Сенбі, 18 ақпан 2012 8:08
2012 жылдың 11 ақпанында Қазақстан Республикасы мен Германия Федеративтік Республикасы арасындағы дипломатиялық қарым-қатынас орнағанына жиырма жыл толды. Бұл – біздің жас мемлекетіміз үшін айтулы оқиға. Оның салмағы Қазақстан Президенті Нұрсұлтан Назарбаевтың ГФР-ға ресми сапарының жоғары деңгейде табысты өтуінен де анық көрінді. Сапар барысында Қазақстан-Германия қатынастары ұзақ мерзімді және биік деңгейді қамтитын серпінді жоба екені айқын аңғарылды.
Сенбі, 18 ақпан 2012 8:08
2012 жылдың 11 ақпанында Қазақстан Республикасы мен Германия Федеративтік Республикасы арасындағы дипломатиялық қарым-қатынас орнағанына жиырма жыл толды. Бұл – біздің жас мемлекетіміз үшін айтулы оқиға. Оның салмағы Қазақстан Президенті Нұрсұлтан Назарбаевтың ГФР-ға ресми сапарының жоғары деңгейде табысты өтуінен де анық көрінді. Сапар барысында Қазақстан-Германия қатынастары ұзақ мерзімді және биік деңгейді қамтитын серпінді жоба екені айқын аңғарылды.
Елбасы Берлинде өткен ресми келіссөздерде биылғы өзінің шет елдерге алғашқы сапарын Германиядан бастағанын атап өтті. Бiз Германия Федеративтік Республикасын Қазақстан Республикасының достық пен сенімге негізделген интенсивті саяси, экономикалық және мәдени-гуманитарлық байланысы қалыптасқан Еуропадағы негізгі серіктесі ретінде қарастырамыз. Осы орайда тараптар халықаралық саясаттың жаһандық мәселелерін шешу жөніндегі көпжақты ынтымақтастықты жандандыру қажеттігіне баса назар аударды.
Бұл тәуелсіз Қазақстан басшысының Германияға жетінші сапары болатын. Сапары барысында Мемлекет басшысы Федералдық канцлер Ангела Меркель, Федералдық президент Кристиан Вульфф, Сыртқы істер министрі Гидо Вестервелле, атақты неміс саясаткерлері мен іскер азаматтары Хорст Кёллер, Ганс-Дитрих Геншер, Герхард Шредер, Франк-Вальтер Штайнмайер, сондай-ақ немістің бизнес қауымдастығы өкілдерімен кездесулер өткізді.
Әңгiме барысында қазақ-герман өзара ықпалдастығы бүгiнгi таңда бұған дейінгі қарым-қатынаспен салыстырғанда ең биік деңгейге көтерілгені атап өтілді. Өзара сауда-саттық көлемі өсіп, бiрлескен кәсiпорындар мен коммерциялық жобалар бойынша келiсiмдер жүзеге асырылуда. Екi мемлекет арасындағы мүдделестік халықаралық iстерде әрiптестiктің ұзақ мерзімді болуына ықпал етеді. Қазақстан мен Германия бейбіт мәселелер және дипломатиялық талас-тартысты реттеуде де бір-біріне қолдау көрсетіп келеді.
Қазақстан басшысы Берлин еуразиялық клубының (БЕК) ашылуына қатысты. Аталған клуб екіжақты іс-қимылдар, өңірлік қауіпсіздік, еуразиялық ықпалдастық үдерістері, энергетикалық және шикізаттық ынтымақтастық сынды өзекті мәселелерді талқылау үшін Қазақстанның Еуропадағы алғашқы үнқатысу алаңына айналатын болады. Осыған байланысты Мемлекет басшысы Берлин еуразиялық клубының ашылуы және жұмыс істеуі екі мемлекеттің әлемдік саясаттың жаһандық жүйесінде алға қойған міндеттерге қол жеткізуге мүмкіндіктер беретінін атап айтты.
Елбасының Германияға сапары барысында екі ел арасындағы сауда-саттық ынтымақтастығы да маңызды мәселелердің бірі ретінде қарастырылды. Неміс деректеріне сүйенсек, 2011 жылдың қорытындысы бойынша Қазақстан Республикасы мен Германия арасындағы сауда айналымы 6 млрд. еуроны (20%) құраса, бұл – ГФР-дың Орталық Азия мемлекеттерімен бүкіл сыртқы сауда көлемінің 85 пайызы деген сөз. Елімізде неміс капиталының қатысуымен 1200-ден астам кәсіпорын тіркелген. Сонымен қатар, Германияның инвестициялық, технологиялық және интеллектуалдық үлестері елімізді жаңғырту бойынша сапалы секіріс жасауда аса негізгі бағыттардың бірі болып табылады.
