Сенбі, 21 сәуір 2012 7:51
Мектептен қолына аттестат алған түлектің жүрегі аттай тулап, жүзі бал-бұл жанып шығатыны есте шығар. Аттестат оның он жылғы ой еңбегінің, дене және рухани жетілуінің әділ бағасы, оң нәтижесі ретінде қабылданады. Аттестат делінетін осы құжатта пәндер бойынша ғана емес, сонымен бірге дене тәрбиесі мен тәртібі үшін де бағалар қойылады.
Сенбі, 21 сәуір 2012 7:51
Мектептен қолына аттестат алған түлектің жүрегі аттай тулап, жүзі бал-бұл жанып шығатыны есте шығар. Аттестат оның он жылғы ой еңбегінің, дене және рухани жетілуінің әділ бағасы, оң нәтижесі ретінде қабылданады. Аттестат делінетін осы құжатта пәндер бойынша ғана емес, сонымен бірге дене тәрбиесі мен тәртібі үшін де бағалар қойылады.
Енді міне, Елбасының Жарлығы бойынша құқық қорғау органдарының қызметкерлері де сынақтан өтіп, өз біліктіліктері мен рухани тазалығының әділ бағасын алуға дайындалуда.
Ал аттестаттау (фр. аttestation, лат. attestātio – куәлік, бекіту) – біліктілікті, білім мен машықтар деңгейін, сондай-ақ талаптарға сәйкестікті айқындау, пікір, мінездеме беру деген ұғымды білдіреді. Аттестаттау нәтижесінде алынған құжат аттестат аталады. Ұйымның қызметіне қатысты жүргізілген аттестаттау барысында қызметкердің дайындық деңгейі, шеберлігі, біліктілігі тексеріледі.
Құқық қорғау органдарының қызмет майданы негізінен қылмыстылықпен күрес өрісінде жүреді. Бұл майдан ерекше қызықтарға да, айрықша қатерлерге де толы. Сондықтан да болар осы органдарды күштік институттар деп танимыз. Алайда бұл тек сыртқы көрініс, үстірт бейне. Әрине, бұл салада қызмет істеу үшін мықты денсаулық, темірдей жүйке, арнайы біліктілік керектігі рас. Дегенмен, құқық қорғау саласы ең алдымен гуманитарлық, тәрбиелік сала. Бұл саладағы қыздар мен әйелдердің үлесінің артуы, осы майданның жапсарлас азаматтық салалармен әріптестікте болуы, тіпті тікелей өз ішінде көптеген азаматтық қызметкерге жұмыс істетуі бұл саланы бірыңғай күштік институт деудің негізсіздігін айғақтайды. Шындығында ол нәзік сала. Биік интеллектуалдық майдан. Адам табиғатындағы түрлі құштарлықтардың жағымсыз жақтарын жеңу үшін талмай арпалысатын рухани күрес алаңы.
Ресми мәліметтерге сенсек, 1993 жылы Қазақстанда 206 мыңнан аса қылмыс тіркелсе, қазіргі кезде 120 мың шамасында көрінеді. Алайда қылмыстылықтың абсолют және салыстырмалы ресми көрсеткіштерінің төмендеу үрдісі әлеуметтің де, мамандардың да тарапынан сенімге ие емес. Бұл ресми тұрғыдан да мойындалуда. Осы мойындау қоғамдық және жеке-дара құқықтық сананың өскенін, қоғамның ашықтық режімде өмір сүруге көшкенін айғақтайды.
Қылмыcтылықпен күрестің шетелдік тәжірибесін саралау қызметкерлердің дене және әскери дайындығын шыңдау аса қажетті, бірақ, жеткіліксіз деген пайым жасатады. Заманауи жағдайлардағы қылмыстылықпен күрес тек жоғары кәсіптік біліктілікке, интеллектуалдық жігерге, жетілген икемді әдіснамаға, шебер үйлескен стратегия мен тактикаға ғана сүйенбейді. Қызметтің осы бір қиын саласында жүрген қызметкердің де тұтастай алғанда бүкіл құқық қорғау институтының да рухани-гуманитарлық әлеуетін ашу маңызды болып табылады. Құқық қорғау саласы қоғамның тәрбие, білім, ғылым, денсаулық сақтау, басқа да азаматтық бейбіт институттарымен үнемі өзара әрекеттестікте, берік сенімді қоян-қолтық бірлестікте дамуы тиіс. Ол үшін осы саланың гуманитарлық, адамдық-рухани әлеуеті мейлінше ашылуы, өрбуіне жағдай жасау керек. Тек сонда ғана қоғам институттары мен мемлекеттік органдар арасында риясыз сенім орнауға алғышарттар жасалады. Дамыған елдердің құқық қорғау органдарының табысының іргетасы жоғары кәсіптілік пен қоғамның оларға деген сеніміне негізделеді десек қателеспейміз.
