Дүбір
Олимпиадаға 162 күн қалды
Қанат Әбутәліпов – былтыр елімізге бокстан Бүкіләлемдік тұжырым бойынша Олимпиаданың алғашқы жолдамасын әкелген боксшымыз. Оның сол кезде «Астана арландары» кәсіпқой клубының сапында тегі марокколық, бірақ Францияның «Париж юнайтед» командасында өнер көрсеткен Нордин Оубаалидің екі аяғын бір етікке тығып, шаршы алаңның төрт бұрышын қуалай жүріп сабағанын жанкүйерлердің бәрі көрді. Сол кезде бесінші бұрышты іздей бастаған қарсыласы еріксіз қазақ боксшысының алдында жығылғанын білеміз. Осы жеңіс Қанаттың ғана емес, еліміздің мерейін асырды, бокстағы беделімізге бедел қосты. Енді Әбутәліповке осы жеңісті жолын Лондон төрінде өтетін айқастарда жалғастыруға тілектестігімізді білдіріп, бүгін журналист-жазушы Смағұл РАХЫМБЕКТІҢ Қанат пен оның жеке бапкері Бейбіт Масабеков туралы жазған дүниесін ұсынуды жөн көріп отырмыз.
Дүбір
Олимпиадаға 162 күн қалды
Қанат Әбутәліпов – былтыр елімізге бокстан Бүкіләлемдік тұжырым бойынша Олимпиаданың алғашқы жолдамасын әкелген боксшымыз. Оның сол кезде «Астана арландары» кәсіпқой клубының сапында тегі марокколық, бірақ Францияның «Париж юнайтед» командасында өнер көрсеткен Нордин Оубаалидің екі аяғын бір етікке тығып, шаршы алаңның төрт бұрышын қуалай жүріп сабағанын жанкүйерлердің бәрі көрді. Сол кезде бесінші бұрышты іздей бастаған қарсыласы еріксіз қазақ боксшысының алдында жығылғанын білеміз. Осы жеңіс Қанаттың ғана емес, еліміздің мерейін асырды, бокстағы беделімізге бедел қосты. Енді Әбутәліповке осы жеңісті жолын Лондон төрінде өтетін айқастарда жалғастыруға тілектестігімізді білдіріп, бүгін журналист-жазушы Смағұл РАХЫМБЕКТІҢ Қанат пен оның жеке бапкері Бейбіт Масабеков туралы жазған дүниесін ұсынуды жөн көріп отырмыз.
Пекиндегі пайымдарҚанат Әбутәліпов ардақты ұстазы әрі бапкері Бейбіт Қазбекұлымен Пекиннің әйгілі жаяулар көшесі – Лиулиджангпен қатар аяңдап келеді. Көк желектер жамылған әлемнің әйгілі осынау қаласының ауасы аса ауыр ма, қалай өзі! …Әлде, кешегі рингтегі жеңіліс жігерлерін жасытты ма, екеуі де терең тыныстай алмағандай күйде секілді. Астананың құштарлана жұтып, кеудеңді толтыра тыныстағанда, рахат күй кештіретін қымыздай қуатты ерке самалын сағынғандары болар, ұстаз бен шәкірт көпке дейін үнсіз қалды. Әлден уақытта барып бапкер ағасы сөз бастады.– Қанатжан, өмір үнемі жеңістерден тұрмайды. Сенің Пекиннің ХХІХ Олимпиадасына жолдама алып, қатысуыңның, ел намысы үшін адал айқасуыңның өзі бір асу. Рингте әлемнің аузымен құс тістеген небір керемет боксшыларымен бетпе-бет шайқастың. Қаншамасына төтеп бердің, лайықты қарсылас болдың, батырым! …Алла жазса, алдағы Лондон Олимпиадасына мықтап дайындалатын боламыз, – деді бапкері шәкіртін кең құшағына алып…– Түсіндім, мұғалім! – деді Қанат ұстазына өзінің жас шағында, Баршын ауылында жиі айтатын сөздерін еске алып……Бейбіт мектептегі жаттығу залынан шығып, үйіне беттегені сол еді, сөмкелерін арқалап, ентіккен бір топ бала артынан қуып жетті. Ішінде малақайы маңдайын басып қалған кішкене Қанат та бар. Осы бір баланың өзі жаттықтыра бастаған мектеп оқушыларының ішінен шалт қимылдарымен, секірген лақтай жылдам қозғалыстарымен, ең бастысы, шаршауды білмейтін қажырлылығымен көзіне түскеніне көп болған. Қазір де буы бұрқырап, қаңтардың қақаған аязын елең қылмай, ентіге сайрап тұр…– Мұғалім, а, мұғалім деймін! Бокс деген не, айтыңызшы! Егер шындап жаттықсақ, кім боламыз өскенде?..– Қанатжан, боксшы деген еліне қорған болар ертедегі батырлар секілді, әлсізге – пана, жұртының намысын бетпе-бет белдесулерде қорғайтын ерлер, – деді ұстазы, бала көңілінің көгершіндей қанат қаққан армандарына қызығып…– Түсіндім, мұғалім, – деп шәкірті ұзап кеткен құрдастарының соңынан құлындай құлдырай жөнелген сол жолы…… Пекин қаласының биіктігі 405 метрлік телемұнарасының кіре берісіндегі Алтын Айдаһар осынау ұлы елдің салтанаты мен қуатын аңғартып тұрғандай. Тұрғындарының саны 13 миллионнан асатын Пекиннің баяғы замандардағы көшелерінде рикшаларға мініп, бастарына қамыс қалпақтар киген халқының бет-бейнелері мен тұрмыстары танымастай өзгерген.– Біздің шаң басқан Целиноградты да Нұрсұлтан Әбішұлы тап осындай әлемдік қалаға, сәулеті асқан Астанаға айналдырды ғой, мұғалім, – деді Пекиндей ұлы шаһардың түнгі сәулетіне қарап Қанат та ішіндегі өз мақтанышын жасыра алмай!– Дұрыс, Қанатжан! Еліңнің осылайша қадірі мен қасиетін ұмытпасаң, кеудеңде ұлттық рухың жалындап тұрса, жеңістің талай тұғырларына көтерілесің әлі…Қастарына бір жасыл түсті моторикша тоқтады. Бейбіттің осындағы күндерінде бір байқағаны, қалада велосипедтер мен осындай моторикшалар көптеу. Әрине, бұл елде өздерінің өнеркәсіптерін ашып алған Volkswaqen, Daewoo секілді автоалыптар шығарған, жарқыраған неше түрлі сәнді көліктер де жанарыңды қарықтырады. Бірақ, қаражатты үнемдеуге үйренген екеуі секілді ауыл баласына 1 шақырымына 1, 2 юань ғана алатын мына моторикшалар қолайлы.– Мұғалім, ендігі қалған уақытта қайда барамыз, – деді шәкірті Қанат, бұған Пекин телемұнарасының қызықтарына қанып, қаланы 400 метрлік заңғар биіктен тамашалаған соң. Еш уақытта шыққан биігінде ұстаз алдындағы парызы мен қарызын есінен шығармайтын Қанат Әбутәліповтей азаматына бапкер Бейбіт дән риза. Өмірде қолы бірдеңеге жетсе, туған әкесін де танымай кететіндер де бар емес пе.– О, кэй! – деп елпек қағып моторикша иесі тұр, көлігінің шатырын қайырып, екеуіне ізет білдіріп…– Енді, Қанатжан, Пекиннің ең ғажайып жерлерін таңдап, талғап аралайық! Өйткені, уақытымыз тығыз, – деді бапкері, бір қарағанда тарлау, аядай ғана көрінетін моторикшаға жайғасып жатып, жайдарылана…Қазіргі Пекиннің әлемдегі аса ірі өнеркәсіпті қалаға айналуы себепті шаһардың ауасын ауырлатып жібергені сезіледі.