Індет қайта күш алып барады. Былтырғыға қарағанда коронавирустың таралуы едәуір артқан. «Қызыл аймақта» тұрған еліміздің бұл аурудан аман тұрған аймағы жоқтың қасы. Әсіресе, астанамыз Нұр-Сұлтан қаласындағы асқынған ахуал оңалар емес. Елордада ауруханаға күніне 200-ден аса адам түсіп жатыр. Ал індет жұқтырғаны анықталып, үйінде оқшауланған тұрғындар қаншама?
Бүгінгі таңда елордада инфекциялық стационарларда 2 940 науқас ем қабылдап жатыр. Инфекциялық төсектік орын жүктемесі 83%-ды құрайды. Жансақтау бөлімінде 240-тан аса адам жатыр, оның 49-ы ӨЖЖ аппаратында жатыр. Ал жансақтау бөліміндегі төсектік орын жүктемесі – 84%. Күніне 200-ден аса адам ауруханаға түсіп жатыр.
Қалалық қоғамдық денсаулық сақтау басқармасының басшысы Тимур Мұратовтың айтуынша, жансақтау бөліміне КВИ-ға қарсы вакцина алмаған пациенттер түсіп жатыр. Стационарға жеткізілгеннен кейін олардың денсаулығы екі-үш күнде өте ауыр күйге дейін нашарлайды.
«Біздегі жансақтау бөліміндегі төсектік орындар толуға шақ тұр. Коронавирус инфекциясына қарсы екпе алмаған, ауыр күйде жатқан 248 пациент бар. Оның ішінде 77 адам өте ауыр халде жатыр. Науқастардың басы-қасында жүргендіктен, бұл көрсеткіш қатты алаңдатып отыр. Біз өткен жылғы ең ауыр күйге жетейін деп қалдық», дейді басқарма басшысы.
Ол ауыр күйде жатқандар арасында қарт кісілер ғана емес 35 жастағы науқастар да бар екенін атап өтті.
«Вирус жаңа штамдарға мутацияланып отырады, әрқайсысы жастар арасында жиі жұға бастайды. Қазір жастар да, тіпті балалар да аурудың ауыр күйіне ұшырай бастады. Екі-үш күн ішінде пациенттердің денсаулығы нашарлағаны соншалық, жасанды тыныс алу аппаратынсыз өмір сүре алмайтын күйге жетеді. Жансақтау бөлімінде барлық пациенттің мұндай жағдайға түсуінің себебі – вакциналанбаған. Бірақ олар мұны кеш түсінді», деді Т.Мұратов.
Осыдан екі күн бұрын COVID-19-бен күрестің алдыңғы шебінде жүрген елордалық дәрігерлер БАҚ арқылы ауруханадағы жағдайды көрсеткен еді. Кадрлардың бірінде әрең дем алып жатқан ер адамның кеудесі көрсетілген. Пациенттің өздігінен дем ала алмай, арнайы аппаратқа қосылғанын көруге болады.
Науқастардың бірі – зейнеткер Мәдина Сыздықова ауруханада жұбайымен бірге жатқанын, қазір екуінің де жағдайы едәуір жақсарып қалғанын айтты. «Жұбайым екеуміз қауіпсіздік шараларын сақтап жүргенде бәрі жақсы болатын. Көпшілікке коронавируспен ауырған адам ретінде бұл ауруға жүрдім-бардым қарауға болмайтынын ескерткім келеді. Бұл вирус өте қауіпті. Қорқатындай-ақ қауіпті», дейді ол.
Бұл ретте инфекциялық стационарға қайта бейімделген Көпбейінді қалалық балалар ауруханасының инфекционист дәрігері Айнұр Омарова қала тұрғындарына үндеу жолдады. «Жағдайдың ауыр екенін алдыңғы шепте күресіп жүрген бізден естігендеріңізді қалаймын. Ауыр науқастар көп, реанимациялық төсектің біреуі де бос емес. Індет жұқтырған балалар көп. Өз денсаулығыңды, өзгелердің денсаулығын қорғаудың жолы – санитарлық нормаларды сақтау және вакцина салдыру. Вакцина ғана аурудың ауыр күйінен және ӨЖЖ аппаратына кіріптар болудан қорғайды», дейді дәрігер.