Алдыңғы жылдары құқық қорғау саласының сұраныстарын қанағаттандыру үшін қажетті материалдық-техникалық қаржы-қаражат бөлініп келді. Қызметкерлердің әскери әрі кәсіптік дайындығына қойылар талап та күшейтілді, оны нығайтуға тиісті жағдайлар да жасалды, жасала да бермек. Мұны сала қызметкерлерінің өздері де мойындайды. Дегенмен, алмақтың да салмағы бар. Алғанның қарымын қайтарар кез болады. Құқық қорғау органдарының да қоғамға берері мол болуы тиіс. Кім қандай деңгейге көтерілді? Кім тоқыраудан шыға алмай жүр?
Сынақтан өту жаһандану жағдайындағы талаптарға төтеп беру үшін қажет. Кез келген салада тиісті ретімен, кейде кезектен тыс аттестаттаудан өтіп тұру – замана талабы. Аттестаттау тек қоғам мен мемлекеттің мақсат-мұраттарына жетудің өскелең қажеттілігін өтеу үшін емес, адамның өзінің үйреніп қалған сүрлеуден шықпайтын сезімнен жұрдай робот болып кетуінен сақтайтын құқықтық тетік. Ғылымның болжауынша, роботтың өзі қайсыбір сезімдерді білдіре алуы керек. Ал біз адамбыз ғой. Сондықтан, кез келген салада, әсіресе адам тағдырына араласатын құқық қорғау саласында адамдық факторларға – психологиялық, рухани аспектілерге аса ерекше мән беріледі. Тәрбиемен тығыз байланысты қылмыстылықпен күрес майданында бұл факторлар келешекте бұдан да артық мән мен маңызға ие болады.
Адам өз қызметін шаршамай, қажымай көңілмен атқаруы тиіс. Ол үшін оған артылатын жүк шамадан тыс болмауы керек. Жалақысы қызметінің ауырлығына, күрделілігіне, тартымдылығына, зиянды-зиянсыздығына байланысты лайықты да толымды болмақ. Құқықтық мәртебесі, қызметтік кепілдіктері тиісінше нақтыланса, әлеуметтік беделі де өспек. Аттестаттау барысында қалыпты жұмыс режімі сақталады. Сынақтан өтпеген қызметкерлердің адамдық қадірі, ар-намысы, құқықтары мен бостандықтары, қызметтік кепілдіктері бұзылмайды. Денсаулығының, кәсіптік даярлығының төмендігіне байланысты аттестаттаудан өтпегендерге психологиялық көмек, рухани демеу жасалады. Олар өз қарым-қабілеттеріне қарай басқа жұмыстарға ауыстырылады. Денсаулығы мықты, біліктілігі бекем кезде олардың осы салада аянбай қызмет еткені ескеріледі. Сынақтан біз осындай нәтижелерді күтеміз.
Сынақтан өту әрқашан адал, ашық, таза жолмен жүруді білдіреді. Онсыз сынақ сынақ емес. Таңдаған мамандығына ынтасы суынған, атқарып жүрген қызметіне қызығушылығы төмендеген, сөйтіп санда бар, санатта жоқ болып жүргендер, лауазымдық мансапты Отанға қызмет атқару мүмкіндігі ретінде емес, қалта қампайту амалы деп түсінетіндер айқындалуы тиіс. Шынтуайтында, осы салаға кездейсоқ, ішкі құштарлықсыз келген адамдар өз қабілет-қарымына орай басқаша таңдау жасауы, өз ісінің шеберлеріне жол беруі керек.
Сынақтан өтпеген жағдайда, белгілі бір қолайсыздықтар тууы, материалдық проблемалар, психологиялық, рухани қожыраулар болуы мүмкін. Алайда сынақтан өтпеуді трагедия, жолы кесілу деуге болмайды. Сынақтан өтпеу өшу дегенді білдірмейді. Бұл басқа санатқа өту мүмкіндігін береді. Адам өмірінің барлық кезеңінде әркімнің ақыл-ой қабілеті, дене саулығы жастық шағындай сақтала бермейтіні мәлім. Сондықтан осы көрсеткіштердің өзгеруі, қызмет тәжірибесі, біліктілік дәрежесі ескеріліп, осы саланың ішінде өзге деңгейдегі не жапсарлас салаларда басқа бағдардағы қызметке ауыстырылуы күтіледі. Немесе осы салада қызмет істеу ресурсы таусылғанын сезген адам өз қалауымен өзіне қолайлы басқа бір мүмкіндікті таңдауы тиіс. Мамандықтан шықпаймын деп, адамдықтан шығып кетуден сақтасын! Сонымен қатар, кәсіптік біліктілігі өскен, адамдық қасиеттері тозбаған қызметкерлер жоғарылатылуы тиіс.
Кезектен тыс аттестаттаудан қоғам осыны күтеді.
Болат СЫЗДЫҚ, заң ғылымдарының кандидаты, доцент, Қарағанды «Болашақ» университетінің профессоры, «Руханият» қылмыстанымдық ғылыми-зерттеулер орталығының жетекшісі.
Қарағанды.