Абай облысында ет өңдеу өнеркәсібі қайта жанданатын тәрізді. Кезінде ет өңдеуде күллі кеңес одағына мәлім болған Семейде 2025 жылы жаңа ет комбинаты іске қосылады деп жоспарланып отыр. Инвестор да табылыпты. «Еуразия АгроХолдинг» компаниясына жер телімі де беріліпті. Инвестор ендігі екі жылын кәсіпорынды іске қосуға күш салады.
Жобаның құны да қомақты. Шамамен 18 млрд теңгені құрайды. Комбинат іске қосылатын болса, 200-ден астам жаңа жұмыс орны ашылады. Комбинатта жоспар бойынша малды союдан бастап өнімді экспортқа шығаруға дейінгі цикл жүзеге асады. Бұл жоба ет өнімдерін экспорттаумен қатар, ішкі нарықты да қамтамасыз етуге мүмкіндік береді.
Абай облыстық кәсіпкерлік және индустриялық-инновациялық даму басқармасының басшысы Рүстем Ворошиловтың айтуынша, жүргізіліп жатқан жұмыстардың басым бөлігі инвестиция тартуға бағытталған. Ет комбинаты жобасы – осындай ірі жобалардың бірі.
«Семей қаласының аумағында «Өндіріс» индустриалды аймағы бар. Заңнамаға сәйкес, мұндай аймақтарда экономиканың басым секторларының өңдеуші кәсіпорындары құрылады. Аталған секторлар ұлттық жобалар аясында субсидиялау арқылы қаржыландырылады. Инвесторларға жұмысымызды көрсету үшін жаңа кәсіпорындар құру міндетін алға қойып отырмыз. Мәселен, өткен жылдың қараша айында облыс әкімі Нұрлан Ұранхаев Орынборда өткен Қазақстан мен Ресейдің Өңіраралық ынтымақтастық форумына қатысып, меморандумдарға қол қойды. Осылайша, өңірге инвесторларды тартуға қажетті қадамдар жалғасуда», дейді Р.Ворошилов.
Әлбетте, жаңасы жақсы ғой. Бірақ ескісін де естен шығармаған жөн сияқты. Семейде кеңестік кезеңде атағы алысқа кеткен ірі кәсіпорындардың бірі саналған ет комбинаты қазір қаңырап тұр деуге болады. Кәсіпорынның толық қуатында жұмыс істеуін тоқтатқалы қашан... Кетеуі де кетіп-ақ тұр. Тоқырау жылдары талан-таражға түсті. Ұстағанның қолында, тістегеннің аузында кетті. 2000 жылдары кәсіпорын жұмысы жандана бастап еді. Өкінішке қарай, ол да ұзаққа бармады. Бұдан кейін жұмысы тоқтап, тұралап қалған комбинатқа кімдер иелік етпеді. Инвестиция да тартылды, банкротқа да ұшырады. Отыз жылға жуық уақытта отызға жуық басшылық ауысты. Әзірге ғимараттары қаңырап, қабырғалары қақырап, қараусыз тұр. Облыстың атқарушы билігі бұған да назар аударып қойса жақсы болар еді.
Ерзат ЖАНАТҰЛЫ,
журналист
СЕМЕЙ