Сапар барысында екі ел үкіметтері арасында шикізаттық, өндірістік және технологиялық салалардағы әріптестік туралы келісімдерге қол қойылды. Бұл құжаттар отандық шикізат қорын, атап айтқанда, елімізде сирек кездесетін металдарды Германияның алдыңғы қатарлы технологияларына айырбастауға мүмкіндік береді. Осылайша, Қазақстан «ресурстарды технологиялар мен инвестицияға алмастыратын» формулаға сүйеніп, Германиямен іс жүзінде қарым-қатынас орнатқан алғашқы мемлекеттердің бірі болып отыр.
Мұндай келісімдер тек еліміз үшін ғана емес, неміс экономикасына да айтарлықтай тиімділіктер әкелетін болады. Статистикаға сүйенсек, бүгінгі таңда ГФР сирек кездесетін қазба байлықтары элементтерін импорттайды. Ал мұнай импорты – 98, газ – 87, көмір 77 пайызды құрайды. Осы орайда, Қазақстан Германия үшін алдыңғы қатарлы өнім ұсынушы мемлекеттердің бірі болып табылады (2011 жылы 7,3 млн. тонна мұнай жіберілді, яғни Ресей, Ұлыбритания және Норвегиядан кейін төртінші орынды иеленіп отыр). Сондықтан да неміс компаниялары ресми келісім күшіне енбей тұрып, былтырдың өзінде Қазақстанның жер ресурстарын зерттеп игеруге белсенді кірісті.
Берлинде инновация, инвестиция, энергия үнемдеу, энергия тиімділігін арттыру және қуат көздерін жаңғырту, білім беру мен медицина салаларындағы қарым-қатынасқа арналған үкіметаралық және ведомствоаралық 6 келісімге қол қойылды. Мемлекет басшысының айтуынша, Қазақстан мен Германия тұңғыш рет осындай екі тарапқа бірдей пайдалы әрі ауқымды уағдаластықтарға қол жеткізіп отыр. Құжат қорытындылары бойынша елімізге құйылатын қаржылай, технологиялық және зияткерлік неміс инвестициялары арта түседі.
Сапар нәтижесінде шамамен 4 млрд. еуроға жуық 50 коммерциялық келісімге қол қойылды. Барлық дерлік жобалар Қазақстан аумағында оннан астам алдыңғы қатарлы неміс технологиялары қолданылған жаңа өндіріс орындарын ашуға мүмкіндік береді. Осылайша, темір жол вагондарын және дөңгелектерін, ауыл шаруашылығы техникаларын шығаратын зауыттар, крандар, темір марганецтерін, модульді құрылымдар, темір құбырларын, қуат үнемдейтін және жылу сақтайтын шынылар, шар крандарын, топырақты ылғалдандыратын құбырлар, салалы ПВХ ленталары, кешенді балқытулар, техникалық газдар, болаттың ұсақталған қалдықтары, химикаттар, тау-кен өндірісі және т.б. өнімдерді шығаратын өндірістер ашылады деп күтілуде.
Жоғарыда келтірілген деректер немістің іскер азаматтарының Қазақстан рыногына белсендірек кіруіне қатысты өсіп келе жатқан ынтасын көрсетеді. Ал онда, әсіресе, Қазақстан экономикасын индустрияландыруға байланысты ауқымды жоспарлар мен шетелдік инвестициялар жағдайын жақсартуға қатысты үкімет жасап жатқан шаралар ескерілген.
Немістер өздерінің мінездік сипаттарына сай Қазақстанда жүргізіліп жатқан реформалардан жақсы хабардар және олар бұл үдерістердің дұрыс бағытта екендігіне бек сенімді. Екі ел арасындағы қарым-қатынастың тарихында тұңғыш рет Германияда кеңінен тараған «Дуалды» жүйе негізінде Қазақстанда бірігіп кәсіби-техникалық кадр дайындау бастамасы көтерілді. «Дуалды» жүйе деп жастардың таңдаған кәсібі бойынша екі білім ошағында өтетін дәрістер жүйесін айтады, яғни бір жағынан бұл – кәсіби мектеп, екінші жағынан үйрететін кәсіпорын. Қуантатыны, Германия тарабы алғашқы келіссөздерде-ақ Қазақстан ұсынысын қабылдап, ресми және іскер құрылымдардың қатысуымен «Дуалды» бағдарламаға серіктес болуға дайын екендіктерін білдірді.
