Елімізде туризм саласын дамытудың 2023-2029 жылдарға арналған тұжырымдамасы қабылданды. Мақсаты – туризмді елдің экономикалық дамуының басым бағытына айналдыру. Атап айтқанда, осы саладағы жұмыспен қамтылған азаматтардың санын – 800 мың, ал саладағы жалпы қосымша құн көлемін 6 трлн теңгеге дейін ұлғайту көзделген. Сонымен қатар қонақүй және тамақтану қызметтеріндегі инвестиция өсімін 260 млрд теңгеге дейін арттыру жоспарланған.
Мәдениет және спорт министрі Асхат Ораловтың айтуынша, көші-қонды бақылау eQonaq электронды жүйесі және арнайы мобильді қосымшаларды енгізу арқылы іске асады. Сондай-ақ уәкілетті органдармен бірлесіп, визалық, көші-қон саясатын либерализациялауға байланысты тәуекелдердің алдын алу жөнінде іс-шаралар қабылданады.
«Туризмге жұмсалған қаражаттың тиімділігін анықтау үшін туристік инфрақұрылымның даму деңгейі бойынша өңірлердің ұлттық рейтингін енгізу жоспарланып отыр. Рейтинг Қазақстанның туристік картасына енгізілген басым бағыттар мен ТОП-50 дестинацияны қамтиды. Өңірлік туризм саласындағы шағын, орта және ірі инвестициялық жобаларды іске асыруға жеке капитал тартылады. Маңғыстау облысы, Түркістан облысы, Алматы тау-шаңғы кластері және басқа да орындар басым аймақтар ретінде қаралады», дейді ведомство басшысы.
Сонымен қатар туризмді дамыту шеңберінде ерекше қорғалатын табиғи аумақтарда АҚШ, Аустралия және Грузия сияқты елдердің тәжірибесі қолданылмақ. Қазақстанның маңызды табиғи нысандарын сақтау үшін инвесторлар тартылып, мемлекеттік ұлттық табиғи парктердің инфрақұрылымын дамыту жалғасады. Мысалы, Имантау-Шалқар курортты аймағын дамыту аясында Солтүстік Қазақстан облысында орналасқан жердің туристік-рекреациялық қызметінің жол картасын әзірлеу жоспарланып отыр.
«Елдегі туризм саласын дамытудың жаңа тұжырымдамасына сәйкес Төтенше жағдайлар министрлігіне (ТЖМ) қарасты аумақтық бөлімшелеріне туристердің жүріп-тұру маршруттары туралы хабардар ету бойынша талап енгізіледі. Бұл ақпарат іздеу іс-шараларын уақтылы ұйымдастыру және қажет болған жағдайда медициналық көмек көрсету немесе эвакуациялау үшін аса маңызды. Сондай-ақ ел бойынша туристік жолдарды таңбалау жөніндегі стандарт қабылданады. Маршруттарды бөлу туристердің даярлық деңгейі мен күрделілігіне қарай жүргізіледі. Әр санат белгілі бір түске сәйкес жасалып, соқпақтың басында оның күрделілігі және туристке қажетті талаптар туралы ақпарат орналастырылады. Деректер, ақпараттық қалқандар мен стендтерді орнату, туристерге дұрыс бағыт-бағдар алуға және саяхаттың қауіпсіздігін қамтамасыз етуге мүмкіндік береді», дейді А.Оралов.
Туризм саласында кадр даярлау жүйесін жетілдіру жөніндегі іс-шаралар да жүзеге асырылады. Мысалы, тұжырымдама шеңберінде халықаралық сарапшыларды тарта отырып, білім беру бағдарламаларын дайындауға арналған әдіснамалық ұсынымдар әзірлеу, ағылшын тіліндегі пәндер үлесін арттыру және бизнес өкілдерін білім беру бағдарламалары мен оқу-әдістемелік материалдарды әзірлеуге тарту қарастырылған. Қонақүй менеджерлерін, туроператорларды және «Болашақ» бағдарламасының түлектерін оқыту мен диплом жұмыстарына басшылық етуге тарту мүмкіндігі, сондай-ақ оқыту бағдарламаларына қысқамерзімді курстарды енгізу мүмкіндігі де қаралады.
«Халықаралық тәжірибе көрсеткендей, бүгінде ауқымды және танымал іс-шараларды, спорттық жарыстарды өткізу туристерді тартудың ең тиімді құралдарының біріне айналды. Осы бағыт бойынша да біраз жұмыс атқарылады. Елдегі MICE-туризмнің әлеуетін ескере отырып, бұл бағытты халықаралық тәжірибеге сай дамытуды жоспарлап отырмыз. Қазақстанның MICE-дестинациялары халықаралық аренада, оның ішінде халықаралық қауымдастықтар платформалары арқылы насихатталады. MICE-туризм өкілдері елге MICE-іс-шараларды тартумен белсенді айналысады», дейді министр.
Сондай-ақ туризмді дамыту тұжырымдамасы бойынша, мәдени-танымдық туризм, агротуризм, әлеуметтік, медициналық, экологиялық, іскерлік, балалар-жасөспірімдер және туризмнің басқа да түрлері дамытылады. Туризмнің әрбір басым бағытын жеке қарастырылып, экотуризмді дамыту үшін экотуризм субъектілерін ерікті сертификаттауды енгізу, сертификатталған қонақүйлерді онлайн брондау платформасын құру, табиғатқа ұқыпты қарау жөнінде ақпараттық науқан жүргізу жоспарланған.
Министрдің айтуынша, агротуризм саласында болашағы зор орындарды анықтау және ауыл тұрғындары үшін оқыту іс-шаралары жүзеге асырылатын өңірлерге барып далалық зерттеулер жүргізіледі. Агротуризмде қызмет көрсететін субъектілердің тізілімін жасау және жүргізу, өңірлерге инвестиция тарту, ауылдардың инфрақұрылымын жақсарту және аумақтар брендингін дамыту жоспарланып отыр. Фермерлерге ауыл шаруашылығы мақсатындағы жерлерде агротуризммен айналысуға мүмкіндік беру бөлігінде заңнаманы жетілдіру қарастырылады.
Сала мамандарының болжамы бойынша, жоғарыда аталған барлық бағыт бойынша белсенді жұмыс 2030 жылға дейін өз жемісін беріп, ішкі туристер санын 11 млн адамға, ал шетелдік туристер санын 4 млн адамға дейін арттыруға болады.