Қашықтан оқыту жүйесінің бір тиімділігі студент ақпараттық технологиялар арқылы еркін түрде білім ала алады. Цифрлы әлеуеттің көкжиегін аша түседі. Сонымен қатар студенттер білімін жетілдіреді әрі өндірістен де қол үзбейді. Бұл жүйені жан-жақты қарастырып, ұтымды тұстарын жинақтап, біртіндеп қабылдап, жүзеге асырып жатқан жоғары оқу орындары бар.
Бүгінде көптеген ЖОО-да заманауи ақпараттық технологиялар мен телекоммуникациялық жүйелер негізінде қашықтан оқытудың элементтері енгізілген. Осыған байланысты еліміздегі алдыңғы қатарлы жоғары оқу орындарының білікті оқытушы мамандарымен тілдесудің сәті түсті.
«ЖОО-лардың қашықтан оқыту жүйесіндегі ең басты нысан – үздіксіз білім беру, – дейді Назарбаев университеті Қазақ тілі мен түркітану департаментінің профессоры, педагогика ғылымдарының кандидаты Зейнеп Наятуллақызы. – Осыған сәйкес университетімізге қашықтан оқыту технологиясы ешқандай қиындық туғызып жатқан жоқ десек те болады. Себебі онлайн білім беру процесі бірталай жылдан бері қолданыста бар. Мәселен, университетіміз Moodle жүйесімен жұмыс істеп келеді. Ол әлемнің 200-дей елінің ең ірі жоғары оқу орындарында қашықтан оқыту жүйесі ретінде қолданылады. Қазіргі уақытта онлайн оқытуға арналған құралдардың түрі өте көп. 2015-2016 жылдар аралығында АҚШ-тың Висконсин штатындағы Висконсин-Мадисон университетінде тағылымдамадан өттім. Білім ала жүріп, онлайн оқыту жүйесіне қатысты көптеген ақпараттық технологияны меңгердік. Солардың қатарындағы Socrative, Playposit, Peergrade, Edpuzzle, Thinglink, Quizlet, Infographic, Mentimeter, Classroom, Slideshare, Pictochart, Smatrup және Flipped Learning and Blended Learning сияқты онлайн оқыту бағдарламаларымен университетіміз студенттерге ақпаратты тасымалдаудың тиімділігін арттыруда. Сондай-ақ Blended Learning оқыту жүйесі бойынша бұған дейін сабақтың 60%-ы дәрісханада өткізілсе, қазіргі таңда 40%-ы онлайн түрінде оқытылып жатыр. Мәселен, 2018 жылдан бастап Назарбаев университетінде Қазақ тілі және түркітану департаментінің ұйымдастыруымен «STEAM жүйесі бойынша тіл оқыту: технологиялар мен дағдылар» атты шетелдік және отандық тәжірибелерге негізделген әдістемелік семинар-тренинг жүргізуді бастадық. Аталған семинардың басты мақсаты – Қазақстанның барлық оқу орнының оқытушыларына заманауи жаңа педагогикалық технологиялар мен онлайн оқыту технологияларын білім беру үдерісінде тиімді пайдалануды меңгерту. Семинарға Қазақстанның көптеген өңірінің ЖОО және орта білім беру орындарының 80-нен астам оқытушысы қатысты. Отандық оқу орындарызға онлайн оқытудың әдістемесімен бөлісуге қашанда әзірміз, қандай жағдайда да «Біз біргеміз!» деп айта аламыз».
Ал Қазақ ұлттық қыздар педагогикалық университетінің профессоры, филология ғылымдарының кандидаты Болатхан Серғазыұлы: «Студенттермен әртүрлі платформамен жұмыс істеп келеміз. Қай платформаның тиімді, өздеріне ыңғайлы жақтарын таңдауға ықпалдасудамыз. Олар «Келесі жолы «drive.google.com немесе Zoom бағдарламасымен сабақ өтсек» деген ұсыныстарын айтып жатады. Енді міне, қашықтан оқыту жүйесінің талабы да күшейтілді. 43 мамандық бойынша педагогикалық мамандар даярлайтын университетіміз де қашықтан оқыту жүйесіне ауысып, түрлі бағдарлама арқылы дәрістерін онлайн түрде жалғастырып келеді. Мақсат – Гипермәтін, мультимедиа, ГИС-технологиясын және тағы басқа платформаларды қолдана отырып, дәрістерді мазмұнды түрде жеткізу», дейді.
Ал Еуразия гуманитарлық институты Қазақ және орыс филологиясы кафедрасының меңгерушісі, филология ғылымдарының кандидаты, доцент Лаура Ноғайбекқызының айтуына қарағанда, онлайн оқыту жүйесі әлі бір ізге түспепті. «Биылғы оқу жылынан бастап, сырттай оқу жүйесі қашықтан оқыту жүйесіне ауыстырылды. Онлайн оқыту жүйесі қазір бір ізге түсті деп айта алмаймын. Әр оқу орнының ақылдаса отырып таңдаған бағдарламалары бар. Біздің институт AИС «PLATONUS» бойынша жұмыс істейді. OES-Webinar платформасын, ZOOM, SKYPE бағдарламаларын онлайн-дәріс, семинар өткізуде жиі қолданады. Институтымыз OPENU.KZ сайтында орналасқан «Жаңа гуманитарлық білім. Қазақ тіліндегі 100 жаңа оқулық» жобасы аясында жоғары оқу орындары мен мамандары бірлесе әзірлеген онлайн-курстардың ұтымдылығын студенттерге жедел тасымалдауды қамтамасыз етіп жатыр. Жалпы, таңдаған бағдарламаларымызды сатып алу, орнату, басқа да мәселелерді институт басшылығы дер кезінде шешіп отырады. Ал емтихан өз уақытында өтеді деген ойдамын. Қазір онлайн түрде емтиханға дайындық жұмыстарын бастап кеттік. Институтта студенттер үшін Call-орталық жұмыс істейді. Студенттер емтихан, басқа да мәселелер бойынша кез келген уақытта хабарласып жағдайды біле алады», дейді ол.
Айым БОЛАТҚЫЗЫ