Қазақстан Президенті Нұрсұлтан Назарбаев шейх Заид мешітіне барды, деп хабарлады Президенттің баспасөз қызметі.
Мемлекет басшысы Әбу-Даби қаласындағы Біріккен Араб Әмірліктерінің көрікті жерлерінің бірі – шейх Заид мешітін аралап көріп, осы елдің негізін қалаушы әрі тұңғыш президенті шейх Заид бен Сұлтан Әл Наһаянның рухына тағзым етті.
Сондай-ақ Нұрсұлтан Назарбаев мешіт ғимаратының сәулет ерекшелігімен танысып, Құрметті қонақтар кітабына қолтаңба қалдырды.
Мешітке бір уақытта 50 мың адам сыяды. Ғибадат орнының бұрыштарына биіктігі 107 метр болатын төрт мұнара орнатылған. Бас ғимараттың сыртқы қабатын ақ мәрмәрмен көмкерілген 82 күмбез жауып тұр. Мешіттің ішкі аумағы 17 400 шаршы метр.