Бүгінде балабақшаның көбейгені ата-анаға қуаныш, ал кәсіпкер үшін табыстың көзі болып тұр. Жалпы, соңғы жылдары Қарағанды облысында қарқынды түрде дами бастаған жекеменшік балабақша ашу қозғалысы өңірдегі мектеп жасына дейінгі тәрбие және оқыту ошақтарына деген сұранысты толығымен қамтамасыз етуге қауқарлы екендігін көрсетті. Мұны қарағандылық кәсіпкер келіншек Гүлнәр Смаилованың мысалынан көруге болады.
Гүлнәрдің өзі балабақша кезегінің жылдар бойы күттіретін мәселесін бір кісідей көрген көп балалы ана. Бес ұлы желкілдеп өсіп келеді. Екі баладан кейін үшем туып, олар үш жасқа келгенде балабақшадан орын таба алмай сарсаңға түскені күні кеше ғана еді. Ал қазір кәсіпкер ханым Гүлнәрдің үш бірдей жекеменшік балабақшасы бар.
Алғашқы балабақшаны 2015 жылы ашып, атауын «Ақмаржан» деп қойды. Бұл жобаны ол «Бизнестің жол картасы-2020» мемлекеттік бағдарламасы бойынша іске асырды. Араға бір жыл салып Майқұдық елді мекенінен «Армашка» деген балабақша бүлдіршіндерге айқара есік ашты. Тасы өрге домалай бастағанын сезген кәсіпкер ханымның тағы бір жылдан кейін Пришахтинск елді мекенінде «Одарешка» атты балабақшасы тұсау кесті.
Айта кеткен жөн, бұл үш балабақша мемлекеттік-жекешелік әріптестігі желісі бойынша жұмыс істейді. Бәрі де «Даму» кәсіпкерлікті дамыту қорынан алынған несиенің қаражатымен ашылған.
– Біздің балабақшадағы бүлдіршіндер мемлекеттік тапсырыс бойынша орналастырылады. Яғни, ата-аналар төлемақының бір бөлігін – 11 мың теңге ғана төлейді. Қалған қаржыны мемлекет өз мойнына алған, – дейді Гүлнәр ханым.
Кәсіпкер келіншектің балабақшалары 300 және 360 балаға шақталған. Бүгінде мұнда бос орын жоқтың қасы. Әр балабақшада 70 адамнан жұмыс істейді. Олардың бәрі де қатаң сұрыптаудан өткен, өз ісін жан-тәнімен жақсы көретін, білімді де білікті мамандар. Қазірдің өзінде Гүлнәрдің балабақшалары кеншілер астанасындағы мектеп жасына дейінгі 66 тәрбиелеу мекемесі арасында үздік ондықтың ішіне енеді.
Гүлнәр Смаилова заман талабына сай жаңашылдықпен жұмыс істеуді алдына мақсат етіп қойған жан. Қазіргі таңда оның балабақшаларында 12 топ жұмыс істейді. Мұнда тіл ұстартуға, шығармашылыққа баулуға, ән мен биді үйретуге арналған арнайы үйірмелер қалыпты жұмыс істейді. Бұдан бөлек, робот техникасы және жеңіл дизайн бойынша курстар ұйымдастырылып тұрады.
Таяуда «Одарешка» балабақшасында бүлдіршіндер арасында тұңғыш рет робот техникасы бойынша сайыс өтті. Бұл байқауға облыстың барлық мектепалды ұйымдарынан 23 команда қатысып, жүлделі орындарды сарапқа салды.
– Біз балалардың шығармашылықпен және спортпен айналысуымен ғана шектелмейміз, – дейді Г.Смаилова. – Олардың денсаулығына да баса көңіл бөлеміз. Әр тоқсан сайын балалардың иммунитетін жақсарту үшін галотерапия өткізіледі. Балабақшада тұзды бөлмелер де бар. Барлық топтағы балалар тәрбиешілермен бірге тұзды бөлмелерде 15-20 минут сабақ өткізеді.
Гүлнәр ханым балабақшаларындағы барлық бөлменің заманауи құрылғылармен жабдықталғанын орынды мақтан етеді. Тағы бір сүйсінерлігі, мұнда білікті психологтар балалармен ғана жұмыс істеп қоймай, ата-аналарға арналған семинарлар да ұйымдастырып тұрады.
Гүлнәр ханымның арманы асқақ. Алдағы уақытта жекеменшік мектеп ашпақ ойы бар. Кәсіпкер ханымның жанданған жұмысын көріп жүрген ата-аналар да қолқа салып жүрген көрінеді. Балаларын заманауи талаптарға сай жұмыс істейтін мектепке күні бойы қалдырып кету кімге қолайлы емес дейсіз?! Қазіргі таңда ол бұл мәселені терең зерттеп жүр екен. «Шешінген судан тайынбас» деген, егер мемлекет тарапынан қолдау көріп жатса, алған бетінен қайтпайтын кәсіпкер келіншек үшін алынбас қамал жоқ деп нық сеніммен айтуға болады.
Қайрат ӘБІЛДА,
«Egemen Qazaqstan»
ҚАРАҒАНДЫ