Сәрсенбі, 15 ақпан 2012 7:46
Жыл сайын жер бетінде қатерлі ісіктен 8 миллион адам көз жұмады. Қазақстанда қалай?
Білесіз бе, жыл сайын дүние жүзінде 10 миллионға жуық жанның жаңадан онкологиялық ауруға шалдыққаны анықталып, қатерлі ісіктен жыл сайын 8 миллионға жуық адам қайтыс болуда. Егер де осы кеселді дер кезінде анықтап, алдын алмаса, қатерлі ісікке шалдығу және оның асқынуынан мезгілсіз көз жұматындар саны бүкіл әлем бойынша 2020 жылға қарай 1,5-2 есе артады деген болжам бар. Ракқа шалдығу негізінен ерлер арасында жеңіл және колоректалды обырдың, ал әйелдер арасында сүт безі және жатыр мойны обырының есебінен арта түспек.
Сәрсенбі, 15 ақпан 2012 7:46
Жыл сайын жер бетінде қатерлі ісіктен 8 миллион адам көз жұмады. Қазақстанда қалай?
Білесіз бе, жыл сайын дүние жүзінде 10 миллионға жуық жанның жаңадан онкологиялық ауруға шалдыққаны анықталып, қатерлі ісіктен жыл сайын 8 миллионға жуық адам қайтыс болуда. Егер де осы кеселді дер кезінде анықтап, алдын алмаса, қатерлі ісікке шалдығу және оның асқынуынан мезгілсіз көз жұматындар саны бүкіл әлем бойынша 2020 жылға қарай 1,5-2 есе артады деген болжам бар. Ракқа шалдығу негізінен ерлер арасында жеңіл және колоректалды обырдың, ал әйелдер арасында сүт безі және жатыр мойны обырының есебінен арта түспек.
Қазір қай елді алып қарасақ та, қатерлі ісікке шалдығу және оның салдарынан қайтыс болып жатқан жандардың саны кемудің орнына, тұрақты өсіп келе жатқаны байқалуда. Мұның бәрі адамдардың өмір сүру салтындағы түбегейлі өзгерістермен, денсаулыққа зиянды әдеттердің таралуымен, қоршаған ортаның нашарлауымен түсіндіріледі.
Бүгінде дүниенің төрт бұрышы бұл дертпен бірігіп күресуге мүдделі. Қатерлі ісіктің неден пайда болатынын, асқындырмау мен алдын алу мәселелерін де әлемнің әр шалғайындағы оқымыстылар қосылып зерттеуде. Және Дүниежүзілік Денсаулық Сақтау ұйымының қолдау көрсетуімен Обырға қарсы халықаралық одақ Дүниежүзілік обырға қарсы күрес күнін 2006 жылдың 4 ақпанынан бастап жыл сайын өткізіп келеді. Осы күні бүкіл әлем дәрігерлері сияқты Қазақстандағы медицина мамандары да онкологиялық ауру – жаһандық және аса маңызды мәселе екендігін халықтың есіне салады.
Ал біз елімізде қатерлі ісіктің белең алуы қай деңгейде екендігін және қандай шаралар жүргізіліп жатқанынан ақпар алу үшін Алматыдағы Қазақстан Баспасөз клубында «Обырдың алдын алу және оны ерте бастан анықтау. Біз бірге мықтымыз» тақырыбында өткен баспасөз мәжілісіне келген едік.
Биылғы Бүкіләлемдік обырға қарсы күрес күніне «Бірге біз мықтымыз» ұраны таңдап алыныпты. Өйткені, жұрт бірігіп жұмылғанда, әрқайсымыз айналамызға жауапкершілікпен, жанашырлықпен қарағанда ғана обыр және тағы да басқа жұқпалы емес аурулардан болатын мезгілсіз өлім-жітім көрсеткішін 2025 жылға қарай 25 пайызға қысқарту мүмкін болмақ. Бұл іске азаматтық, қоғамдық, үкіметтік емес ұйымдардың да ат салысқаны қажет болып тұр.
Халықаралық зерттеу мәліметтеріне көз салсақ, қатерлі ісіктердің пайда болуына – шылым шегу (30%), дұрыс тамақтанбау (35%), жұқпалы факторлар (10%), кәсіби канцерогенді әсер етулер (4-5%), иондық сәулелену (4-5%), ультракүлгін сәулелену (2-3%), ішімдікті пайдалану (2-3%), ауаның ластануы (1-2%), дене қимылының аздығы (4-5%) әсер етеді екен.
Ал Онкология және радиология ҚҒЗИ мәліметтеріне сүйенсек, 2010 жылы республика бойынша қатерлі ісікке шалдығу 100 мың адамға шаққанда 181,2-ні құраған. Обырға шалдығудың ішінде бірінші орынды жеңіл обыр – 12%, екінші орында сүт безі обыры – 11,3%, үшінші орынды тері обыры және меланома – 10,6%, төртінші орынды асқазан обыры – 9% алады. Қатерлі ісік ауруларынан болатын өлім-жітім 100 мың адамға шаққанда 103,9-ды құрап отыр.