– 13 миллион адам тұратын Пекин қаласының аумағы 120 шаршы километр екен. Москваның аумағы 47 километр. Біздің Астанамыз да келешекте осындай жерді алатын болса, даламыздың кеңдігі жетеді ғой, мұғалім…– Астанаға мұншалық далиып, жайылып кетудің керегі болмас, Қанатжан! Қазақтың ұлан байтақ даласын елді мекендерсіз қалдырып, баршамыз бір қалаға жиналсақ, жөн бе? Қытай халқы 2 миллиардқа жуықтады. Біздің халқымыздың саны бар болғаны 16 миллион ғой!– Түсіндім, мұғалім! Елбасымыз Астананың ең үлкен мақсаты – өз тұрғындарының жақсы өмір сүруіне аса қолайлы, таза, сәнді, ұқыпты қала болуы деуі осыдан екен ғой……Екеуі қызу әңгімемен авторикшаның Пекиннің мыңдаған автомашиналары сеңдей соғылысқан көшелерін орман ағаштарының арасымен жүйтки жүгірген ақ тиіндей зымырай кешіп, атақты Юнг Хэ Гун Тибет Будда храмының алдына тоқтай қалғанын аңғармай қалысты. Жүргізушіге 3 юань ұсынып жатып, Бейбіт бар білетін ағылшыншасын қолданып, Пекиннің әйгілі Гу Гун Император сарайының қай тұста екенін сұрап қалды…– Пекин – ғажап қала! Бірақ біздің Астанамыздан сұлу емес екен, – деді өз елінің сөзсіз патриоты Қанат Әбутәліпов, ұстазы мен екеуі Құс ұясы аталатын, Олимпиада алауы жағылып, ойындары ашылған Қытайдың Ұлттық стадионына атбасын тірегенде. Швейцариялық сәулетшілер Херцог пен Де Мерон жобалаған Ұлттық стадионға Пекин қаласының ғана бюджетінен 500 миллион доллар жұмсалыпты. Арқаулары болаттан тартылып, мықты бетон құймаларынан өрілген Құс Ұясының 258 мың шаршы метр алаңына 91 мың көрермен сыйып кеткен сол жолы. Ол мыңдардың арасында Қазақ елінен келген спортшылардың сапында Бейбіт бапкер мен оның бала жасынан тәлімі мен тәрбиесін, әкелік қамқорлығын көрген атақты боксшы Қанат Әбутәліпов та отырған рингке шығар өз күнін күтіп…Пекиннен Алматыға бет алған ұшақ ішінде Қанат биіктен ұлы қалаға көз салды. Ұлттық су орталығы, Олимпиялық мұнара секілді ұзын саны 30-дан астам нысандар негізінен қаланың солтүстігі мен батыс аймақтарына орналасқан екен. Сұрғылт тұман басқан Пекин үсті Алматыны еске оралтты.– Мұғалім, елге оралған соң, демалысты азайтып, бірден жаттығуға кіріссек қайтеді… Бапкер шәкіртіне қараса, жанарларында бір ұшқын ойнап тұр, аспан астындағы жымыңдаған жұлдыздармен нұр ұластырғандай…– Лондон Олимпиадасына жолдаманы міндетті түрде жеңіп алайық, мұғалім…Бапкер Бейбіт, ұстаз Бейбіт жымиып күлді. Қанатының бойында күні кешелер жасып қалғандай көрінген жігер қоламта отындай жана бастапты. Олай болса, іске сәт!.. Бапкер өз ойына өзі риза болып, түнгі аспанға шырқай көтеріліп бара жатқан әуе көлігінің бесіктей тербеткен рахатына бөлене бастады алаңсыз. Бұл – ұстаз бен шәкірт үшін жеңісі мен жемісі, қиындығы мен қызығы да қатар келген 2008 жыл болатын.Алда – Лондон олимпиадасы!…Жазушы ағасы телефон шалып, келіп кетуін өтінген соң, бапкер Бейбіт кешкі жаттығудан соң оның шаңырағына бас сұқты. Өзінің ғұмыр бойы жинаған мыңдаған кітаптарының ортасында төбесі ғана көрініп қаламгер бауыры әдетінше басылымдарын ақтарып отыр екен.