаз атана бастадым, – дейді ол.Бастаған ісінен қорытынды шығармаса көңілінің хошы келмейтін жас орта мектепті жақсы аяқтап, жоғары оқу орнына түседі. Таңдауы да Алматыдағы дене шынықтыру институты. Байқаса студенттердің басым көпшілігі еркін күреске жазылып, ақ тер, көк тер болып жатады. Ол да күреспен айналысты. Кейін грек-рим күресінің де «тамырын» басты. Осы спорт түрімен жарыстарға қатысып, ептілік пен айла-тәсілді үйренді. Әрине ең бастысы уақытын зая кетірмеді.Халқымызда «Балта соғар жігіттің көрігінен белгілі, бөрі соғар жігіттің бөрігінен белгілі» деген тәмсіл бар. Балалық шақтағы гір көтеріп, тас ойнатқан сәттері оны өзіне айналдырып, тарта берді. Күнделікті әдетімен жаттығуға келеді. Бірден назары бұрыштағы зілтемірге түсті. Жылдам қимылдап, оның қандай салмақта екеніне қарамастан тік көтерді. Айналадағылар зілтемірге бір, жігітке бір қарайды.– Жарайсың, мынаның салмағы 90 кило. Бабыңда екенсің, – деп ауыр алақанымен жауырынымнан қаққан орыс жігіті кейін менің бапкерім болды. Одан көп үйрендім, ол мені жақсы лебізімен жетеледі. Сол Вадим Степанович екі жыл ішінде менің спорт шебері атануыма көп күш салды. Үміті ақталып, спорт шебері атандым. Дене бітімімнің ауыр атлетикаға келетінін де бапкерім айтқан болатын. Өз салмақ дәрежемде қарсыластарыма дес бермедім. Қолыма диплом алғанда қалада қалуға мүмкіндігім бар еді, бірақ туған жердің жусанының жұпар иісі мені Мәмбет ауылына шақырды, – дейді қария.Жігітке жеті өнер де аздық етеді деп жатамыз. Әмірбай Рысқұлов мектепке ұстаздық етіп, оқушыларды саламатты өмір салтына баулып, спорт жарыстарына қатысуға шақырды. Ұстазының мамандығына деген сүйіспеншілігіне балалар қайран қалатын. Енді ол ауылдағы көркемөнерпаздар үйірмесіне белсене қатысты. Қоңыр домбыраны қолына алып, ән салды. Сырнайда ойнады. Үйірме мүшелерімен бірге Мәскеуге барып, өнер де көрсеткен кезін де еске алады.Сегіз қырлы, бір сырлы жігітпен Жібек сол кезде тағдыр қосқан. Осылайша ұстаздың өмірімізге лайықты өрендер тәрбиелеудегі жемісті еңбегі жалғасады. Ұстазы жақсының – ұстамы жақсы. Әмірбай аға оқушылардың жат әдеттерден бойын аулақ салуына әрдайым назар аударып, керісінше спорт түрлерімен айналысуын қалайды. Еңбегі де жемісті. Мәселен, өмірден өз орнын тауып, тәуелсіз елдің ертеңі үшін білім-білігін арнағандар легінде. Шәкірттерінің бірі Қанат Смағұлов Ресейде қызметте. Ал Төкен Егінбаев Астанадағы белді құрылыс компаниясын басқарады. Басқа да сайдың тасындай азаматтар шәкірт ретінде жауапкершілік жүгін арқалап жүр. Олай болмағанда ше, жетпістен асқанда «желіккен» ұстаздарына қарап, жігерленбей көрсін.Жарыс төрі спортшыны айналып өтпеді. Жетпіс жасқа келгенде де стадион оны шақырғандай болды. Сөйтіп, алғаш жарыстарға төреші болған ол кейін аудан, облыс намысын қорғайтын бәсеке төрінен табылды. 2008 жылы тас түйін бекініп, Архангельск қаласында өткен әлем, Еуропа чемпионатына барады. Бұл бастамасын біреулер қолдаса, кейбіреулер тіпті ұнатпайды. Командаларды таныстыру барысында жүргізуші саптағы орыс шалын жарты сағат таныстырады. «12 дүркін әлем чемпионы, 16 мәрте Ресей чемпионы Евгений Полуляхов!», дейді ғой дәрежесін көтеріп… Жұрт ду етіп, құрмет көрсетеді.Кезек өзіне келгенде «Әмірбай Рысқұлов, Қазақстан!» деп қысқа қайырады. Басқа не десін. Осы кезде жерлесімізді намыс буып, қазақи қаны қозады. Күш-қайратын жинап, дәл бүгін мойындатамын деп іштей ант береді. Қазақтың атақ-абыройын шығару осы күні өзіне жүк болғанын сезінеді. Спортшылар қатар жарысқа түседі. Он екі килолық қос гірді 5 минутта 58 рет серпе көтереді. Даңқынан ат үріккен Евгенийдің жиған ұпайы – 105, ал ағамыздың ұпайы 107-ге жетіпті. Осылайша гір көтерудің екі түрі бойынша әлем және Еуропа чемпионы атағына ие болады.Гірді қақпақылдап лақтырудан өткен эстафеталық сайыста да барлығын артқа тастайды. Осы сапарында жұқа жүзді спортшы Архангельск қаласынан 4 алтын, 4 күміс, 4 қола медальге ие болып қайтады. Осы жарыста сарапқа түскен Ломоносов атындағы жүлдені де еншілейді. Алғашында бұған ешкім нанбайды. Содан кейін талмай жаттығу жалғасады. Ресейдің Рыбинск қаласында 2009 жылы өткен әлем біріншілігіне жұбайы Жібек ананы да ала барыпты. Жарысқа шығарда шай қайнатып, бар жағдайына қарап, «бапкері» болыпты.Жеңіс тұғырына көтерілген сәтте еліміздің Әнұраны шырқалып, Көк туымыз көтерілгенде кеудесін қуаныш кернейді. Осы жылы Киров қаласында өткен Григорий Кощеев атындағы халықаралық додада да ешкімге дес бермейді. Ресейдің бар жүлдесін қоржынға басады.Жалпы ардагер спортшылар арасындағы бар жүлдені жеңіп алып, мерейі өседі. Қандай мәртебелі жарыстарда болсын қазақ деген қайсар ұлттың қариясы екенін дәлелдеп келеді. Абсолюттік чемпион кубогын иеленіп, Ресейдің «Қанатты арыстан» орденімен марапатталғанын да мақтанышпен айтқан жөн. Және гір көтеруден халықаралық қауымдастықтың еңбек сіңірген спорт шебері атағын иеленген. Қазір оның омырауында 74 медаль бар. Оның 50-і –алтын.Әмірбай Рысқұлов гір көтеретін спортшы ғана емес, ауылдың қадірменді қариясы, балаларының жол көрсетер әкесі, немерелерінің үлгі тұтар атасы. Басқаларға өнегелі өмірімен танылған қайсар қария.Күмісжан БАЙЖАН.Алматы облысы.