Арагідік кейбір сайттар мен әлеуметтік желіде несие кешіріледі деген ақпарат жарқ ете қалады. Оған сеніп, банкке құстай ұшатын адамдар да жоқ емес. Әрине, бәрі де еңсесін басқан қарыздан құтылғысы-ақ келеді. Бірақ алдымен таралған ақпараттың жалған-шын екенін айырып алған абзал.
Жақында тағы да осы сарындас жаңалық ел ішін шарлап кеткен. Жаңалыққа дереу назар аударған Қаржы нарығын реттеу және дамыту агенттігі таратылып жатқан ақпараттың дәйексіз екенін мәлімдеді.
«Осыған байланысты агенттік кредиттері бойынша төлеу мерзімі өтіп кеткен азаматтарға қолдау көрсету үшін 2021 жылғы қазаннан бастап берешекті реттеудің бірыңғай міндетті тәртібі енгізілгенін хабарлайды. Кредиттер бойынша төлеу мерзімі өтіп кеткен жағдайда қарыз алушылар банкке немесе микроқаржы ұйымына өтінішпен жүгінуі қажет, онда олардың өтініштері қаралып, проблемалық берешекті қайта құрылымдау талаптары ұсынылады», деп хабарлайды құзыретті орган.
Қарызды қайта құрылымдау талаптары сыйақы мөлшерлемесін азайту; төлемді кейінге қалдыру; өтеу әдісін өзгерту; қарыз мерзімін ұзарту; мерзімі өткен негізгі борыш және (немесе) сыйақыны кешіру; айыпақының (айыппұлдың, өсімпұлдың), комиссиялардың және қарызға қызмет көрсетумен байланысты өзге де төлемдердің күшін жою және тағы басқа түрде болуы мүмкін.
Егер қарыз алушы қарызды қайта құрылымдау талаптары бойынша кредитормен келісімге қол жеткізе алмаса, ол кредитордың жауабын алған күннен бастап 15 күн ішінде агенттікке жүгінуге құқылы. Бұл ретте қарыз алушы банкке немесе МҚҰ-ға өзінің өтініш бергенін және өзара ұтымды шешімге қол жеткізбегенін растауды міндетті түрде ұсынуға тиіс», делінген хабарламада.
Бірақ елімізде ипотекалық қарыздар бойынша теңгемен алған ипотекалық несиені қайта қаржыландыру бағдарламасы жүргізіліп жатқаны белгілі. Бұл азаматтар үшін өте тиімді. Себебі кешіру бағдарламасы аясында банктер азаматтың мерзімі өткен берешегін сұрамайды.
«Қазақстанда 2004-2009 жылдар аралығындағы кезеңде теңгемен ипотекалық қарыз алушыларға көмек көрсету үшін Ипотекалық қарыздарды қайта қаржыландыру бағдарламасын (Бағдарлама) іске асыру жалғасып жатқанын да хабарлаймыз. Бағдарлама шеңберінде қарыз бойынша негізгі борышты жылдық 3 пайыздан аспайтын сыйақы мөлшерлемесімен қайта қаржыландыру жүргізіледі. Қарыз алушының сыйақы, өсімпұл (айыпақы), айыппұлдар мен комиссиялар бойынша мерзімі өткен берешегін банктер кешіруге тиіс», деп хабарлайды агенттік мамандары.
Несие бойынша ақиқат ақпарат осы агенттіктің ресми сайтында және өзге де мемлекеттік органдар платформасында жарияланады. Сондықтан дәлел-дерегі жоқ, ресми емес мәлімдеулерге сенбеген жөн.