«Самұрық-Қазына» АҚ жылдық 2,00% купонмен 500 млн АҚШ долларына тең еурооблигацияның бес жылдың дебютті шығарылымын сәтті орналастырды.
Облигация орналастырылғаннан кейін Қор купон бойынша ең төменгі мөлшерлемеге, сондай-ақ АҚШ долларымен есептегенде, ТМД елдері арасындағы эмитенттердің шығарылымы арасында тәуелсіз еурооблигацияларға шаққандағы ең тар спрэдке қол жеткізіп отыр. Шығарылымның бағасы «Самұрық-Қазына» командасы 18-20 қазан аралығында халықаралық инвесторлардың қатысуымен бейне-конференция форматында ұйымдастырған роуд-шоудан кейін қалыптасқан.
Қордың баспасөз қызметі таратқан ақпаратқа сүйенсек, өтінімдер кітабы (book-building) енді қалыптасып жатқан кезде облигацияларға деген жалпы сұраныс бастапқы ұсыныстардан үш есеге жуық артық болған. Соның нәтижесінде, мәміленің соңғы диапазоны 2,3% +/- 5 базистік тармаққа (WPIR) дейін төмендеп, мәміле 2,25% (reoffer yeild) деңгейіндегі табыспен аяқталған.
Өтінімдердің соңғы тізіміне әлемдегі ең озық инвесторлар енген, олардың арасында АҚШ, Еуропа, Ұлыбританияның ірі қорлары мен активтерді басқару компаниялары бар. Жалпы, «Самұрық-Қазынаның» осы шығарылымына 70 халықаралық инвестор қатысқанын айта кету керек.
Облигациялар нарығын қолдап, дамыту мақсатында және ел ішінде еурооблигациялар бойынша табысты сақтап қалу үшін аллокация кезінде сауда-саттыққа қазақстандық KASE және AIX биржалары арқылы қатысқан Қазақстан инвесторларына басымдық берілгені хабарланып отыр. Бұл сатылым сондай-ақ LSE, яғни, Лондон қор биржасының тізіміне енеді деп болжанып отыр.
Айта кетейік, мәмілені қазақстандық менеджер компаниялар First Heartland Securities АҚ мен «Фридом Финанс» АҚ-мен бірлесе отырып, бірлескен жетекші менеджерлер мен букраннерлер ретінде жұмыс істейтін Citi, MUFG, UBS және VTB Capital атты халықаралық банктер ұйымдастырды.