Білім беру саласы туралы сөз қозғағанда, белгілі жоба – Алматы қаласындағы Қазақ-неміс университетін назардан тыс қалдыруға болмайды. Берлинде қол қойылған бірлескен мәлімдеге сәйкес, бұл жоба дамытыла бермек.
Қазақстан Республикасы мен Германия Федеративтік Республикасының басшылары екі ел арасындағы байланыстың маңызды дәнекері ретінде Қазақстандағы неміс этносын (200 мың адам), сондай-ақ бұрын Қазақстанда тұрған қазіргі Германия азаматтарын (900 мыңнан аса адам) ризашылықпен мәлімдеді. Сонымен қатар, Қазақстан Республикасында тұратын этностық немістердің мәселелері бойынша Қазақстан-Германия Үкіметаралық комиссияның жұмысы нәтижелі екені аталды.
Президент Н.Назарбаев сапарының нәтижесі көрсеткендей, Қазақстан мен Германия өзара байланыстарын нығайта беруге, тиімді қарым-қатынастардың жаңа бағыттарын іздеуге және проблемалық мәселелерді шешуге ұмтылыс танытады. Берлин бұрынғысынша Қазақстандағы демократияландыру үдерістеріне, Астананың аймақтағы және халықаралық деңгейдегі іс-әрекеттеріне, жалпы еліміздің түрлі деңгейдегі ұсыныстары мен бастамаларына үлкен қызуғышылық білдіріп келеді. Өз кезегінде Қазақстанға да саяси және экономикалық уағдаластықтар негізінде пайдаға шығатын маңызды тұстар жеткілікті. Егер келісімдер табысты жүзеге асса, онда Қазақстан Германиямен әріптестіктің стратегиялық деңгейіне нақты шығуға мүмкіндік алады.
Қазақстан мен Германия арасындағы 20 жылдық байланыстарда елдердің игілігіне қызмет етіп келе жатқан басқа да мағыналы оқиғалар мен жобалар аз емес. Саяси салаға қатысты айтатын болсақ, 2010 жылғы шілдеде Қазақстанға Федералды канцлер А.Меркельдің бірінші сапары жүзеге асқанын атап өту керек. Оның өзі бұл сапарды тарихи деп атағаны мәлім. 2010 жылғы қазанда Астанаға Бундестаг Президенті Н.Ламмерттің келуін де айтулы оқиғалар санатына жатқызған жөн. Бұл да Германия Парламенті төменгі палатасы жетекшісінің елімізге тұңғыш сапары болатын.
Еуроодаққа 2007 жылы төрағалық еткен Германияның бастамасымен Еуропа және Орталық Азия елдеріне қатысты «Жаңа стратегиялық әріптестік» құжаты қабылданса, онда өңір бойынша басты орын Қазақстанға берілгені де ұмытылған жоқ. Өз кезегінде Қазақстан Германияны «Еуропаға жол» мемлекеттік бағдарламасын жүзеге асырудағы маңызды әріптесі санап келеді.
Біздің халықтарымыздың жақындасуына Германияда 2009 жылы Қазақстан жылының табысты өтуі оң әсер етті. Бұл Қазақстанның Еуропа елдерінде ұйымдастырылған алғашқы ауқымды жобасы болатын. Ал 2010 жылы біз Германияның Қазақстандағы жылын өткіздік. 2009 жылы Германияда қазақстандық студенттер санының өсуіне байланысты «Болашақ» халықаралық бағдарламасы орталығының өкілдігі ашылды. 2010 жылдың қазанында Гумбольд атындағы Берлин университетінде «Қазақстан және қазақ тілі» лектораты ашылса, бұл да алыс шет елдердегі Қазақстанның алғашқы жобасы еді.
Осылайша, бүгінгі табыстар мен келешекке жоспарланған бірлескен жобалар және түрлі салалар бойынша екі жақты қарым-қатынастың тереңдеуі екі ел халықтарының ықпалдасуы жолында таңдалған бағыттардың дұрыстығын көрсетіп беріп отыр.
Нұрлан ОНЖАНОВ, Қазақстанның Германиядағы Төтенше және өкілетті елшісі.