– Бейбітжан, Қанатыңның осы жолғы жеңісі жайында айтшы, – деді жазушы бауыры өтініп…Бұлар Пекиннен елге келісімен аз күн ғана тыныстағандай болып, Қанаттың өзі өтінгендей, жаттығуға бірден кіріскен. Асқар Алатаудың баурайында орналасқан спорт кешенінде айлар бойына биік самырсын мен қарағайлардың жұпар ауасын жұта жүріп, шыңдалған. Тамақтан тартынып, айнала шарқ ұрып, болат сымдай ширыққан Қанаты.Еңбектері ақыры жанды бұлардың. Гуйжоу университетінің спорт залы атшаптырым, аумағы кішігірім футбол алаңындай, Әлемнің ең үздік деген 10 боксшысы бұл жолы бес түрлі салмақ дәрежесі бойынша алдағы Лондонда өтетін ХХХ Олимпиада жолдамасын сарапқа салуда. Сәнді киініп, ұршықша үйірілген жігіт ағасы жарыс мінберіне көтерілді.– Құрметті мырзалар! Алдағы Лондон Олимпиадасының жолдамасы үшін жарыста сіздерге табыс тілеймін. Спорт дүние жүзі халықтары достығының, бейбітшілік жолындағы ынтымақтасуының ортақ шаңырағы бола бергей, – деп ақ тілегін ақтарды АИБА президенті Чин Куо Ву мырза шын ниетпен…Алдыңғы орындардың бірінде отырған бапкер Бейбіт Масабаев өз шәкірті, халықаралық дәрежедегі спорт шебері Қанат Әбутәліпов Францияның атақты былғары қолғап шебері Нордин Оубаалимен рингке шыға келгенде қатты толқыды. WSB тұжырымы бойынша өтетін бұл жекпе-жек ережесі бойынша кем дегенде 7 раунд өтуі тиіс. Кәсіпқой бокстың осынау сайысына төтеп беретіндер сирек. Бейбіт болса, Қанаттың жалындаған жігеріне сенді. Алғашқы раундта Қанат жақын айқастан бойын аулақтау салып жүргендей көрген. Қарсыласыңа тым таяу жүрудің де өз пайдалары бар. Бірақ, оны бокс техникасын жетік игергендер ғана қолданса керек. Қанаттың тәжірибесінде шалт қимылдар, аяқ асты импровизациялар болғанымен, мұндай беттесулерде аса сақ болмаса, болмайды. Француз боксшысы рингте аса белсенді секілді. Қанат болса, баяулау, тіпті, самарқау қимылдайтын кейіп танытуда. Әлден уақытта барып бапкер шәкіртінің күш сақтап жүргенін, шабуылдарын кейінгі шешуші раундтарға сақтауға бекінгенін аңғарды.Салған жерден аптығудың қажеті де болмас. Қарсыластың айла-тәсілдерін байқап, көңілге түйіп барып қимылдағаны да жөн деп шешті ұстазы. Аяқтарын балет бишісінше кезек ауыстырып, рингте жеңіл қимылдап жүрген Нордин төртінші раундта Қанаттың найзағайдай шатырлаған үздіксіз соққыларының астында қалғанда, өзінің мықтап қателескенін кеш түсінді. Қазақ боксшысы шын шебердің өзі екен. Техникасының кереметтігін соңғы раундтарда танытқан Қанат Әбутәліпов осы жолы 100 пайыз басымдықпен француз боксшысын айқын басымдықпен тізе бүктірді…– Сөйтіп, алдағы Лондон Олимпиадасына жолдаманы жеңіп алдық, аға, – деді бапкер Бейбіт жазушы бауырына әңгімесін аяқтап. – Бұл табысымыз арқылы «Астана Арланс» командасының да бүкіл маусымдағы жеңістеріне үлкен үлес әкелдік.– Бәрекелді, Бейбітжан! Ұзағынан болғай жеңістерің, – деп жазушы ағасы ақжарма сезіммен ақтарыла қуанды.…Сыртта 2011 жылғы мамыр айының тамылжыған соңғы күндерінің шуағынан қуат алған алма ағашының аппақ гүлдері жайқала бастарын иіп, қаламгер ниетін құптап тұр…
Смағұл РАХЫМБЕК, жазушы.