Екінің бірі демесек те, айналамызда ет жақыны обырдан ажал құшып, жап-жас жандар мезгілсіз көз жұмып жатқанын жиі кездестіреміз. Мұндай жағдайда қайтпек керек? Қазірге медицина саласының мамандары обырдан жеңілмеудің бірден бір жолы – оны ерте бастан анықтау екендігін алға тартуда.
Демек, заманауи скринингтік тексеруден өткізу мен медициналық қызметкерлердің онкологиялық ауруларға қатысты қырағылығын арттыру арқылы онкологиялық ауруларды ерте бастан анықтауға болады. Және бұл – аса маңызды. Ісікті ерте кезеңде анықтау науқасты тиімді емдеп, оның толығымен сауығып кетуін арттыратыны расталған жәйт. Алайда, сырқаттанушылардың 50 пайызға жуығы қатерлі ісікке шалдығудың 3-4 (кеш) кезеңінде ғана мамандардың көмегіне жүгінеді екен.
Шеңгеліне түскен адамды білдірмей жейтін обырдың қауіптілігі де осында. Сондықтан да осындай дерттің бар екендігін адамдар еш қаперден шығармауы қажет екен.
Мәселен, осы арада Ресей мен ТМД елдеріндегі Philips «Денсаулық сақтау» секторының басшысы Владимир Габриелян мырзаның берген түсініктемесін келтірудің сәті түсіп тұр.
«Қазақстанда мемлекет тарапынан онкологиялық аурулар мәселесіне үлкен назар аударылады. Осылайша, 2011-2015 жылдарға арналған «Саламатты Қазақстан» денсаулық сақтауды дамытудың мемлекеттік бағдарламасында қатерлі ісікпен күрестегі негізгі екі кезеңге ерекше көңіл бөлінген – ерте диагностика және халық арасында саламатты өмір салтын кеңінен насихаттау арқылы осы аурулардың алдын алу.
Бүгінгі таңда онкологиялық ауруларға шалдықтыратын сыртқы факторлардың бәрі дерлік белгілі. Осыған байланысты 80 пайыз жағдайда онкологиялық аурулардың алдын алуға болатындығы белгілі болып отыр. Алғашқы кезеңдерде обырды (рак), әрине, білікті дәрігерлердің және қажетті бағдарламалық қамсыздандырудың көмегімен, УДЗ (ультра дыбысты зерттеу), рентген, КТ (компьютерлік томография) және МРТ (магнитті-резонансты томография) арқылы оңай анықтауға болады.
Аурумен күрес және ауруға шалдыққандардың үлесін қысқарту өлім-жітімнің жалпы деңгейін едәуір төмендетіп қана қоймай, республикалық бюджетке тиетін салмақты жеңілдетіп, денсаулықты сақтауға кететін шығындарды азайтуға ықпал етеді. Мәселен, Ресейде онкологиялық ауруға шалдыққан бір адамға көрсетілетін медициналық көмек орта есеппен 2 миллионнан бастап 3 миллион рубльге дейінгі қаражатты қажет етеді» дейді ресейлік маман.
Расында да, Денсаулықты дамыту жөніндегі 2011-2015 жылдарға арналған «Саламатты Қазақстан» мемлекеттік бағдарламасында халықтың арнаулы топтарын скринингтік тексеруден өткізу және саламатты өмір салтына ынталандыру есебінен қатерлі ісіктердің алдын алу және ерте анықтау іс-шараларына баса назар аударылған.
Ал мамандар қатерлі ісіктің құлаш жаюын едәуір төмендету үшін ең қарапайым, алайда аса тиімді мынадай ережелерді ұстану қажеттігін ұсынуда: шылым шегуден бас тарту, артық салмақпен күресу, белсенді өмір салтын ұстану және спортпен ұдайы шұғылдану, дұрыс тамақтану, жеміс пен көкөністердің қажетті мөлшерін тұтыну, ұзақ уақыт күн астында жүруден немесе солярийге барудан аулақ болу, жас ерекшелік тобына сәйкес алдын алатын скринингтік тексерулерден тұрақты өтіп тұру.
Ал Дүниежүзілік обырға қарсы күрес күнінде Қазақстанның барлық аймақтарында 1-10 ақпан аралығында онкологиялық аурулардың алдын алу үшін арнайы онкүндік өткізілді. Кешенді шараның мақсаты – онкопатология ауыртпалығын төмендету жөніндегі жаһандық мәселеге қоғамның назарын аудару, республика халқының, медициналық қызметкерлердің онкологиялық аурулардың алдын алу және ерте анықтау мәселесіне қатысты білімін арттыру, елге скринингтік тексерулерден өтіп тұру қажеттілігі жөнінде ақпарат тарату. Әйтсе де дәрігерлер де, халықтың өзі де онкологиялық ауруларға қатысты қырағылық танытуы тиіс. Мамандардың пайымдауынша, ағзамыздағы кінәраттарға бей-жай қарамаудың арқасында онкологиялық аурулардың асқынуының алдын алуға болады екен.
Айнаш ЕСАЛИ.
Алматы.